Génesis INTRODUCCIÓN
INTRODUCCIÓN
“Génesis” ekteme “Eyeynókxa”. Xeyenmeyk Génesis apteme wánxa xama Dios, ektáha axta apkelane ekyókxoho aqsok ekhágko nak, axta han exnéssamók Dios apkelane aqsok nawha'ák ma'a aptémakxa nak énxet ekha kéláyo, aphéssamók axta m'a aptémakxa nak, apméssegkek axta han yaqwayam elanha keso nélwanmégkaxa. Xeyenmeyk han énxet'ák Israel ma'a Génesis. Cháxa énxet'ák nak Dios axta apkelyéseykha aptéma apagkok, aphéssamók axta mók apkelpaqhetchásamákpoho. Awanhek axta eyke melaqhémo énxet'ák apheykha nak keso náxop, apkenagkamchek axta exámokmak dios. Xeyenmeyk eyke Génesis apteme wánxa xama Dios, ektáha axta apkelane énxet, kelán'a, tén han ekyókxoho aqsok.
Apchásekhayo axta keñamak Dios énxet tén han kelán'a, apméssama s'e xapop nak yaqwayam enxoho chá'a kalpeykessásekxak awáxok, yaqwayam enxoho kaltaqmelchesek tén han kalcheygkok, élyahákxoho enxoho chá'a m'a appeywa, élxénáncha'a enxoho aqsa chá'a awáxok wánxa m'a Dios. Xeyenmeyk han aqsok ekmaso tén han nenlegeykegkoho ekteyapma keso náxop, eñama énxet tén han kelán'a élyamasma m'a Dios, ekmáheyo kalanagkok ma'a ekmámenyého ancha'awo nak kalanagkok. Chaqhegkek axta apwáxok Dios xa, keñe apkelenxáneykmo elmallahanchesek xa aqsok ekmaso nak.
Egwanchek anxének Génesis ekteme ánet kélexpánchesso eknaqtáxésamaxche. Xama eknaqtáxésamaxche eyeynamo 1 ekweykmoho 11, ekxeyenma nak ektémakxa élánamáxche ekyókxoho aqsok, tén han énxet. Keñe han ekxeyenma ekteyapma aqsok ekmaso tén han nenlegeykegkoho keso náxop, tén han ma'a Adán axta aptawán'ák neptámen ekweykekxoho m'a Noé axta. Xeyenmeyk han ma'a mámeye ekwányam axta, tén han ma'a tegma néten apwenaqte Babel axta.
Keñe m'a ektáhakxa nak ánet eknaqtáxésamaxche eyeynamo 12 ekweykekxoho 50, ekxeyenma m'a énxet'ák Israel apkelánteyapma apkeleñama m'a Abraham, Isaac, tén han Jacob. Apkeltennassegkek axta Dios egkések xapop ma'a Abraham, apkeltémo etyapok ma'a apkeñémekxa axta. Apkeltennassegkek axta han elmések apxámokma apagko' aptawán'ák neptámen, apxeyenma han Dios etaqmelchessesek apheykha apyókxoho pók aptémakxa énxet'ák eñama apxeyenmakxa axta etnéssesek ma'a Abraham. Xeyenmeyk han ma'a Jacob axta apketchek, José tén han apkelpepma, tén han ektémakxa axta Jacob yetlo aphawóxama apkelmaheykegko m'a Egipto. Cháxa eyeynamókxa axta han apxámagwayam ma'a énxet'ák Israel.
Negwet'ak han ekxeyenma Génesis eñássesagkohok chá'a Dios ma'a énxet ekmaso nak aptémakxa. Keñe m'a énxet'ák apkelyaheykekxoho nak, tén han apchásekhayo nak, elmeyók chá'a ekwa'a enxoho ekhem ekmaso, enaqlawha chá'a, tén han epasmok. Apxeyenmeyk han énxet'ák Israel megkalwánaqmék chá'a, tén han eltaqmelchesek élxénwákxoho enxoho chá'a apkelwáxok ma'a ekhémo mók apkelpaqhetchásamákpoho nak.
Génesis agwetak se'e aqsok nak:
1. Ektémakxa axta sekxók élánteyapma aqsok 1.1—2.25
2. Énxet'ák melya'assáxma tén han nenlegeykegkoho 3.1-24
3. Ektémakxa axta apha Adán ekweykekxoho m'a aphakxa axta Noé 4.1—5.32
4. Ektémakxa axta apha Noé 6.1—10.32
5. Tegma néten apwenaqte Babel 11.1-9
6. Ektémakxa axta élánamáxche aqsok aphamakxa axta Sem ekweykmoho m'a Abram axta 11.10-32
7. Ektémakxa axta apha Abraham, Isaac, tén han Jacob 12.1—35.29
8. Esaú axta aptawán'ák neptámen 36.1-43
9. Ektémakxa axta apha José yetlo apkelpepma 37.1—45.28
10. Énxet'ák Israel apheykegkaxa axta Egipto 46.1—50.26
હાલમાં પસંદ કરેલ:
Génesis INTRODUCCIÓN: ENXBI
Highlight
શેર કરો
નકલ કરો
Want to have your highlights saved across all your devices? Sign up or sign in
Enxet Lengua Sur Bible © Paraguayan Bible Society, 2015.