MARK 3
3
Ari Atot Kangwe Arlengyok Kapame
(Mot. 12:9-14; Luk. 6:6-11)
1Jisu Arnam kachirdom ahem long lutdam phakngo, aro lalong ari atot kangwe arleng ihut kido. 2Anali Jisu yok kisang-arni pame unma un-eh ma pusi anangyok ado kipiyok, anang yok lang dun phrong ngo. 3Aro anang la ari atot kangwe arlengpo yok pulo, “Amahang wang arjap mot.” 4Laparake anang analiyok pulo, “Kisang-arni ke kime asal katiki yok, ma kangho asal katiki yok, arleng pahreng aphan ma, ma kamari aphan?” Manta anali doklipsi dolo. 5Jisu anali angthin kangtang hel anat neng dohosi; aneng thisi chikomwelsi analiyok lang si, labang arleng poyok pulo, “Nang aripo pakengot.” Anang ari pakengo, aro labang aripo medetno. 6Pharisi hel olesi damo, aro Herodiya pe arleng pen la-amunsi chingrum penpansi pot badi Jisu yok adopisi mari une labang alamthe chipangchimo.
Arleng Ako-ong Langpe Akung Kachingrum
7Jisu abithang adun hel pen langpepe akungyok damo; aro Galili para, aro Judiya parata rat ako-ong anang phel-phel duno; 8Jerusalem, Idumiya, Jordan langjon apar aga parata, Tayar pen Sidon rongpe adung arleng ako-ong anang katiki ahuwit alam arjusi, anang dungyok wango. 9Rat hel chidol hur-har hlonghle yok, tilong isi anang dung kahonjok yok, anang adun helyok thano; 10piyok pu tene anang ako-ong arleng yok kapame apot, bet ki-un ahuwit arleng anangyok ki-ot ayok chidol rul-ralsi kido. 11Konamsi si-ik hel anangyok kithek, mehel anang ngo krep-phrilsi hangsolsi pulo, “Nang ke Arnam Aso!” 12Manta Jisu si-ik helyok anang ingho, labang pachitha-ang hlonghle yok than klakngo.
Bangkere-Hini Adunyok Jisu Kapachak
(Mot. 10:1-4; Luk. 6:12-16)
13Jisu inglong kartulpe long damo, aro inghoyok anang anengo analiyok taramo, aro anali anang dungyok wango. 14Aro anang pen anali kidoyok, ingho yok kangthir adun amen bilo, aro kime-alamthe kapahar aphan kitol ayok anang bang kere-hini ayok arwalo, 15aro anali si-ik hel ka-ujhar apharan kipi ayok arwalo. 16Lasi anang bang kere-hini pachakngo: Pitor (ladi kataram amen, Simon kibi); 17Jebidi po aso Jems po, Jems po amuso Johon po (la bang-hiniyok Bonargos, lake suneng-kangder asopo pusi kataram amen bilo); 18aro Andriupo, aro Philip po, aro Bartholomiu po, aro Mothi po, aro Thomas po, Alphayus po aso Jems po, aro Thadeyus po, aro Simon Kananiya po, 19aro Jisu yok hutur arideng kichampi Judas Iskariyot po, labang bang kere-hini yok anang pachakngo.
Jisu Pen Belsabul po
(Mot. 12:22-32; Luk. 11:14-23; 12:10)
Laparake anang idon ahem ayok lut damo; 20aro labadi rat akithe chingrum phakngo, lasi anali kicho yok apor pahlonghle yongot. 21Konam anang hem abang labang arju hlongsi, “Anangke ingcham chipharlo do” pusi kinep ponyok damo. 22Aro Jerusalem para kiwang adhok kanong paklang hel pulo, “Anang longke si-ik arecho Belsabul po do, aro la si-ik arecho parasi anang si-ikyok ujharman. 23Aro la-amun Jisu analiyok anang dung taramsi athenghlan pensi lam thano, “Si-ik ajiu ke si-ikyok pot badi ujhar un?” 24Dakne bak alongri isi abithang adak chilang set-set tene labang alongri chirjap un-eh. 25Aro dakne bak ahem bang chilang set-set, tene labang ahem chirjap un-eh ye. 26Aro si-ik hel abithang adak chingthursi chilang set-set, labang ta aro chirjap un-eh, manta lahel orsi wangman. 27Manta ajakong kido poyok ango bambe tene, kaita anang hem lut dam ke anang bihini chunghupon un-eh; kangnak aphelsi anang hem abihini hel chunghupon det une. 28“Khanangsi ne nali thando, munusi asohel apap aro Arnam yok kapatharak alam kangje ahuwit apap ron une; 29manta inghosi Jiuli-Kangthir yok patharaknge, anangyok ke jatsi ronpi un-eh ye, manta anangke or-eh len apap ado doman”— 30piyok pu tene anali kipu, “Anang long si-ik akangho do.”
Jisu Anang Ai Pen Amusohel
(Mot. 12:46-50; Luk. 8:19-21)
31Laparake Jisu anang ai pen amusohel wango; aro mokol arjap phrongsi, anang dung tolo aro pataram damo. 32Isi rat anang dung komwolsi iningsi kido; aro anali anangyok pulo, “Nang aipe, nang muso aro nangjir hel mokol along do, nangyok nangtaram do.” 33Aro Jisu pu phakngo, “Ne aipe aro ne-korte hel ke ingho te?” 34Aro anang dung chikomwol si kangning abangyok langsi, anang pulo, “Holek si ne aipe aro nemuso hel do! 35Piyok pu tene inghosi Arnam kar-ih alam mainot pone, nemuso, aro ingjirpe, aro ne aipe ta anali lo.”
હાલમાં પસંદ કરેલ:
MARK 3: AMRI-BSI
Highlight
શેર કરો
નકલ કરો
Want to have your highlights saved across all your devices? Sign up or sign in
AMRI KARBI N.T. - AKIMI ANGTON N.T.
Copyright © 2014 by The Bible Society of India
Used by permission. All rights reserved worldwide.
