wandījo 2
2
Lūshikū lwa mpungatī
1Hūna lūūlū, ī ligūlū nī sī shūbiza shamala ū kūbeejiwa, na a mabità gose ayo galīmo. 2Ū mu lūshikū lwa mpugatī, ū Mulungu ūsangwa wamalile ū kūtūmama; hūna lūūlū wifuula ī milīmo yakwe pyī ī yose. 3Ū Mulungu ūlūfuuha ū lūshikū lwa mpungatī, ūlweeja; nguno ū mu lūshikū lwenūlo akifuula pyī ī milīmo yakwe īyo akabeeja mu kaseemele kakwe.
Munhū kūtūūlwa mu ngūnda
4Ū būsombooji ūbū būlī bo mihayo ya shiseeng'wa sha ng'wigūlū na mu sī gīt'umo shikabeegejiwa.
Ū SEEBA Mulungu aho wamala kūseema ī sī nī ligūlū, 5shaalī shitīho sha kūzwa mu matogolo; ī sī yalī ītī na ntī nūūlū gūmò, nguno ū SEEBA Mulungu walī ataalī ū kwīyīta ī mbula ītūle a ha sī. Hama nīyo walī atīho munhū wa kwīlīma ī sī. 6Gwike jalīho nzwīlo#2:6 Nzwīlo: Nūūlū, ikūngūkū. jenhaga minzī kūfuma mu gatī ya sī, bobiza ho būdoto a ha sī. 7Hūna lūūlū ū SEEBA Mulungu ūmeeja munhū kūfuma mu malongo ga ha sī; ūng'haahīla myūyī ya būpanga ū mu mūūlū gakwe ū munhū ng'wenūyo, ūbiza mpanga. 8Ū SEEBA Mulungu walī wagolanya ngūnda ipandī lya kīya, mu Edeni; ūntūūla ng'wenūmo ū munhū ūyo akamūmba. 9Na lūūlū, ū SEEBA Mulungu wīyinha ī sī būdūla bo kūzwisha mitī ya būlī mbika; mitī misoga kūlola, na yawiza kūlyiwa. A ha gatī ya ngūnda ūtūūla ho ntī gwa būpanga, na ntī gwa kūmana misoga na mibi. 10Mongo gwahūūmaga kūfuma ū mu Edeni gwitīīla minzī ū mu ngūnda. Nīyo ū mongo gwenūyo gwalī gūgabanīkile matambī anè, kwīngīīla haho henaho yilonga myongo īnè. 11Ū go kwandya ū mu myongo yenīyo ī lina lyago gwalī Pishoni, gwalī gūbītīlile mu sī ya Havila, sī ya zahabu; gūūbīta ū mu sī yenīyo gūkūtūlaga kuluba, kūshisha gūūkafuma. 12Ī zahabu ja mu sī yenīyo jalī niza no, jalīmo na delamu#2:12 Delamu: Nūūla ga mitī milebe īkanung'haga chiza, gakabeejiagwa na būgota. na lapisi lazuli.#2:12 Lazuli: Mawe malabagīzu gakasīmbagwa ha sī mu sī jimò na jimò. 13Ū go kabīlī gwitanagwa Gihoni, nū gwene gwalī gūjile gūkūtūlaga kuluba kūbītīla mu sī ya Kushi#2:13 Kushi: Bangī bahayile yalī Mesopotamia ya dakama. 14Ū gwa kadatū gwitanagwa Hidekeli, ū goyi gūtūlile kuluba kūja kīya ya sī ya Ashulu. Lelo ū gwa kanè gwalī Flati.
15Ū SEEBA Mulungu ūnsola ū munhū, ūntūūla ū mu ngūnda gwa Edeni gīkī ayūgūlīma na kūgūlang'hana. 16Hūna ū SEEBA Mulungu ūnagīla ū munhū alīhaya gīkī, “Ūdūgije kūlya matwajo ga ntī gose gose ū mu ngūnda. 17Alīyo yaya ū kūgalya a matwajo ga ntī gwa kūmana misoga na mibi; nguno ūlū ūūgalya ūkūcha gete!”
Ngosha kūpandīka nke
18Hūna ū SEEBA Mulungu ūhaya gīkī, “Ītī yawiza ū ngosha ikale iyene, nakūmeegeja ng'wiye wa kūngunanha.” 19Ū SEEBA Mulungu walī wamala kūbeeja kūfuma mu malongo ga ha sī, pyī ī shiinū ja mu matogolo, nī noni ja higūlya. Hūna lūūlū wandya kūjenha ū kūlī Adamu gīkī abone a mina ayo akūjinha; ū Adamu ūmo akashitanīla būlī shiseeng'wa, ī lyenīlo hū līkabiza lina lyasho. 20Na ng'hana ū Adamu ūjinha mina pyī ī mitugo, nī noni ja hape, hamò nī ndimu, nī shiinū ja mu matogolo. Alīyo ū Adamu atapandīkile ng'wiye wa kwigeleelwa kūngunanha. 21Hūna ū SEEBA Mulungu ūnaalīkīja ū Adamu tūlo nhaale. Aho alaalile ūng'wīngīja iguha līmò lya mu lūbazu, ūtūūla maanda a ha ng'wanya ūyo gūkalekwa. 22Ū SEEBA Mulungu ūlībeeja nkīma ī liguha lya lūbazu īlo akang'wīngīja ū Adamu, hūna ūng'wenha ū nkīma a halī Adamu. 23Ū Adamu ūhaya gīkī,
“Ūyū ng'wene iguha lya mu maguha gane,
na mīlī gwane nene ng'wenīkīlī gete;
akwitanwa ‘nkīma;’
nguno afumile mulī ngosha.”
24Kūlwa nguno yenīyī, ū ngosha akūbaleka a ba ise na nina adimane na nke wakwe; ū mu būbīlī wabo bakūbiza mīlī gūmò. 25Ū Adamu nū nke baalī dūūhū, alīyo baalī batī na minala.
હાલમાં પસંદ કરેલ:
wandījo 2: SUKBI15
Highlight
શેર કરો
નકલ કરો
Want to have your highlights saved across all your devices? Sign up or sign in
Sukuma Bible © Bible Society of Tanzania, 2019.