MAFIYU 3
3
Bataize‐ɣɛɛ Jɔ̃ na Gala goo‐wogai
1Na maziɛ su Bataize‐ɣɛɛ Jɔ̃ vaani yíɛ Gala goi wo kpooʋei zu Yudiiya yui zu. 2É ɣɛni ɣɛɛzu tea, “A wulu ɣaa ʋe wa ʋaa yowũitiɛ va, toku ge zei ga Gala ta masadai maa ƃuovɛ sa.” 3Jɔ̃ ɣa Gala daa woo‐wo nui Aizeea ƃɔɛni é vile ba yíɛ ɣɛ tea,
“Nu ta ɣa lobasu kpooʋei zu yíɛ bo ga
‘A de maliɣii na pelei ɣavele ƃɛtɛ.
A ná pelei lete to.’ ”
4Tɔwɔ seɣei Jɔ̃ ɔ́ tɛ ma kpɛtɛi ɣɛ ga suoi daa ga “keeamɔ” maleɣai yíɛ zaama ɣili ga suo wɔlɔ zaama‐ɣili. Koto kpɔga kõei gulo ɣa te ɣɛni ga kɔ̃nɔgi. 5Yɛlusulɛɛ veaitiɛ te liini pɔ́, Yudiiya vea ɣaazɔ te li pɔ́ é vɛɛ Jɔdɛ̃ woba ligi zu vea ɣaazɔ va. 6Te ta ʋaa yowũitiɛ wuloni sa la te bo, tɔwɔ é bataize ɣɛ ga tiɛ ziɛ walai Jɔdɛ̃ wu.
7Kɛ̀ tei Jɔ̃ wɛlɛni Favilesiitiɛ lamaa va ta Sadusiitiɛ lamaa tiɛ va bataize‐ɣɛɛ ʋaa ma ga tiɛ, é ɣɛni te ma, “Wai ŋɛ ni wo ʋaa wuloai ga kaalia, ƃɛ ɣa é boga wo ma ga wo vela Gala na zii‐ɣaa‐wãlai va é vaazu? 8Ka dɔ kɛ mu a tii nii ɣɛ solowogɛi nui ma púlu ɣaa ʋegɛi faa yowũ va. 9A mɛ lɛ ɣi gaa ziɛ wɔ ɣɛ woo zu wulozu ga ‘Eeƃɔlɔhɛ̃ɛ ɣa ga gé mama gwala.’ Gè bo wiɛ, Gala ka zoo é kwɔtii niitiɛ ziɣi é te ɣɛ ga Eeƃɔlɔhɛ̃ɛ dea. 10Nii zu ƃalaa zooʋai ɣa sa guluitiɛ te maŋasai va yíɛ teve. Na ma gului nɛpɛ ɛ́ lɛ vaa ga gulu‐vaa vagɔ ta teve te pili ŋabui ɣa. 11Gà bataize ɣɛɛzu ga wiɛ ga ziɛ pulu‐ɣaa‐ʋe‐bo fai ma faa yowũ va. Kɛ̀ nui é pùlu é vaazu kée ɣaa ƃaavɛ é leve bà. Tɔ ga nui gɛ̀ lɛ kuloni bu ga gè ɣɛ ga ná savalagi‐ziɣi nu. Towaa bataize ɣɛ ga wiɛ ga Gala baa ŋinɛgi ta ŋabu. 12Ná mɔlɔ‐ɣaa‐ʋɛ ŋɛnii ɣa zéea. Towaa mɔlɔi ɣaa ʋɛ é gaa lɛ ba mɔlɔ wuu‐zuvɛ. Kɛ̀ nii é ga mɔlɔ ɣalai towaa nà ɣala ga ŋabui nii ɛ́ lɛ wɔlɔ‐wɔlɔ liʋiga.”
Bataize‐ɣɛɛ ʋai ga Ziizɛ
13Ziizɛ wuloni Geealali é li Jɔdɛ̃ ma Jɔ̃ wɔ vɛ ga nà bataize ɣɛɛ la. 14Jɔ̃ ɣɛni wõi ɣɛɛzu ga é Ziizɛ ƃe teve nà ɣɛɛ ʋaa va. É ɣɛni má,“? Nà mu ka kpàlai è ma ga è bataize ɣɛ gàazu è va pɔ̀?” 15Kɛ̀ Ziizɛ gaa woteni é ɣɛ ma, “Ƃe ba é ɣɛ ŋɛ na sa. Nii mavelei ma solowogɛ de ʋaa ma ga de nii ɣaazɔ ɣɛ Gala ki ge ba ga de kɛ.” Jɔ̃ ʋa sa bu ga é kɛ. 16Tei bataizei ɣɛɛni ga Ziizɛ, é wuloni ziɛi wu ga maa ʋilea. Na ɣa ɣɛɛ na gee‐zuvɛ laa laoni gáazu é wɛlɛ Gala baa ŋinɛgi va yíɛ yii è ɣɛ ƃiiƃɔku é zei ma. 17Tɔwɔ woo ta wuloni sa gee‐zuvɛ yíɛ ɣɛ tea, “Nii ɣa é ga ẁõila lui, nii zìi wala lai máʋai vɛ.”
હાલમાં પસંદ કરેલ:
MAFIYU 3: DN1971
Highlight
શેર કરો
નકલ કરો
Want to have your highlights saved across all your devices? Sign up or sign in
Loma New Testament © British and Foreign Bible Society, 1971.
