MAFIYU 10

Ziizɛ na keela puugɔ kai felegɔitiɛ

1Ziizɛ é ná kala dopo puugɔ kai felegɔitiɛ lilini é gaa‐ƃaa ʋe te ya ga te gɔʋɛ yowũa ƃɛ numaa wulu tiɛ seeƃɛ valo tiɛ seeƃɛ vea lɔtɔ zu wodo. 2Keelaitiɛ ƃɔɔ ta laa‐zeigitiɛ ɣa: Mamaa wũgi pa ka ga Saimɔ nii daa ga Pite é vɛɛ déɣei Ɛĩdulu va; Zɛbɛdi dui Jĩi é vɛɛ déɣei Jɔ̃ va; 3Fele ƃɔga Bɔtalɛmu; Taamɔ ƃɔga Mafiyu nii é ɣɛ ga gɔmɛti naʋolo‐wulo nui; Afia dui Jĩi vɛɛ Taadia va; 4Saimɔ nii é ɣɛ ga Keena nui é vɛɛ Dudia Asikaalia va, na ɣa ga nii é wuloni ga Ziizɛ wɔwɔ wulu wɔɔ.

Keelaitiɛ leve fai Ziizɛ vɛ

5Ziizɛ é keela puugɔ kai felegɔitiɛ leveni ga tɛnɛ goi niitiɛ. É ɣɛni te ma, “A mɛ lɛ li vɛ nɛpɛ zii ƃalaagitiɛ te na. A mɛ lɛ wɔnɔ lɛ Sameelia lai ta zu. 6Kɛ̀ to mu a li niitiɛ wɔ te Yezɔi vɛlɛi wu te maʋaa wuloai ga baalagitiɛ te viligɛi. 7Wa ɣɛ na liizu, a wiɛ Gala goi wo wiɛ ɣɛ tea, ‘Gala ta masadai maa ƃua.’ 8A wiɛ seeƃɛ veaitiɛ valo, wiɛ saa vea wu ziɣi saa ya, wiɛ gee zeeƃɛ kɛɛ vea valo te maa yìɛ ziɣi, wiɛ gɔʋɛ yowũa ƃɛ kɛɛ vea wulu. Nii wo maa zɔlɔ woga wɛ lɛ sɔ̃wɔ ʋeeni. A teve te mɛ lɛ geea wo ma. 9A mɛ lɛ li ga zɛni ɔ́ nɔ ɣɛ ga kani ɔɔ kapa wa yiiʋɛgitiɛ zu. 10A mɛ lɛ li ga bɛbɛ wa ziɛi zu ɔ́ nɔ ɣɛ ga wo li ga seɣe felegɔ ɔɔ savala ɔɔ wo tukpo siɣi. Toku ge zei ga kulovɛ bu tii‐ɣɛɛ nui vɛ ga é wɔ̃nɔgi maa zɔlɔ wo. 11Na ɣa ɣɛɛ na tai nɛpɛgi wa lɛ su, nui kuloai bu bɛ́ na a máʋaa wu ɣaa ziɛ. A yɛ manui va é yɛsu wo ziɣi na. 12Wa ɣɛ na lɛɛzu nui na na pɛlɛi wu, a tuuyiɛ loo ga zii‐laa ɣɛ bu. 13Ani kulovɛ bu pɛlɛi na vɛ, pagɛ wa yii‐lai yɛ bu. Kɛ̀ ani pɛlɛi ƃɔɔ lɛ kuloni bu, pagɛ wa yii‐lai va wulu wo wɔ. 14Ani nu nɛpɛ gɛ lɛ ɣɛ yee zeini wo wu ɔɔ é wui to wo woo ma, wa ɣɛ na wulozu pɛlɛi na wu ɔɔ wa ɣɛ na wulozu tai na va, a wɔwaa ƃɛkpɛnɛ ga fifiligi. 15Gè bo wiɛ ga gaama, faa‐wo gaa‐leve ʋoloi maʋaa‐yɛ‐mai ɣa va Saadɔ̃ ƃɔga Gɔmɔɔla lai te maʋaa ma é leve tai na va.

Kpɔɔlagi é vaazu

16“A wɛlɛ! Gà wo levesu è ɣɛ nu ɣa ɣɛ baalaga levesu gozo koeiya zaama. Na ma a ɣele‐ɣele è ɣɛ velei kaalia te la, wo maa wuo faa zu è ɣɛ velei ƃiiƃɔkua te la. 17A ƃɔɔ maazu vɛtɛ ga nu ƃusea. Ƃɔvɛlaale ta wo yee la faa‐wo‐bo kpɔga ya, tiɛ wo ƃooʋe ta Ɣala‐feli wɔtaitiɛ wu. 18Na ɣa ɣɛɛ na ta wo mai gɔmɛti nu walaa laa wu ta ɣalasoga màzaƃu ma, kɛɛ ʋaa ma wo seele woo ʋe te ɣaazu é vɛɛ zii ƃalaagitiɛ va. 19Ta wo yee la na numaa ya, a mɛ lɛ zii‐zɛlɛ sei ma ga velei wa ƃɔɛ la ɔɔ zɔi wa bo. Ƃɔvɛlaale zɔi pagɛi wo bo towaa ʋe wo ya ga siɛgi na. 20Ɛ́ lɛ ga wa ɣa wa ɣɛ ƃɔɛzu. Kɛ̀ wo ɣeea Gala baa ŋinɛgi ɣa yá ɣɛ faa wuuzu wo la wiɛ bo. 21Keea kaa ɣila ka ɣɛ ɣii yee laazu saa ya, duu keea yìɛ duu yee la saa ya. Na ɣa ɣɛɛ na lopaitiɛ ta wu ziɣi ga te ɣaa veaitiɛ tiɛ kɛ natiɛ tiɛ saa maa zɔlɔ wo. 22Nu pɛ ka zili ga wiɛ nà daa‐zeigi mazaƃu ma. Kɛ̀ nui yá yii lɔ é yɛsu é ziiti daa‐wulo‐zu, manui ɣa valo. 23Ani ta wo ƃɔɔla na taa ta zu, a vela wo li na wulu laa zu. Gè bo wiɛ ga gaama, wɛ lɛ woloa ga leve‐teve Yezɔi yui zu lai ƃɔgɔpɛ su nu ƃuse lui yìɛ va.

24“Nui é ga kala dopo lɛ ná kala‐mɔi maazu ɔ́ nɔ ɣɛ ga nui é ga duo é ɣɛ ná nu keea nu maazu. 25Pooligɛ su kala dopoi ʋaa ma ga é ɣɛ ga ná kala‐mɔi ɣavele. Pooligɛi su wɔnɔ duoi ʋaa ma ga é ɣɛ ga ná nu keea nu ɣavele. Pɛlɛ wũda nui mu ka te tiliga ga gɔʋɛ yowũa ta masa, pɔ́ pɛlɛ wu veaitiɛ ɣa tɛ lɛ faa yowũ woga ga te laa máa ɔ́ yiki?

Nii wa luo ba

26“Na ma a mɛ lɛ luo numaitiɛ va. Toku ge zei ga faa ta nɛpɛ gɛ lɛ na máazu ɔ́ vɛɛ ɔ́ ƃe wulozu kɛnɛ ma. Ɔɔ faa ta nɛpɛ gɛ lɛ na ɔ́ loowu nu ɔ́ ƃe kwɛ̃ɛsu. 27Nii gè bosu wiɛ kpidi zu, a bo podo ɣala‐kala ga. Na ɣa ɣɛɛ na nii wa mɛni é wo ga doowu‐zu ƃɔɛ, a bo ga woo maa zeezea pɛlɛ wɔma. 28A mɛ lɛ luo numai niitiɛ va ta wo malɔtɔi vaa nɔ, tɔwɔ tɛ lɛ zooga tɔ wo yɛʋui wulo wo ya. Nui mugi wa luo bá tɔ ga nui yá zoo é nu yɛʋui vɛɛ málɔtɔi va é te zu ŋala‐ŋala daa‐nɔwɔ‐wo ŋada laavɛ. 29Kɛ̀bɛ ta zɛƃɛ‐zɛƃɛwu felegɔ zɔ̃wɔ wulo kapa gila ma, kɛlɛi? Tɔwɔ te ɣila kpalaa lɛ loa zui ma, ani wo ɣeea Gala gɛ lɛ ʋaani bu. 30Wũ deɣai ƃalaa é wo wũmɔ dodogɛ. 31Na ma a mɛ lɛ luo. Wo maʋaa wala levegɛ zɛƃɛ‐zɛƃɛwua va.

Nu laa‐wu‐ziɣi ʋai Kolai ʋaa ma numaa ɣaazu

32“Nii mavele ma nui nɛpɛ yá laa wu ziɣi màʋai ma é bo numaa ɣaazu, nà ƃalaa gà laa wu ziɣi manui maʋaa ma gè bo kèea Gala gaazu é gee‐zuvɛ. 33Kɛ̀ nui nɛpɛ yá màʋaa zakpe nu ƃusea ɣaazu, nà ƃalaa gà manui maʋaa zakpe kèea Gala gaazu é gee‐zuvɛ.”

Zii‐laa laale, kɛ̀ boa zɔkpɔ ve

34Ziizɛ ɣɛni tea, “A mɛ lɛ ɣi gaa ziɛ ga pàavɛ ga gè zii‐laa ɣɛ zui ɣa. Gè lɛ vaani ga gè zii‐laa ɣɛ zui ɣa, kɛ̀ boa zɔkpɔ ɣa gè vaa la na. 35Ƃɔvɛlaale pàavɛ ga

gè zunu luu vɛɛ kéea va ga kpɔɛi,

gè ŋaza nu luu vɛɛ dée va ga kpɔɛi,

gè duu ŋaza vɛɛ dee mɔɔ va ga kpɔɛi.

36Na ɣa ɣɛɛ na nu wɔɔ yɔ̃wɔ ɣa ɣɛ ga kpɔɔ wɔ pɛlɛ wu veaitiɛ.

37Nui wõiyai ga kéea ɔɔ dée é leve bà, manui lɛ kuloni bu màʋaa ma. Nui wɔnɔ é wõini ga duu zunu ɔɔ duu ŋaza nu é leve bà, manui lɛ kuloni bu màʋaa ma. 38Na ɣa ɣɛɛ na nui lɛ ná pɛɛ‐pulu wulu likpii ziɣia ɔ́ vile pùlu, manui lɛ kuloni bu màʋaa ma. 39Nui yá ɣɛ yɛʋui ɣaa ziɛzu towaa pili. Nui yá yɛʋui vili màzaƃu ma towaa pɛtɛ.

Kulo‐nu‐ma vai

40“Nui nɛpɛ yá yee zei wo wu, manui yee zeiya bù. Nui wɔgi yá yee zei bù, manui yee zeiya nui nii wu é tèvega. 41Nui yá yee zei Gala daa woo‐wo nu nà ɣɛɛ ʋai ma ga Gala daa woo‐wo nu, manui ɣa Gala daa woo‐wo nu ná kulo‐nu‐mai maa zɔlɔ wo. Nui kɔnɔ yá yee zei tele‐bo tuo‐wo nu wu nà ɣɛɛ ʋai ma ga tele‐bo tuo‐wo nu, manui ɣa tele‐bo tuo‐wo nu ná kulo‐nu‐mai maa zɔlɔ wo. 42Nui nɛpɛgi yá faa‐nɛɛ ɣɛ lopaa woloi niitiɛ te ɣila bɛ kɔpu ɣila kpalaa zu ziɛ lei zu nà ɣɛɛ ʋai ma ga kala dopo, gè bo wiɛ ƃɔɔƃɔɔ su manui lɛ valaga mawulo‐nu‐mai ma.”

હાલમાં પસંદ કરેલ:

MAFIYU 10: DN1971

Highlight

શેર કરો

નકલ કરો