MAFIYU 24

Ziizɛ ƃɔɛni é vile Gala‐feli wɔta walai zu ŋala‐ŋala fai va

1Ziizɛ wuloni sa Gala‐feli wɔta walai wu yíɛ li. Nà ɣɛɛzu ná kala dopoitiɛ tiɛ va ga te dɛɛ la ga velei Gala‐feli wɔta walai logɛi ɣɛ la. 2Ziizɛ te woi ɣaa woteni é ɣɛ te ma, “Wa wɛlɛzu niitiɛ ɣaazɔ va, kɛlɛɛ? Gè bo wiɛ ga gaama, pɛlɛi nii mawɔtiitiɛ te ɣila kpalaa lɛ yɛga laani bɔɔ maazu tɔ ƃe kulozu maazu tɔ too.”

Faa ƃoei vɛɛ kpɔɔla va

3Tei Ziizɛ ɣɛni zeini Aale ɣizii ma, kala dopoitiɛ te vaani pɔ́ ta letele te ɣɛ ma, “Fai nii zu wulo gíɛ. Ʋolo ƃɛɛ ɣa fai nii ɣa ɣɛɛ la? Na ɣa ɣɛɛ na zɛƃɛ ɣa a ɣɛ é è vaa ʋai lɛ ga seele é vɛɛ ŋetea ɣaa ƃela fai va?” 4Ziizɛ te woi ɣaa woteni é ɣɛ te ma, “A ƃɔɔ maazu vɛtɛ ga nu ta mɛ lɛ wo ziɣi pele va. 5Ƃɔvɛlaale nu lamaa ɣa va nà daa‐zeigi zu tiɛ ɣɛ tea, ‘Nà ɣa gè ga Kolai, nui Gala zee ƃakogɛi ba ga masa.’ Tɔwɔ ta nu lamaa ziɣi pele va. 6Wa kɔɔni maazu woo mɛni wiɛ kɔɔ‐wɔɔ ʋai mahũ‐hũ goo mɛni. Kɛ̀ mɛ lɛ ƃe ba duo ɔ́ vili wo wɔlɔ ga. Toku ge zei ga kɛni dɛ nii ɣa wulo ba. Tɔwɔ nà lɛ dɛ ɣɛɛ ga ŋeteai mawɛ̃ɛ‐pele‐ma. 7Zuu ɣa wu ziɣi é vɛɛ bɔɔ yuu va ga kɔɔ, ɣalaso zuu yìɛ vɛɛ bɔɔ ɣalaso zuu va ga kɔɔ. Na ɣa ɣɛɛ na pulu ɣa loo, zui yìɛ ƃeli yíɛ wu su ŋada ɣile‐giledaitiɛ zu. 8Nii ɣaazɔ ɣa dɛ nɔ ga daa‐nɔwɔ‐wogi lɔɔ‐zei‐zuvɛ. 9Na ɣa ɣɛɛ na ta wo yee la faa ƃoei ya tiɛ wo vaa. Zii pɛ ka zili ga wiɛ nà daa‐zeigi mazaƃu ma. 10Nu lamaa ɣa sa yá ziɣi pele va tiɛ wulo ga ɣiini kɔwɔ wulu wɔɔ tiɛ zili ga ɣii. 11Zɛɛ ʋaa Ɣala daa woo‐wo bea ta wu ziɣi tiɛ nu lamaa ɣaka pelei va. 12Tuo vele yowũi sú wɔɔlɔɔ ma nà mazaƃu ma, nui bɔɔlɔ‐zu na wõilai ɣaa ɣa lei. 13Kɛ̀ nui yá yii lɔ gá é yɛsu é ziiti gaa ƃela su towaa valo. 14Tɔwɔ woo niinɛ vagɔi nii pilegɛi Gala ta masadai va towaa wo zui wɔlɔ‐kɔlɔ ma ɣaali ga é ɣɛ ga seele zii pɛ faa ma. Nà wɔ ka ɣɛɛ na ŋetea ɣaa ƃɛla foloi ɣa sa a ziiti.”

Faa yowũ maa‐yiki‐yikigi

15Maa nɛɛvɛ kɔlɔ‐lodo nui fai nii ɣaa ɣa. Na ɣa ga Ziizɛ ɣɛni tea, “Wa wɛlɛ na ŋada‐zu‐ŋala‐ŋala ŋɛni va é loni ŋada maa wuai zu yíɛ ná maa‐ŋɛɛ wu ma, na ɣa ga nii Gala daa woo‐wo nui Dayã é ƃɔɛni é vile ba, 16a kɛ tii maa nɛɛvɛ sa taitiɛ te Yudiiya yui zu te vela te lɛ gizi gwalaitiɛ ma. 17Maa nɛɛvɛ nui nii yá ɣɛ pɛlɛ wɔma é mɛ lɛ vile ɔ́ ŋɛnii nii ziɣi yá ɣɛ ná pɛlɛi wu. 18Maa nɛɛvɛ nui nii yá ɣɛ kpala ga é mɛ lɛ li wulu ɔ́ ná seɣei ziɣi. 19Edei! Ko ŋazaa vɛɛ duu deea va te maa wõi siɛgi na zu! 20A Gala feli ga wa vela ziɛgi mɛ lɛ zolowo sama‐yiɛ ma ɔɔ é mɛ lɛ zolowo doowo foloi ma. 21Ƃɔvɛlaale faa ƃoei ƃakpa ɣa wulo siɛgi na zu nii mazii ta lɛ dɛ wɔlɔ wuloni é ziɣi zui maʋaa lɔɔ‐zei ʋolo ma é loo zai ŋɛ ni ma. Mazii ta wɔ gɛ lɛ sa wɔlɔ‐wɔlɔ ɣɛɛ na wulu. 22È ɣɛ Gala gɛ lɛ ŋɛni mawui zu ƃuoni, nu ƃuse ta nɛpɛ gɛ lɛ ƃega wulo su. Kɛ̀ nui niitiɛ Gala ge yee ƃadoga te va, te mazaƃu ma é mawui zu ƃuoni. 23Na ma ani nu ta nɛpɛ ka ɣɛ na wo ma, ‘A wɛlɛ! Kolai ɣaa!’ ɔɔ ‘Tɔ nu,’ a mɛ lɛ siɣi ga gaama. 24Ƃɔvɛlaale numaa ta vaazu wu ziɣizu tiɛ ƃɔɔ wulo ga Kolai ga zɛɛ vele, zɛɛ ʋaa Ɣala daa woo‐wo bea tiɛ wu ziɣi tiɛ faa maa‐wɔlɔ‐wɔlɔ kpaazaga ɣɛ tiɛ faaniga ɣɛ ga seelea, kɛɛ ʋaa ma ani a ɣɛ na ga solowo faa, niitiɛ ƃalaa Gala ge yee ƃadoga te va ɣee ta te natiɛ ziɣi pele va. 25A wɛlɛ! Gè ná yɛga ná luo gè bo wo ma. 26Na ma ani ta ɣɛ na wo ma, ‘A wɛlɛ! Kolai ɣa kpooʋei zu,’ a mɛ lɛ wulo wɔ li na. Ani ta ɣɛ na wo ma, ‘A wɛlɛ! Tɔ zaama‐zu lumui zu,’ a mɛ lɛ siɣi ga gaama. 27Toku ge zei ga velei nɔ mea‐mea ɣa kulo la ga folo wulo‐zu vele é ziiti folo lii‐zu vele, vele nɔ na nu ƃuse lui vaa ʋai ɣa ɣɛɛ la. 28Vɛ nɛpɛ suo woma na, ná ɣa kooɣɛitiɛ ta ɣaa kpɔ ná.”

Nu ƃuse lui vaa ʋai

29Ziizɛ ɣɛni tea, “Faa ƃoei maʋaa ɣa wulo na ƃɔɔ nɔ ba,

foloi maa ɣa ƃidi,

ɣalogi wɔ gɛ lɛ ʋoloa.

Na ɣa ɣɛɛ na sɔmɔ dekaitiɛ te wulo gee‐zuvɛ te wu.

Gee‐zuvɛ ɣaa‐ƃaitiɛ ta sa ta ƃeli.

30Nà wɔ ka ɣɛɛ na, fai yá ɣɛ é nu ƃuse lui maʋaa lɛ ga seele nà ɣa sa a wulo gee wɔlɔgi ma. Maa‐wõi wɔ ka sa a loo ziitiɛ ɣaazɔ ma te zui ɣa. Nà wɔ ka ɣɛɛ na, ta wɛlɛ sa nu ƃuse lui va é tine ƃiligi ma gee‐zuvɛ yíɛ va, gaa‐ƃaa ƃakpa zéea ta bɔɔlɔla. 31Tɔwɔ puu woi ɣa lɛɛ na ga kpakpaa, towaa ná keelaitiɛ leve te numai niitiɛ ɣaa lɛ ba te wuloai su máʋaa ma é ziɣi ƃɔɔ zui wui la naagɔitiɛ zu é wulo wɔnɔ gee wɔlɔgi wɛ̃ɛ‐mavɛ é loo zɔ wɛ̃ɛgi ma.

Fai gɔɔva wului ɣa dɛ ga nu

32Ziizɛ ɣɛni tea, “Fai gɔɔva wului ɣa dɛ ga nu, a maa woli. Na ɣa ga yá ƃuʋu na ba yíɛ lɛni, wa kwɛ̃ɛ ga tine yiɛ ɣa sa vaazu. 33Vele nɔ na é la ga nii. Wa wɛlɛ na fai niitiɛ ɣaazɔ va, wa kwɛ̃ɛ ga nu ƃuse lui maa ƃua é sa kpo zeɣei ƃɔɔƃɔɔ da. 34Gè bo wiɛ ga gaama, zei‐zaa nu ƃusei woo lɛ ƃeazu su fai niitiɛ ɣaazɔ te leve ma. 35Gee wɔlɔgi ƃɔga zui te maʋaa ɣa ƃea gá, kɛ̀ gòitiɛ laa‐zu ɣa ga daa‐zu.”

Nu ta lɛ foloi wɛ̃ni ɔ́ nɔ ɣɛ ga ɣalavai é foloi ƃɔɔ ʋaa va

36Ziizɛ ɣɛni wɔnɔ tea, “Kɛ̀ foloi ƃɔga ɣalavai nii fai na vaazu ɣɛɛzu ma foloi ʋaa va, nu ta lɛ kwɛ̃ni. Gala ta ɣeelaitiɛ ƃalaa te gee‐zuvɛ tɛ lɛ kwɛ̃ni ɔ́ nɔ ɣɛ ga Gala dui. Kɛni nɔ kèea Gala tɔ ɣilekpu. 37È ɣɛ velei nɔ é ɣɛɛni la Nowa na yɛmini su, vele nɔ na nu ƃuse lui vaa ʋai vaazu ɣɛɛzu la. 38Toku ge zei ga è ɣɛ velei nɔ é ɣɛni la ziɛ‐ʋegi ɔ́ vɛɛ vaazu, numaa te ɣɛni laa miizu tiɛ dɔɔ ƃoale, zinaa tiɛ ŋaza wulo ŋazaa wɔ tiɛ zei zini bɛ é yɛsu sa é ziiti foloi na ma Nowa vilini da kẽe gwalai zu. 39Tɛ lɛ kwɛ̃ɛni é yɛsu ziɛ‐ʋegi va é te ƃale kwɛɛ é yii ga tiɛ. Vele nɔ na yá ɣɛɛ la ga nu ƃuse lui vaa ʋai. 40Nà maziɛ su nu felegɔ ɣa ɣɛ tii ɣɛɛzu kpala ga, gila ge wulo su gilagi yɛ su. 41Ŋazaa felegɔ ta ɣɛ kwɔda ziɣezu, gila ge wulo su gilagi yɛ su. 42Na ma a ɣaazu ɣɛ pele zu, toku ge zei ga wɛ lɛ foloi wɛ̃ni ɔ́ nɔ ɣɛ ga ɣalavai wo maliɣii vaazu ma. 43A ɣi zɛ nii zu. Na ɣa ga è ɣɛ pɛlɛ wũda nui kwɛ̃ni ga siɛgi wũmɔ nui vaazu la kpidii ʋaa va, ɔ́ ná pɛlɛi maazu vɛtɛ ga nà maziɛgi. Nà wɔ gɔ ɣɛɛ na, wũmɔ nui lɛ ƃega daa wolo ɔ́ vili bu. 44Na ma kɛni wa ƃalaa wa ɣɛ ga nui kavele ƃɛtɛi. Ƃɔvɛ‐laale nu ƃuse lui ɣa vaazu ga siɛgi wo ɣi gɛ lɛ ɣɛɛ ba ga towaa va ma.

Tii‐ɣɛɛ nui nu ɣa laa la ɔɔ nii nu lɛ laa la

45Ziizɛ ɣɛni tea, “Ƃɛɛ mu ka sa é ga tii‐ɣɛɛ nui nu ɣa laa la é ga nui kele‐ɣelegɛi? Na ɣa ga nii ná nu keea nu toga ná pɛlɛi wu veaitiɛ maazu ga yíɛ daa‐mii ŋɛni ʋe te ya maziɛ pagɔi ma. 46Tuuyiɛ ɣa ɣɛ tii‐ɣɛɛ nui nii ma. Na ɣa ga nii ná nu keea nu ɣa va é pɛtɛ yíɛ kɛ nɔ ŋɛ na. 47Gè bo wiɛ ga gaama, towaa to weligi ɣaazɔ maʋaa ƃawo la. 48Kɛ̀ nii yá ɣɛ ga tuƃo‐vele‐yowũ lii‐ɣɛɛ nui, nii yá bo ɣigi zu é ɣɛ tea, ‘Nà nu keea nu lebiga su,’ 49é vɛɛ sa ga baa lii‐ɣɛɛ veaitiɛ lowaa, é vɛɛ dɔɔ‐ƃakpa‐ƃoale veaitiɛ va ta tiɛni tiɛ laa mi tiɛ dɔɔ ƃoale,— 50tii‐ɣɛɛ nui na na nu keea nu ɣa va ga foloi nii kí gɛ lɛ ɣɛɛ ba ga towaa va ma é va siɛgi nii ma ɛ́ lɛ kwɛ̃ɛga ga towaa va ma. 51Nà wɔ ka su leve‐leve ga tɔ‐kpɛɛ‐ma é pɛɛ daa‐nɛɛ‐wũ‐ba veaitiɛ va nà mavelei ma. Ná ɣa numaa ta ɣɛ wɔlɔzu ná tiɛ yĩ gaa mi.”

હાલમાં પસંદ કરેલ:

MAFIYU 24: DN1971

Highlight

શેર કરો

નકલ કરો