JOHN 2
2
Cana Yultlairou Nulou Markhulnara Kngakei Lhou Toukur
1 #
Jn 4.46; 21.2. Tlaini Khniniyei hillou khyumni tlungkur heirouri, Galilee'yei Cana yultlairou nuruinei markhulyeinung, bi heirou Jesuei puiwikhi loukyao, 2heirou Jesu'yakhi Aiyei ruishik raple kalhonne nuruina heirouei yaonanungei ungpikur. 3#Jn 19.26; Mk 3.31. Heirouri nuruina bi heirou mongnungei darkha yui luilhakurnarou, Jesuei puiwine Anung washunkur, “Yari darkha yui mongnungei makurame.” 4#Mk 1.24; 5.7; Jn 7.6; Jn 7.30; 8.20. Heirou Jesu'ne loumallangkur. “Keinungri shunrimakhui, Keiyei kheenri hungtlungmakhui.” 5Heirou Jesuei puiwine shok rapnung shunmatukur, “Naiyei Upawayei shunmatupikur heirapbei hilthungne nane loutoulak.” 6Nulounei malchak khangna bi heirou Jehudia rapbei youkna khoine, mathainanungei yui shungmallongna thlungei khanglhong thruktam loudunkhou, khanglhong khat'khatrou yui khangcha somni-somthum duine shunglhak kya. 7Heirou Jesu'ne shok rapnung shunmatupibi watyilkur, “Nane yuikhangrap heiri yui shukthimlaka.” Heisi tounarou yane khanglhongrap heiri yui bilbil thimni shukthimkur. 8Heirouri Ane yanung shun, “Arouri nane yuikhangrei yui thacha shorthutbi malkhangnei lhoubom heiyei wattouwa upawanung yenpilak.” Heitounei yane yuikhangrei yui thacha shorthutloubi wattouwa upawanung yenmalanpikur. 9Heirou ane loumartambi thinarouri, yui heiri asinung darkha yui hollura. Heiya darkha yui heiri koulhangrei klouwo touri ane loumumak (heiyanungkhi shok rapneri kourei shorthutdo touri yane kmu); heirouri ane nu klou cheempuya ungloubi, 10anungei kngai, “Thimi deineri malchak khangnarei khulbung rapnung lamkrine darkha yuiningya fleithutpiwurbi, yane mongmalipkur hillouri, shukya fleithutpi. Heiya nangneri asilumpha darkha yui ningya loukhouleihuinu!” 11Jesu'ne lamkrine anaksi kngakei lhou rapya Galilee'yei khukarthil Canara touwurkhoubi, bi heirou thang'alya mutpiwurkhou, heirouri Aiyei ruishik rapne Aya uklumkur. 12#Mt 4.13. Heihillouri, Jesu'ne Aiyei puiwile, Aiyei teinaorap heirou Aiyei ruishik rapkou pulne Caperna-um'ra wawurbi, heitoubi yane bi heirou tlaini bei leiwurkhou.
Jesu'ne Pukhrumna Cheemra Wachang
13 #
Hoy 12.1-27. Heirouri Jehudi rapne Ralthutpinei Kumtlun tlaini hungtlungrou younung, Jesu'ne Jerusalem'ranung yukur. 14Bi heirou Pukhrumna Cheemwaira thimi rapne hal kyor, yao kyor, heirou mathru kyor heitoubi tuychui leepnananung ombi louklei Ane yumukur. 15Heitounei ngamrou Ane ruikhuk khat shinbine, Pukhrumna Cheemrei yaorul raple heirou halrul rapkhi namma hulthutkur; heitoubi Ane tuychui leepnanungei loukhou thimi rapbei omna rapkhi thak-dak naimakne khangfletkur, heitoubi tuychui rapkhi thekchekur. 16#Lk 2.49. Heirou Ane mathru kyor thimi rapnung shunkur, “Nai putcheirap heiwari bi arouwei louthutdurlaka! Keiyei Pawaei Cheemya nane lal'holna keithil hoiyerkur yamakrou!” 17#Laa 69.9. Heirouri ruishik rapne Khyingei Lailikra mayewurkhou heiwaya tallengne loumayekthutkur, “O Dunpu, Neiya khrumchana cheemwairei lhou toukur heiwane Keiyei malungra meithlanni kangkurnak hoiyura.” 18#Mk 11.28; Mt 21.23; Lk 20.2. Heirouri Jehudi rapbei lhou'urpu rapne Anungei tlou kngai khoine kyun, “Nangne heinaksi lhouya kounaksi toubomthuk leinei ngamrou toukurro? Kai maibongrakhi kngakei hutlha khat mutpilakma!” 19#Mt 26.61; Mt 27.40; Mk 14.58; 15.29; Pao 6.14. Heirou Jesu'ne loumallang, “Pukhrumna Cheem awaya thresundabi, heitoubi Cheem awaya tlaini khyumnirou Keine hanui kallengne sabangthurou.”
20“Cheem heiwaya sabangeinung kum somlile-thrukbil changkurwaya, Nangne tlaini khyumnirou hanui tanghakpane sabangkur manerouko?” toubi yane Anungei loukngai. 21#1 Co 6.19. Heiya Jesu'ne Pukhrumna Cheem ngamrou kyun heiri Aiyei sharungya yunkna. 22#Jn 12.16; 14.26. Heisitoubi tlourap heiri Ane khirouwei ringthutkur hillouri, Aiyei ruishik rapne Ane shunthutkhou tlourap heiya mayekthutkur, heirou Khyingei Lailikrei Jesu'ne yunkhou heiri kouweiyo toubi yane uklumkur.
Jesu'ne Tlaipang Thimi Rapbei Ukningya Kmu
23Arouri Jesu'ne Ralthutpinei Kumtlun tlainirou Jerusalem'ra leikhouyeinung, bi heirou Ane kngakei lhourap touthutnarei muthungkur thimi rapne Aya uklumkur. 24Heiya Jesu Ai'mshane yaidoura malungam khoumak, ngamri Ane ya namyerwaya muchibi klei. 25#Jn 1.47; 6.61; 13.11; Mk 2.8. Ngamri bi heirou ya hukhatnekhi Anungei yaingamrou yunthutpinanung tloubomri koukhatkhi mak, ngamri Ane thimi rapbei ukningra ningchabi klei namma muchilei.
હાલમાં પસંદ કરેલ:
JOHN 2: MARIBSI
Highlight
શેર કરો
નકલ કરો
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
