MARK 5
5
Si-ik ajiu Kachu-Uh Arlengyok Jisu Kapame
(Mot. 8:28-34; Luk. 8:26-39)
1Anali langpe haga apar damsi, Geresani alongri yok wango. 2Aro anang tilong para wang kisun amun, jongsi si-ik ajiu kihap ihut arleng ahilik para kiwang anangyok pochakngo. 3Anang anang thirihel alongsi kido; aro anangyok kaita anangyok bamthip si, layok ke hirkuli penta bamsi bi un-eh yongo; 4piyok pu tene anang aphongten akeng ari hirkuli pen ingnak ngo, manta anang hirkuli kapamet, aro akeng kangnak hirkuli helta kibeng prop; aro ihut ta anangyok pangdom ke bi un-eh si kido. 5Anuwe aro anelo anang thiri ahilik hel along kido aro inglong-kartul along dosi arnita hangchersi kido aro abithang yok arlong pen chipachang man. 6Konam akaholo para anang Jisu yok thekngo, anang wang katno aro anang yok chirdom hupmo; 7aro hang chersi pulo, “O Kithechot Arnam Aso Jisu, nang nepen pot katiki yok do? Ne nangyok Arnam amen pen nang chingduk do, aduk nepiyek.” 8Piyok pu tene anang bangpo yok kipu, “O nang si-ik ajiu, labang arlengpo para wang olenot!” 9Laparake Jisu ke anangyok arjulo, “Nang men pot te?” Anang angpudun phakngo, “Ne menke amokha, piyok pu tene hali ako-ong do.” 10Anang Jisu yok chingduk chohangsi longri para lahel yok padam tolte yok chipabek ngo. 11Minonke inglong akung amokha phak pachopansi kido; 12aro si-ik ajiuhel Jisu yok chingdukngo, “Haliyok phak hel along hali tolnot; hali lalong lutdam detne.” 13Lasi Jisu analiyok hawang pilo. Aro si-ik ajiuhel arlengpo parake olesi damo aro phak helyok hap damo; aro hajar-hini phak apal dam kul-kulsi, langpe long jangdam plupsi thidetno. 14Phak kihon abang akeng chiparjangsi rongpe aro longri dungsi lampo pachitha-ang detno. Laparake potsi chiplango arleng hel kilangyok olesi wango. 15Anali Jisu adung wango aro si-ik ajiu kihap poyok, lake amokha kihap poyok, pe-rik chi-ik wetsi, aro agiyan hlongsi, arlengpo iningsi kido thekngo aro anali chiphere detno. 16Ingho kithek abangke, labang si-ik ajiu kihappo pot badi chiplango, anang aro phak hel alam panirsi analiyok thandetno. 17Laparake anali Jisu yok abithang ahol para anang yok chitereksi kidamyok chingdukngo. 18La-aphel Jisu tilong athak karlujong akosi, labang si-ik ajiu kihap arlengpo anangpen kidun aphan anangyok chingdukngo. 19Manta Jisu anangyok padam hlonghle si pulo, “Nang bithang hem hembang adungyok dam phakngot, aro Hemphu nangyok kajinso si, nali phan konbak akithe asal tikilo, bangpo a-odi analiyok pidamot.” 20Aro anang lalong para damsi, Jisu anangyok potsi akithe asal tikilo, bangpo Dekapolis alongri jon-jan than-woro; la-amun ahuwit ta asombhik pahlongo.
So-Arloyok Kapahreng Aro Arloso Ihut Kapame
(Mot. 9:18-26; Luk. 8:40-56)
21Konam Jisu tilong pen langpepe haga aparyok dam phakngo, lalong rat ako-ong anang dung wang chingrumo; la-amun anang langpepe akungsi kido. 22Laparake Jairas amen kachirdom ahem ahemphu thawang ihut wangsi, anangyok theksi, anang keng-ari otsi, 23aro anangyok chinduk jongsi pulo, “Neso peso kithibo detno. Wangot aro anang thak ari bat pinot, lasi anang medet bo aro hrenge.” 24La-amun Jisu anang pen duno. Aro Jisu anang pen rat akithe duno, aro anangyok komthip mo. 25Minon ke lalongsi nengkan kere-hini para awi kiboi jong kiso, arloso ihut kido. 26Anang ajat-jat ojha adung otdamsi jokha kiso chilango, aro jokha nohok panghono, manta kimeye bak ke ingho pon chot-chotno. 27Arlosope Jisu alam arjulo, aro rat asitem lutdunsi Jisu aphel aga para wangsi, anangpe long otno, 28piyok pu tene anang bithangsi kachipu, “Ne anang ape otdunchet hlongta, ne medetne.” 29Jong-jongsi anang awi kiboi jut-hletno; aro anang abang long kido behali hel kimedet ahari hlongo. 30Lajongsi Jisu anang para ajakong kidam than unsi, anang rat asitem amahang chirting si arjulo, “Ne pe long ingho te otno?” 31Aro anang adun hel anangyok pulo, “Ratmar nangyok konbak pimpro-sorodo nang thek yongta, ingho neyok otno pusi arjudo ma?” 32Jisu chighuren-wolsi ingho labang asal tikilo kithekpen ayok lango. 33Arlosope anang bithangyok potsi chiplango, chithan unsi, anang chiphere dersi klem klemsi Jisu akeng long chirdomsi asereng alampo anangyok than detno. 34Lalong Jisu anangyok pulo, “Ei nesope, nang kikrol si nang pamelo; nengsam damot, aro nang behali kiso medetnot.” 35Konam Jisu labang alam kithan amunsi, Arnam ahem thawang Jairas po ahem para wangsi anangyok pulo, “Nang sope thilo. Piyok paklang po yok la-an aduk pido?” 36Manta anali potsi kithan Jisu aneng pipesi, anangyok pulo, “Phereyek, krolne do.” 37Anang Pitor po pen Jems po aparke kaiyok ta padam tolte yongo aro anang muso Johon po yokdet chi-en chomsi damo. 38Konam anang kachirdom ahem thawangpo ahemyok wango, anali hang-taramsi aro surujosi kido wang thekngo. 39Konam anang hem arloyok lutdamo, anang analiyok pulo, “Nali piyok te la-an hang-taramsi aro surujo do? Asope thithe lang, ameksi jangdo!” 40Aro anali ingnek hulo. Laparake anang lahelyok mokol pa-ole phrotno, aro osope ape aro apo aro anang alok helyok ensi, osope kidoyok lut damo. 41Anang osope ayok ari otsi anang yok pulo, “Talitha kum,” la acho alamke, “Oso pe, ne nang thando thurnot!” 42Aro jongsi oso pe thuro, aro keng-kam damo; piyok pu tene ospe abo nengkan kere-hini kichok. Labadi si anali asombhik si hlong detno. 43Labang alam kaiyok ta pathanthe yok, Jisu analiyok thano; aro osope yok kicho abihini kipiyok pulo.
હાલમાં પસંદ કરેલ:
MARK 5: AMRI-BSI
Highlight
શેર કરો
નકલ કરો
Want to have your highlights saved across all your devices? Sign up or sign in
AMRI KARBI N.T. - AKIMI ANGTON N.T.
Copyright © 2014 by The Bible Society of India
Used by permission. All rights reserved worldwide.
