MARK 9
9
Jisu Athok Kachipharlep
(Mot. 17:1-8; Luk. 9:28-36; 2 Pe. 1:16-18)
1Aro anang analiyok pulo, “Khanangsi ne nali thando, Arnam-alongri kihal-ajakong pen kiwang thekthe lengke thihlonghle ye, ladi angkhan arleng holek arjap si kido abang asitem do.” 2La-arni para ni-thorok aphel, Jisu pen Pitor po aro Johon po yok eno, aro anali isi inglong kartulyok ujelo. Aro anang analingot prek athok chipharlepmo, 3aro anang pehel phlan-etno, aro pirthimipe adak labadi kiphlan-et ke pe chok un-eh. 4Aro lalong Mosi po pen Elija po analiyok chiklangsi, Jisu pen lam chithano. 5Laparake Pitor po lam thandunsi Jisu yok pulo, “Paklangpo, holek kidosi iliphan mepen do; hali nangphan ihum, Mosi po yok ihum, Elija po yok ihum, la humthom kuntulu ahem kemnang.” 6Anang potsi punange, anang chithan un-ehsi kido, piyok pu tene anali phere dersi kido. 7Laparake iplang inghun analiyok wang bam klakngo, aro labang inghun para ithe alam wango, “Anangsi nenengdok ne So, anang lamthe onenot!” 8Lajongsi konam anali kilangwor ke, anang pen kaita wedetno, manta Jisu detsi thek hlongo.
Elija po Kiwang Jong Alam
(Mot. 17:9-13)
9Anali inglong kartul para wang kisunjong amunsi, Jisu analiyok jipe thekngo, Arleng Aso kithi para burphak welengke, labang alam kapathan hlonghle yok thano.” 10Lasi anali daksi, kithi para kiburphak nge ke pot te pusi chirju propsi dolo. 11Laparake anali Jisu yok arjulo, “Elija po ango wang hlonge pusi kanong paklang abangke pot badi pudo?” 12Anang analiyok pulo, “Khanang ke, Elija po ango wangsi ahuwit abihini me-at pangningdo; aro laparake Arleng Aso aphan ke anang ajat-jat aduk chohlonge, aro anangyok sedetne puke lolong wiwe-yong ma? 13Manta ne nali thando, “Elija po wang tango, aro kiwiwen alamthe atengsi, anali pot katiki kar-ih ladi tikilo.”
Si-ik Ajiu Kachu-u Sopenso Ihutyok Jisu Kapame
(Mot. 17:14-21; Luk. 9:37-43)
14Konam anali adun hel adungyok wango, analiyok ako-ong arat chikomwolsi kido thekngo, aro angkhan kanong paklanghel pen anali lam chirung chibatsi kido. 15La-amunsi rat Jisu yok thekngo, aro ahuwit ta asombhik hlong detno aro anali katsi anang dung chirdom damo. 16Anang analiyok arjulo, “Nali anangpen pot alam chirung chibat do?” 17Rat asitem para ihut anangyok pulo, “O Paklang, neso poyok nangdung wando; anangyok isi debal asi-ik hapsi lamthan thekthesi do; 18aro konamsi ajiupo ananglong ajhok wang, anangyok lungle long partiman; aro angho para achoplep wangman, aro anang angho aso chingkreman aro anang chungkreng detno; aro anangyok ka-ujhar yok adun hel ango chingdukngo, manta anali un-eh yongot.” 19Anang analiyok pulo, “O kikrolkre agijing hel, ne nali sitem konbak arniyok doye? Konbak arniyok nali long chihibo? Anangyok nedung wanot.” 20Aro anali oso soyok Jisu adung wano. Konam ajiupo Jisu yok thekpen-pan, jongsi oso soyok huweng bopmo, aro ososo lungle athak krep dungo, aro anghopen aplep pa-olesi, konglong-kongthalsi dolo. 21Jisu oso so anang payok arjulo, “Anang labadi kachiplang nikan bak chokngo?” Anang pulo, “Oso apun para chiplangdo.” 22Anangyok kapaduk ayok aphongten melong, aro lang long pajang man; manta nang penebak tiki un tene, haliyok jinsonot, aro hali rapmot.” 23Jisu anang yok pulo, “Nang un tene!— kikrol arleng aphan ahuwit tiki un.” 24Lajongsi oso anang apa po hang-wongo, “Ne kroldo; ne kikrol un-eh long nerapmot.” 25La-apor idhol arleng inan katsi kiwang theksi, la si-ik ajiupo yok tamsi pulo, “Nang debal pen nothong ajiupo, ne nangthando, nang anang para mokol olene wangot, aro jatsi lalong lutphak ngek!” 26La-amunsi anang hang chiro, aro oso so yok huwengsit no, aro oso so kithi nak chiplango, lasi ako-ong arlengke pulo, “Anang ke thilo.” 27Manta Jisu anangyok aripen otsi anang yok pangthuro, aro anang ingthur uno. 28Konam anang idon ahem lut damo, anang adun hel anang yoksi ahudetsi arjulo, “Piyok hali anangyok ujhar un-eh yongo?” 29Jisu anali yok pulo, “Labang po ke pingkit pendetsi olesi wangman.”
Jisu Kithi Aro Kiburphaknge Alam Kithan
(Mot. 17:22-23; Luk. 9:43-45)
30Anali labang athem para damo aro Galili asitem damjongsi dolo. Anang kaiyok ta pathan un-eh yok aneng kido; 31piyokte pu tene anang abithang adun hel yok paklangsi, analiyok kipu, “Arleng Aso yok arleng hel arideng champiye, aro anali anangyok mariye, aro ni-thom arni aphel anang bur phaknge.” 32Manta anang potsi kipu abhu hlonghle yongot aro anangyok karjuyok ta chipherelo.
Inghote Thechot?
(Mot. 18:1-5; Luk. 9:46-48)
33Laparake anali Kaparnaum yok wango; aro anang hem arlo kido amun analiyok arjulo, “Nali duwar ibeng long pot te alam kachingje?” 34Manta analike doklip mo; piyokte pu tene ingho thechot, labang alam duwar ibeng anali ihut para ihut lam kachipuwang. 35Lalong anang iningo, aro bang kere-hini adunyok taramo aro pulo, “Inghosi ango kidoyok anengdo man, anang ahuwit yok ta ajut aro ahuwit aphan murkiya chiplange.” 36Laparake anang oso ihut yok wano aro anali sitem bilo; aro anang awamlong ensi, anang analiyok pulo, 37“Inghosi labadi oso ihutyok nemen pen chidengman, anang neyoksi chidengman; aro ingho neyok chidengman, anang neyok det ke kalek manta neyok wangkitol poyok si chidengman.”
Ingho Langsetse Anangke Iiliphan
(Mot. 10:40-42; Luk. 9:49-50)
38La-amunsi Johon po anangyok pulo, “O Paklang po, hali inghut arlengyok nangmen pensi si-ik ka-ujhar thek hlongo, aro hali ananyok kiteng dunyok rono, piyok pu tene anang hali adun kalek.” 39Manta Jisu pulo, “Anangyok tengek; piyok pu tene ingho nemen apharan pensi tikilo, mophel jongke neyok kapatharak alam kaita thanthe ye. 40Inghosi iliyok ado-kolke, anang iliphan. 41Piyok pu tene khanang ne nang thando, ingho nemenpen naliyok lang-han isi lang pajun, tene nali Khristo adun kipu apot nali banta jatsi chipangbobe ye.”
Pap Hongjat Kilang
(Mot. 18:6-9; Luk. 17:1-2)
42“Nali sitem inghonebak neyok kikrol oso hel ihutyok panghopon do, tene anang phanke phukuli arlong isi angphun bamdungsi aro nangyok langpe long pangjang plupsi mechot. 43Nang aripo si nang panghodo, tene labangyok thuhlet; 44ari-hongni dosi, jom along lake kijutje me-aten long kidamyok ke ari kongane kido ajiubongsi mechot. 45Aro nang kengsi nang panghodo, tene bangpoyok thuhlet; 46akeng hong-ni dosi jom arlo kiwaryok ke kengkok ajiubong kidosi nangphan mechot. 47Aro nangmek helne nang panghodo, tene bangpo yokta hekpok; nangmek hini dosi aro jom along kiwar yok ke, amek isi pen Arnam longri kilutsi mechot, 48lalong lamehel ingthan ape thithe ye, aro me-aten jatsi jutje ye. 49“Piyok pu tene abangten yokta kangton ingtipen pangthirtangsi mepen pangthire. 50Ingti ke akime; manta ingti asok lammo, tene bangpo pot pente asok pado une? Nali bithang angthin long ingti asok chipado, aro nali ihut para ihutyok nengsam chipado.”
હાલમાં પસંદ કરેલ:
MARK 9: AMRI-BSI
Highlight
શેર કરો
નકલ કરો
Want to have your highlights saved across all your devices? Sign up or sign in
AMRI KARBI N.T. - AKIMI ANGTON N.T.
Copyright © 2014 by The Bible Society of India
Used by permission. All rights reserved worldwide.
