MARK 1
1
Johon Baptist po Kapahar Alam
(Mot. 3:1-12; Luk. 3:1-18; Jhn. 1:19-28)
1Kime-alamthe kicheng ke Arnam Aso, Jisu Khristo. 2Jisoya turki po alo long labadi wido, “Langot, ne ahara po ayok tole, anangsi nang phan duwar honjoknge; 3Ingnam aju kihang-wong asi kipi alam ke ladi: Hemphu aduwar chihonjok, anang duwar long kidam pakeng.” 4Labadisi ingnam along baptist ka-ote po, aro pap kikol aphan neng chipharlep si baptist kachiplang alamthe kaparjupon Johon po wango. 5Aro ajaldungsi Judiya alongri pen ahuwit Jerusalem arleng hel anang dung damsi, abithang apap pomar hoichosi anang parasi Jordan langjonpe long baptist chiplango. 6Minon ke Johon po mihonghang amel ape pensi kachi-ik aro amicheng long areng pen ringkok kachikok aro anang long-chupur pen ingnam piyo alang helsi kicho. 7Anang paharsi pulo, “Neyok jakongchot po nephel wangsi do. Anang keng-op arik chingkuk si kiphlok yokta ne michangche. 8Ne naliyok lang pen baptist otelo, manta anangke Jiuli-Kangthir pen baptist nali ote ye.”
Jisu Baptist Ki-en
(Mot. 3:13-17; Luk. 3:21-22; Jhn. 1:29-34)
9Labang arnike Jisu Galili alongri ahol Najaret para wangsi, Johon po parasi Jordan langjon along baptist chiplango. 10Aro anang lang para thursi kiwang amun, inghun chibhalaksi, aro Jiuli yok ijon wothum badi anang phuthak sunsi kiwang thekngo. 11Aro labang ethakpe para lamthe wango, “Nang nenengdok Aso; nanglong neneng ingsamdo.
Jisu yok Honjat Kilang
(Mot. 4:1-11; Luk. 4:1-13)
12Aro la-amunsi Jiuli po anangyok ingnam ajuyok ponhrolo. 13Anang ingnam ajulong angkol-hini adinyok si-ik para hongjat kipon; aro anang ingnam okpe helpen kido; aro ethakpe atharlon hel anangyok al-eno.
Jisu Galili Long Arnam Asal Kicheng
(Mot. 4:1-11; Luk. 4:1-13)
14Minon ke Johon po yok kinep aphel, Jisu Galili alongri damsi, Arnam kime-alamthe paharo, 15aro pulo, “Apor po chokngo, aro Arnam-alongri adung hetno; neng chipharlep mot, aro kime-alamthe long krolnot.”
Jisu Kataramcheng Adunhel
(Mot. 4:12-22; Luk. 4:14-15; 5:1-11)
16Jisu Galili langpe akung kung kidam jong apor, Simon po, pen anang muso Andriu po yok, langpe along lan kiwarjong thekngo— piyok pu tene anali ok kirhi arleng kido. 17Aro Jisu analiyok pulo, “Ne phel wang dunot, aro ne naliyok arleng kirhi arleng ote ye.” 18Aro jongsi anali lanhel tikango, aro anang phel-phel duno. 19Anang bekso akaholo damsi, anang Jebedi po aso Jems po pen anang amuso Johon po yok thekngo; anali tilong athak lanhel pademsi kido. 20La-amunsi Jisu analiyok taramo; aro anali abithang apo Jebedi po yok sal-katiki arleng hel pen tilong along tikango, aro anang aphel duno.
Si-ik Ajiu Kachu-u Arleng
(Luk. 4:31-37)
21Anali Kaparnaum yok damo; aro anang konam kisang-arni wanghlengo, anang Arnam ahem lutdam aro lamthe paklango. 22Anali anang kapaklangpo arleng hel asombhik hlong detno, piyok pu tene anang kanong-paklang hel badike kalek aro ihut apharan kido badisi analiyok paklango. 23Lalongsi laparake anali Arnam ahemlong si-ik kihap ihut arleng kido, 24aro anang hangwongsi pulo, “Ei nang Najaret Jisu, nang halipen pot asal do? Nang hali yok kapangho yoksi wango ma? Nang inghosi neke than undo, nang ihut Arnam Kangthir po. 25Manta Jisu anangyok tamsersi pulo, “Dositne do, aro anang para wang ole!” 26Aro la si-ik ajiu, anangyok huweng retno aro klem phlak phlaksi pahang-wongsi, anang para wang olelo. 27Anali ahuwit asombhik hlong, aro anali sitem ihut para ihutyok chirju prupsi pulo, “Bang po ke pot te? Isi akimi paklangdo— Anang si-ik yokta apharan pen thando, aro anali ta anangyok mengdo.” 28La-amun jongsi Jisu katiki amen-anang Galili ahol chitha-ang detno.
Simon po Ahemlong Jisu Ako-ong Kiso Kapame
(Mot. 8:14-17; Luk. 4:38-41)
29Anali Arnam ahem para wang-ole penpan, Jems po aro Johon po pen, Simon po aro Andriu po ahemyok lut damo. 30Minon ke Simon po anipe asesi ihlapsi kido, aro anali la-amunsi anang lam Jisu yok pulo. 31Jisu adungyok wango, aro anangyok ari-otno aro pangthuro. Laparake anang long ase ham detno, aro arlengpe analiyok al-eno. 32La-arni anithu, arni chelo apot, arleng hel ahuwit kiso-kilak lale si-ik kihap helyok anang dungyok wano. 33Aro rongpe long ahuwit arleng hem owalong wang chingrumo. 34Aro anang ajat-jat kiso hel pamelo, aro anang ako-ong si-ik ujharo; aro anang si-ik helyok lamthe pathan hlonghle yongo, piyok pu tene anali anangyok chini uno.
Galili Long Arnam Alam Kapahar
(Mot. 4:23-25; Luk. 4:42-44)
35Adap prang, ingting rim kido amun, anang ingthuro, aro nisot-jot athem yok damo, aro anang pingkitno. 36Aro Simonpo aro anang alokjor hel anang phel duno. 37Konam anali anangyok pahlongo, anali anangyok pulo, “Abangten nangyok nang bisardo.” 38Anang pulo, “Ili adung arel kido prek-prek rongso helyok damsonang, ladisi ne lalong ta lamthe pahar nange; piyok pu tene la aphansi ne olesi wango.” 39Aro anang ahuwit Galili alongri damo, anali kachirdom ahem hel artingsi lamthe paharo, aro si-ik helyok ujharo.
Arje-ibeng Kiso Arlengyok Kapame
(Mot. 8:1-4; Luk. 5:12-16)
40Ihut arje ibeng kiso Jisu adung wango, aro anang angot tarhuksi Jisu yok pulo, “Nang aneng do, tene nang neyok pangthir une.” 41Kajinso wangsi, Jisu ari-jongsi anangyok otno aro anangyok pulo, “Ne aneng do; ingthir phlen not.” 42Lajongsi arje ibeng kiso damo, aro anang ingthirsi melo. 43Aro Jisu anangyok than klaksi, la-amunsi anang yok tolpen pano, 44anang pulo, “Chilang, kaiyok ta jat thanek; manta damot, nang bithang bangthepo ayok chipaklang damot, aro analiyok hakhi kipi aphan, Mosi po kithan badi kachipangthir aphan, nibot pidamot. 45Manta anang olesi damo aro neng wak phlensi thanno aro ladi lamthe pachitha-ang pono, la-amun Jisu rat ango chiklangke isi arong along lutdam un-eh si, mokol along nisot-jot athem long dolo; aro labang angbong arleng chikomwolsi anang dung yok wango.
હાલમાં પસંદ કરેલ:
MARK 1: AMRI-BSI
Highlight
શેર કરો
નકલ કરો
Want to have your highlights saved across all your devices? Sign up or sign in
AMRI KARBI N.T. - AKIMI ANGTON N.T.
Copyright © 2014 by The Bible Society of India
Used by permission. All rights reserved worldwide.
