Luka 22
22
Yenga ya Elambɔ ya BaYuda
1Elambɔ ya lituma yayäkä tina, yao lotangomo Elambɔ ya Lieti. 2La kanga ebieti la batikasa loluka fofe yool’Inde; nde iyo lowanga to bato. 3Limɔ Satana lɔɔtɛlɛ botema wa Yudasi wa Keliote oyatangomökö ɔmɔi wa eba liu la ambale. 4Inde lɔkɛ okaongane la kanga ebieti la betoli oso ya basilikani litina mbo awambeke Yesu end’iyo. 5Iyo loomala finɛ, la iyo lotikel’inde lisakä liofaef’inde bieto. 6Yudasi lokulia loasɔ la inde lolukä fofe yowamba Yesu ani ekuke ya bato etiyale lau.
Elambɔ ya BaYuda
7Limɔ lise lia elambɔ ya lituma loya, eloaakä lau ndoola bɔkɔkɔ wa Lieti. 8Yesu lotoma Petelo la Yoane, Inde mbo— Kɛndɛkɛ okakomyel’iso Lieti mbo toleke liao. 9Iyo lofel’Inde mbo— Olɛmbi mbo tokomyeke liao anima? 10Inde loonga lau mbo— Toka, akaɔtɛk’ino nda okenge, lamao ototowana la botolome oyatoli tɛi ya balia, tutak’inde nda ndakɔ eyekaɔtɛk’inde. 11Limɔ ino koonga la ngɛnɛ wa ndakɔ-ao mbo— Boekesi asoonga laɛ mbo ¿Kuku ya ndakɔ eyetola’mi Elambɔ ya Lieti amamwito la baeki bami, anima to? 12Limɔ boto-ao atotamb’ino kuku efi ya likolo eyesotonjomo la baonga, komyielak’iso omao. 13Iyo lɔkɛ, iyo lɔɛnɛ kwa aongiki Yesu lau, iyo lokomya Elambɔ ya Lieti.
Elambɔ ya Bɔkɔta
14Ayäkä mbile ya bieka, Inde loyala se amamwito la batomomu liu la ambale, 15Inde loonga lau mbo— Ko la yɛmɛ efi, ilɛmbi nde ndola Elambɔ-ye ya Lieti oso wa tokange etokokeke’mi; 16isoonga nde lanu mbo— Itialek’imɔ liao kond’akakɔchɔmɔkɔ litina lia liao nda Bɔkɔta wa Mungu. 17Limɔ Inde loaela kɔpɔ, Inde lofa Mungu kelekëlë, Inde mbo— Ɔsɔkɔ yao, kaelanaka yao, ino angɛnɛ; 18eoka itoonga lanu mbo— Itiamwe imɔ liamɔ lia boliki kond’akayeke Bokota wa Mungu.
19Lamao Inde lɔɔsɔ lituma, Inde lofa Mungu kelekëlë, Inde louna liao la Inde lofaef’iyo liao, Inde mbo— Liende bindo yami, ebifomu loasɔ loanu, kelaka ani ndoenyekela’mi. 20Inde lɔɔsɔ imɔ ko kɔpɔ ongoma mbisa yola, Inde mbo— E-kɔpɔ-ye yende Ngela Eyai eyetinyomu la bakila bami, ebatosendɔlɔmɔ eoka yanu.
21Tɛnɛ ngo! Bosamba wa ona oyatowamba’mi bole eya amamwito lami nda lionga. 22Wana wa Boto atɔkɛ okakɛ kwa atomökö loaso loande, nde aeko wale ende boto ona oyatowamb’Inde!
23Iyo loakola ndofelakana, iyo angɛnɛ, mbo ndai wau oyakakeleke eloasɔ-lo. 24La iyo lowesakana imɔ mbo ndai wau atotangomo ewoeta ebamɔi. 25Nde Yesu loonga lau mbo— Bɛkɔta ya biese yasi batokakales’iyo la eb’isosha likolo liau batotangomo mbo Bakelaolau. 26Kongo ko loti ongoma end’ino; nde oyo wanu oyaetami, ambo inde ayaleke kwa itungangɔlo, la botoli oso wanu, ayaleke kwa bosali. 27¿Ndai to nd’atolongela, kwa inde oyatoyala se nda bieka kwa inde oyatokuwekel’inde nda lionga? Ati inde oyatoyala se ndola bieka? Kongo ko Imi yende sisi yanu kwa oyatokuwel’ino.
28Wende to ebasoumwaka lami nda bakɔtɔlɔmu bami; 29ongoma Imi nd’atof’ino isosha, kwa Sango wami nd’afäkä Imi Bɔkɔta, 30mbo ino boleke la bomweke nda lionga liami nda yakakaelo yami ya Bɔkɔta la ino bolayalaka nda kangala y’isosha ndokomya tukela liu la imbale ya BaIsalaele.
31Simona, Simona, toka, Satana asofelak’ino mbo afɛfɛk’ino kwa atofɛfɔmɔkɔ bofonga, 32kongo ko Imi nd’asosombola Mungu loasɔ loaɛ, mbo liimeli liaɛ litalewa, la akakalanganek’aɛ, wakɔkɔmɛsɛkɛ basaɔ baɛ. 33Petelo loonga lande mbo— Ngɛnɛ, yengani ndɔkɛ amamwito laɛ, angoko nda bɔnyɔlɔlɔ, ango nda liwa. 34Yesu mbo— Petelo, Imi nd’asoonga laɛ mbo kɔkɔ angotata lɔkɔ̈kɔ̈lɔ̈kɔ̈ louse-lo, oso ani okaanganyi’mi baanganya basatɔ mbo otiluwe’mi.
35Inde loonga lau mbo— ¿Atomäkä’mi ino lɔkɛndɔ angwɛnɛ litanga lia bieto, angwɛnɛ buku, angwɛnɛ tokwaka, waenökö nde yeka angɔmɔi? Iyo mbo— Totiaenöko yeka angɔmɔi. 36Inde loonga to lau mbo— Nde kwani, oyale la litanga lia bieto, ɔsɛkɛ liao la buku imɔ lisanga; nde oyati la chaka, atambeseke bisinda yande mbo asombeke ɛmɔi. 37Eoka isoonga lanu mbo biengani mbo yao ebiatomökö nda Lokasa bilakɔkɔmɔkɔ lami, biko mbo— Atangomökö nde ɔmɔi w’eba totefola twa bikela; eoka eyami bikɔchɔmɔkɔ nde. 38Iyo mbo— Ngɛnɛ, tɛnɛ to chaka bimbale-bi! Nde Inde loonga lau mbo— Sɛlɛkɛ eya!
Elanga ya Ngetesemane
39Akuswäkä Yesu, Inde lɔkɛ nda löngo loa Elaya, kwa akɛk’Inde lise la lise la baeki bande lotut’Inde. 40Iyäk’Inde nda elanga, Inde loonga lau mbo— Sombolaka mbo otakwa nda lisoshelomu. 41Inde lɔkɛ sumbu isisika lau, kwa atokɔkɔlɔ okushomo lisasɛ, amao Inde loswa balui se, Inde losombola mbo— 42Sango, bosanga ongoma, sokoelaka’mi ekɔpɔ-ye, inga to lisangi liami, kangä eliaɛ likelomoko. 43Lamao bokitomo oyasekwi nda use lɔɛnɛlɛ end’Inde, inde lɔɔlɛsɛ Yesu bofoka. 44Ayalak’Inde la bonui wa likama, Inde losombokola la bofiimbi, la bilungu lotɔnɔkɔ se nda nyɛlɛ kwa baongö ba bakila.
45Emaläk’Inde mbisa ya lisomboli, Inde lɔkɛ ende baeki bande, Inde loosh’iyo baingali ilɔ sha ikɛnɛnɛ; 46Inde loonga lau mbo— ¿Oingali nde moni? Emalaka la sombolaka mbo otaɔtɔ nda lisoshela.
Liwambomu la liundomu lia Yesu
47Aäkä Inde atoonga, kwaamao, ekuke ya bato loya amamwito lande oyatangomu Yudasi, ɔmɔi w’eba liu la ambale, inde lotol’iyo oso; inde losishana la Yesu okaumb’Inde ichɔu. 48Nde Yesu loonga lande mbo— ¿Yudasi, ko la ichɔu otowamba nde Wana wa Boto?
49Limɔ ɛnɛ̈kɛ̈ ebakɛsɛni lande loaso eloyi oko tina, iyo mbo— Ngɛnɛ, Tosw’iyo la ambɔtɛ? 50Ɔmɔi wau loswa bɔkɔwa wa kanga eyeti, inde lotena litoi liande lia fangi y’olome. 51Yesu mbo— Taofe, macha eya! Inde lomata litoi, Inde losäsesa liao.
52Limɔ Yesu loonga la kanga ebieti la betoli oso ya basilikani ba ndakɔ ya Mungu la biange ebayäkä oyundes’Inde, Inde mbo— ¿Oyeli nde’mi la chaka la totumbe, kwa mbo yende booni? 53Ayaläkä’mi lanu lise la lise nda ndakɔ ya Mungu, otisisheke’mi besamba yanu; kongo ko mbile-ye ende fofe yanu la eya bofoka wa lilima.
Lianganyi lia Petelo
54Iyo loundesa Yesu, iyo lɔkɛs’Inde nda ndakɔ ya kanga eyeti; nde Petelo lotuta esika. 55Anesäk’iyo bösä atiteni ya lɔ̈mbɔ, iyo loyala se la Petelo loyala se amamwito lau. 56Nde boseka ɔmɔi lɔɛn’inde ani ayali se nda liangangi lia bösä, la boseka losw’inde bonono, limɔ inde mbo— Oyo imɔ ayaliki lande. 57Nde Petelo loanganya mbo— Botomali, itiluwe Inde. 58Mbisa ya mbile sinyo, wasi lɔɛnɛ inde, inde mbo— Aɛ imɔ wende ɔmɔi wau. Nde Petelo mbo— Boto, iti wau. 59Mbisa ya saa ɛmɔi, boto wasi loonga la boliliya mbo— Wewe, la boto-yo ayaliki imɔ lande, la ale imɔ wa Ngalilai. 60Kongo ko Petelo loonga mbo— Boto, itiluwe elosoonga aɛ. Kwaamao, ani Petelo akoonga, kɔkɔ lota lokɔ̈kɔ̈lɔ̈kɔ̈. 61Ngɛnɛ lokikwa, Inde lotichaka Petelo, lamao Petelo loenyela lioi eliaongäkä Yesu lande, mbo— Oso ani kɔkɔ ekati lɔkɔ̈kɔ̈lɔ̈kɔ̈ louse-lo, otoanganya’mi baanganya basatɔ. 62Inde lokuswa lousa, inde lolela kɛlɛlikɛlɛli.
63Limɔ batolome ebaundäkä Yesu lomuchamucha Inde, iyo lokuchak’Inde; 64limɔ alinjäk’iyo baiso bande, iyo lofelak’Inde mbo— Tɔndɔlɔkɔ; ¿Oyo ndai oyasokuch’Aɛ? 65Iyo losungakel’Inde la baoi basi wike.
66Atwäkä bonyanya, limɔ biange ya bato la kanga ebieti la baekesi ba Bikela losɔngɔkɔmɔ la iyo lɔkɛsɛ Yesu nda ikumbɛ shau, limɔ iyo mbo— 67Eya mbo wende Masiya, kambesaka to iso. Inde loonga to lau mbo— Yekambes’ino, ino angoimela; 68yefelak’ino, ino angomutoela’mi. 69Ko kwani Wana wa Boto eyalaka se nda bosamba w’olome wa bofoka wa Mungu. 70Batotina loonga mbo— ¿Aɛ wende to Wana wa Mungu? Inde loonga lau mbo— Ino nd’aongi mbo yende ongoma. 71Limɔ iyo mbo— ¿Twende imɔ la boeno wa tɔtɔmbɔ twasi? Iso angɛnɛ, tosooka ko nda bɔnɔkɔ wande angɛnɛ.
હાલમાં પસંદ કરેલ:
Luka 22: NTKE58
Highlight
શેર કરો
નકલ કરો
Want to have your highlights saved across all your devices? Sign up or sign in
Le Nouveau Testament in Kele (Lokele) © British and Foreign Bible Society, 1958, 2019.
