MARK 11
11
Jisu Nengrongsi Jerusalem Kidam
(Mot. 21:1-11; Luk. 19:28-40; Jhn. 12:12-19)
1Konam anali Jerusalem padungsi, Betphaj aro Bethani along, Olip Anglong adung hlengo apot, anang adun bang-hiniyok thansi tolo, 2aro analiyok pulo, “Nali dung kido rongsoyok damot; aro lajongsi nali kilut amun, nali kaita jatsi karlule ijon noselmurep aso wonsi kibi lalong hlonge; bangpo phlokngot aro wanot. 3Inghone bak naliyok arju, tene nali thanot, “Hemphu kanange do, aro anang jongsi bangpo yok holek yok wan phaknge.” 4Anali damo, duwar amahang mokol along, noselmurep aso ijon wonsi kibi hlongo. Anali bangpo phloksi kido amunsi, 5angkhan lalong karjap phrong hel analiyok pulo, “Nali noselmurep aso soyok phloksi, pot inghol do?” 6Anali Jisu kapathan tol badisi pulo, aro lahel analiyok pawan tolo. 7Laparake lahel la noselmurep aso Jisu adung wano, aro anang labang athak pe hlemo, aro labang athak iningo. 8Ako-ong arat anali pe-rik hel duwar along hlemo, aro kamprek helke bithar along kithu thengpe arwo arorem hel wansi duwar long hlemsi bilo. 9Anang ango aro aphel kidam abangke hangsolsi pu ponhilo,“Pahal nang, pahal nang, ingho Hemphu amen pen wangdo, anang bor-eh chokdo! 10Aro ili sar-lar Dabhit po pot longri wangdo, anangta bor-eh pachoknang! Ethakpe long parklam nang.” 11Laparake anang Jerusalem lut damo aro Arnam ahemyok lut damo; aro ahuwit abihini chighurensi lango, anethulo apot, anang bang kere-hini adun helpen olesi Bethani yok damo.
Dumuru Arongpeyok Jisu Hao Kipi
(Mot. 21:18-19)
12Aphel arni, konam anali Bethani along para olesi wango, Jisu ingchiro. 13La-amun kaholo para arwo pen irong dumuru arongpe thek hlongsi, lalong kicho athe hlonge mene pusi chironsi, lalong damo. Konam adung kihleng ke, arwodet aparke ipum athe hlonghle yongot; piyokte pu tene bangpo dumuru athe kiwang apor kalek. 14Lalong Jisu bangpe arongpe yok pulo, ‘Minon parake kaita nang para jatsi athe pacho hlonghle nang.’ Labang alam anang adun helta arju hlongo.
Jisu Arnam Ahem Kapangthir
(Mot. 21:12-17; Luk. 19:45-48; Jhn. 2:13-22)
15Laparake anali Jerusalem yok wango. Jisu Arnam ahem lut damo, aro Arnam ahemlong kijor-kihrep abangyok mokol pa-ole detno aro ingho lalong nohok kachihole abang ahong, aro wothum kijor kangning anghol hel harlek phrotno; 16aro Arnam ahem asitem kaiyok ta isi apot papon tolte yongo. 17Anang lamthe paklango aro analiyok pulo, ‘Ne hemyok ahuwit ason aphan kapingkit ahem puye puke wiwe-yong ma’? Manta nali bangpo kanghu ahemsi ingholo.” 18Aro konam labang alam bor-bangthe aro kanong paklang abang arjulo, anali Jisu yok pot badi mari une; awak chilangsi dolo; piyok pu tene anali anangyok pherelo; piyok pu tene rat ajaldungsi anang kapaklang hel asombhik hlongo. 19Aro anithulo apotsi, Jisu aro anang adun hel rongpe mokolyok olesi damo.
Dumuru Arongpe Para Kachirli Alam
(Mot. 21:20-22)
20La-aphel arni adap, lahel la-duwar kidamjong amun, anali dumuru arongpe angkur yok kikreng hap thekngo. 21Laparake Pitor po aneng chipurkisi Jisu yok pulo, “Paklang po, langot, nang hao kipi dumuru arongpe kreng hapmo.” 22La-ako Jisu analiyok puphak ngo, “Arnam yok krol; 23khanangsi ne nali thando, nali labang inglong kartulpe ayok than, ‘chingphur not aro langpe long jangdam plupmot,’ aro nali nenglong ihik-bihik wesi, aro nang pot pu, bangpo choknge pune krol, tene labang anangyok chiplange. 24Lasi ne nali thando, nali pingkit amun potsi chihang, labang ahuwit hlongo pune krol, aro bangpo nali choknge. 25“Konam pingkitsi arjapme, nang ihutpen ado penebak ado do tene, pap ronnot, lasi ethakpe long kido nali Apa naliyok ta pap naliron piye.” 26Manta nali pap ron pipe, tene nali ethakpe long kido Apa ta nali pap ado nali ron pipeye.”
Jisu Apharan Alam Karju
(Mot. 21:23-27; Luk. 20:1-8)
27Anali Jerusalem yok wang phakngo. Anang Arnam ahemlong kidamjong amunsi, bor-bangthe, kanong kapaklang, aro kithe-kiding hel anang dungyok wangsi arjulo, 28aro pulo, “Nang pot apharan pensi lamehel abihini tikido? Ingho lamehel katikiyok labang apharan nangyok nangpilo?” 29Jisu analiyok pulo, “Ne naliyok lam imung nali arjudo, nali neyok nethan-phak, aro ne pot apharan pensi lamehel tikido, bangpo naliyok thane. 30Johon po ka-ote baptist ke ethakpe para kiwang ma, ma munusi para kiwang? Neyok nethan not.” 31La-amun anali ihut para ihut lam chipu-prupsi pulo, “Ethakpe para pu, tene anang yok piyok krolkre yongo?” Anang ladisi puye. 32Manta ili “arleng para” pusi punang ma?”— lahel rat ayok kaphere, piyok pu tene ahuwit ta Johon poyok aserengsi ihut turki pusi kikroldet. 33Lasi lahel Jisu yok angpu phakngo, “Hali ke thekthe.” Aro Jisu ta analiyok pulo, “Ne pot apharan pensi lamehel tikido, bangpo ne ta nali thanthe.”
હાલમાં પસંદ કરેલ:
MARK 11: AMRI-BSI
Highlight
શેર કરો
નકલ કરો
Want to have your highlights saved across all your devices? Sign up or sign in
AMRI KARBI N.T. - AKIMI ANGTON N.T.
Copyright © 2014 by The Bible Society of India
Used by permission. All rights reserved worldwide.
