Yoane 7
7
Liɛngɔ lia bitungani yande
1Mbisa yamao, Yesu akɛndɛkɛndɛ̈kɛ̈ nda Ngalilai; atilɛmbɛkɛ okɛndɛkɛndɛ nda Yudea eoka BaYuda loluka fofe yool’Inde. 2Nde Elambɔ ya BaYuda eko eya Kumbo loya tina, 3eokao bitungani yande loonga lande mbo— Sokwaka nda yese-ye, kɛndɛkɛ nda Yudea mbo baeki baɛ omao bɛnɛkɛ ebitokelak’Aɛ, 4eoka boto oyalɛmbi ndoluwana fololo, aitokelaka likuwa liande wisakumbo. Bokela yao, ɛnɛsɛkɛ Aɛ angɛnɛ nda wenda fololo. 5Eoka bitungani yande angɛnɛ bitiimelek’Inde. 6Yesu loonga to lau mbo— Yose yami ekayi kɔni, nde eyanu yengani mbile la mbile. 7Bato ba wenda batikɔkɔlɛ ndoiyana lanu, batoiya nde Imi eoka Imi nd’atokambes’iyo wewe mbo bekeeli yau bende ibe. 8Ino kɛndɛkɛ nda Elambɔ, Imi ititakɛ kɔni nda Elambɔ-ye eoka mbo yose yami ekiiyeli kɔni. 9Aongäk’Inde ongoma ani Inde loyala kɔni nda Ngalilai.
Yesu lɔkɛ nda Elambɔ ya Kumbo
10Nde asiläkä bitungani yande ndɔkɛ Yelusaleme nda Elambɔ, limɔ Inde imɔ lɔkɛ, inga to fololo, kangä wisakumbo. 11BaYuda loakola ndoluk’Inde nda Elambɔ, iyo mbo— ¿Boto ona ale to anima? 12Bato ba bikuke angɛnɛ loimaima finɛ loasɔ loande; bamɔi loonga mbo— Ale boto olau. Nde basi mbo— Mba, atolimbaka bato! 13Kongo ko angwɛnɛ boto woonga loasɔ loande fololo eoka bawangi nde BaYuda.
14Lise limɔi atiteni ya Elambɔ, Yesu lɔkɛ nda Ndakɔ ya Mungu la Inde loakola ndoekekesa bato ina. 15Eokao BaYuda lomwaala, iyo mbo— ¿Boto-yo aluwi nde kasa la moni ani atiayaläkä boeki wewe? 16Eokao Yesu lomutola lau mbo— Eliami liekesi-li liti liami angɛnɛ, kangä lia Oyatomäkä’mi. 17Boto esanga nde ndokela lisangi lia Mungu, atoluwa kwa mbo liekesi liami liende lia Mungu, kwa mbo isoonga l’isosha shami angɛnɛ. 18Oyatoekesa la isosha shande angɛnɛ, ona atoluka tala yande angɛnɛ; nde oyatoluka ko tala ya oyatomäk’Inde, ona ale wewe; atitefole Bikela. 19¿Ati Mɔsɛ oyafäk’ino Bikela? Nde angwɛnɛ angɔmɔi wanu oyatolitesa Bikela. ¿Ɔlɛmbi nde ndoola’mi eoka iye to?
20Bato ba ekuke loonga mbo— Wende la bolimo obe; ¿Ndai alɛmbi nde ndool’Aɛ? 21Yesu lomutoel’iyo mbo— Likuwa limwito kongo elikeliki’mi, la batotina banu basomwaala; 22Mɔsɛ afäk’ino liteni lia itombe (nde litiäkä elia Mɔsɛ, kangä elia batata banu) la nda lise lia yenga ototena boto itombe. 23¿Boto etenomo to itombe la lise lia yenga mbo Bikela ya Mɔsɛ bitatefolomo, ino ososomaka lami moni ani isosäsesa bindo bitotina ya boto la lise lia yenga? 24Watëke loasɔ faufau, kangä la liengani lilau!
25Bato bamɔi ba Yelusaleme loonga mbo— ¿Mbo oyo ati Inde oyatoluka bamɔi mbo bolek’Inde? 26Tɛnɛ ngo, atonangola fololo, nde baitoonga lande lioi. ¿Ende to wewe mbo Bekumi nd’aluwi mbo Oyo ende Masiya? 27Nde toluwi olo asokwi nde boto-yo, nde akayeke Masiya, angwɛnɛ boto woluwa olo akasokwek’Inde.
28Eokao Yesu loanjanja nda liekesi liande nda Ndakɔ ya Mungu, mbo— Oluwi nde Imi la oluwi imɔ olo asokwaka’mi, la itiye la isosha shami angɛnɛ, kangä la shao sha wewe sha Inde oyatomäkä’mi, ino angoluw’Inde. 29Imi nd’aluw’Inde, eoka isokwi nde end’Inde la Inde nd’atomi Imi.
30Limɔ iyo loluka fofe yound’Inde nde angwɛnɛ boto wotel’Inde bosamba eoka lisho liande likayi kɔni. 31Nde bato wike lolendelo Inde, iyo mbo— ¿Akayeke Masiya, ekelaka nde ndembe ya tolombo yolongela yao ebisokela boto-yo? 32BaFalusi looka ani atoimaimaka bato loasɔ loande, limɔ kanga ebieti la BaFalusi lotoma benyafala ya betingani mbo baundesek’Inde. 33Limɔ Yesu loonga mbo— Ko mbile sinyo kongo itoyala lanu lamao itɔkɛ end’Inde oyatomäkä’mi. 34Bolukaka’mi nde otiɛnɛkɛ’mi; la olo atoyalaka’mi ino angokɔkɔlɔ ndoiya omao. 35Eokao BaYuda loongana mbo— Boto-yo asangɔkɛ to anima mbo iso angoosh’Inde? ¿Atɔkɛ to ende ebasomelana okalimela nda yese ya BaHela, okaekesa BaHela omao? 36¿Lioi-li moni eliongi nd’Inde mbo— Bolukaka’mi nde otiɛnɛkɛ’mi; la olo atoyalaka’mi ino angokɔkɔlɔ ndoiya omao?
Balia ba Loiko
37Nda lise lia liko lia Elambɔ elile lise lifi, Yesu loemakala, inde loanjanja mbo— Boto eoka yɛmɛ yomwa ayeke to ende’mi la amweke. 38Oyatolendelo’mi, baande ba balia ba liwawi bechaka nde okuswa nda botema wande, kwa aongäkä Lokasa loa Mungu. 39Ongoma, Yesu loonga loasɔ loa Bolimo ebokaɔlɛkɛ ebatolendelo Inde, eoka Bolimo bokafomu kɔni ende bato, eoka Yesu akaɔli kɔni tala yande. 40Okäkä to bamɔi ba ekuke ebaoi-ba, iyo mbo— Wewe, Oyo ende Bɔtɔndɔli. 41Bamɔi mbo— Oyo ende Masiya. Nde basi mbo— ¿Mbo Masiya atosokwa nda Ngalilai? 42¿Lokasa loa Mungu lotiaongäkä mbo Masiya eotomoko nde nda bɔkɔ̈kɔ wa Dawidi, nda bokenge wa Betelehemu, ewayaeläkä Dawidi? 43Eokao bato ba ekuke angokulyana loasɔ loande; 44bamɔi bau balɛmbɛkɛ ndoundes’Inde, nde angwɛnɛ boto wotel’Inde bosamba.
45Benyafala ya betingani loinwa to ende kanga ebieti la BaFalusi, iyo loonga lau mbo— ¿Monito otiesh’Inde? 46Benyafala lomutola mbo— Angwɛnɛ ango oto woonga kwa asoonga eboto-yo. 47Eokao, BaFalusi lomutoel’iyo mbo— La ino imɔ osolimbakomo? 48¿Oni to wa bekumi kwa wa BaFalusi oyasolendelo Inde? 49Kongo ko bato ba ekuke-ye batiluwe Bikela, basosendomo bieo! 50Nikodemo (ako inde oyaɛkɛ ende Yesu oso la ocho) oyaäkä ɔmɔi wau, inde loonga mbo— 51¿Bikela yasu bitofa nde oto se, oso ani totitaoke ani atoong’inde, la ndoluwa ebitokel’inde? 52Iyo lomutoel’inde mbo— ¿Laɛ imɔ wende wa Ngalilai? Tatangaka nda Lokasa, wɛnɛ nde mbo angwɛnɛ Bɔtɔndɔli bokuswa nda Ngalilai. 53Limɔ iyo lomelana oto la oto ko nda ndakɔ eyande.
હાલમાં પસંદ કરેલ:
Yoane 7: NTKE58
Highlight
શેર કરો
નકલ કરો
Want to have your highlights saved across all your devices? Sign up or sign in
Le Nouveau Testament in Kele (Lokele) © British and Foreign Bible Society, 1958, 2019.
