Matiu 4
4
Satan Yeesus akimak
(Mak 1.12-13, Luk 4.1-13)
1Aria Mua Maneka Ewar-ke Yeesus aawep epa asia nomon manekiw nain amapikiwok, Satan-ke akiminok naep. 2-3Nan ikok yam ikua nain fofa ten erepam. Ne samor akena wuailem-ikaeya Satan-ke ekapep maakek, “No Mua Maneka muukiya-na nomona fain maakeya emer ikowa puukinok.” 4Naeya maakek, “Mua Maneka opora feenap wiar siisimiwkin ikua,
‘Maa enowa muutiw me kekanep ikaimik, weetak, Mua Maneka opora iiwawun akena wiar ookami kekanep ikaimik.’” (Lo 8.3)
5-6Naap maakeya Satan-ke kiiriw aawep Yerusalem amapikiwep tempel koora umua#4.5-6 Mua Maneka tempel koora Yerusalem-pa ikua. Wi Yuuda Mua Maneka patiru naep maa enowa e maa eneka feekiya ikiwep nan onam-ikemik. Wi mua oram owaruma-pa ikemik, ne wi pris muutiw koora urupem-ikemik. Koor kemena konim manekiw mika-puukamik. Kemena miimow ona-pa ikua nain Kemena Iwowa Emi naimik, ne konima nomakep ikiwimik nain Kemena Iwowa Emi Akena naimik. Nain pris woos mua waisow ikiwinon. Maa muutitik tempel kemena-pa ikomakek nain Iibru sapta 9-pa eliw urufinan. iinan akena-pa wuap maakek, “Mua Maneka opora feenap ikua,
‘Ona ensel wia maakeya baliwep nefa urufikuan,’
ne opor oko feenap,
‘Wi ensel-ke wapena-pa nefa opiwkin nomona merena me nefa mikinon.’ (Someka 91.11-12)
Naapeya no Mua Maneka muukiya-na, aria pikine.” 7Naeya maakek, “Mua Maneka opor ara oko pun maek,
‘Mua Maneka-ko me akimimik.’” (Lo 6.16)
8Naap maeya Satan-ke aawep ema maneka amapurupok. Amapurupep nan iimarep ikok miiw unowa ne maa ele-eliwa unow onaiya ikomakek nain ofakowami maakek,
9“No aakisa keema muuna mikap lotu efa oninan-na maa unowa urufin fain nos-ke urufam-ikainan.”
10Naap maakeya maakek, “Satan, no eenap eke! Mua Maneka opora nain feenap maek,
‘Mua Maneka eena niena Maneka-ke, o waisow keema muuna mikami lotu one. O waisow mauwoma.’” (Lo 6.13)
11Naap maakeya o Yeesus piipuap ikiwok. Ne Yeesus waisow ikaeya wi ensel-ke ekapemi ane-kekanowamik.
Yeesus Galili-pa uuwowa onoma wuak
(Mak 1.14-15, Luk 4.14-15)
12Aria Yon koora-pa wuiwkin Yeesus nain meta miimap kirep Galili kame ikiwok. 13Iwami Nasaret me ikiwok. Kapeneam ikiwep nan ikua, owowa nain Galili eka saawirinowa nain pona-pa ikua, kame nain wi Sebulun ne Naptali kerekera miiwa-ke. 14-15O nan ikua nain iiriw profet Aisaiya opora maek nain makena wiar arek. Opora feenap,
“Sebulun ne Naptali miiwa nain ifer maneka urupemi Yodan eka. Miiwa nain unuma Galili, wi owow oko oko mua pun nan taanep ikemik. (Aisaiya 9.1-2)
16Wi epa kokoma-pa ikemik nain parina urufamik. Ne wi umow epa-pa ikemik nain parina-ke wilinemi wia parinarowak.” (Aisaiya 42.7)
Opora naap maek. 17Ne aria Yeesus nan ikok opora wia wafuromami maem-miek, “Mua Maneka pika kemena-pa ikowa nain epa faneka. Ni kema kireka!”
Yeesus mua erepam wia fareya ookamik
(Mak 1.16-20, Luk 5.1-11)
18Aria Yeesus Galili eka ponaiw ikiwem-ikok mua erup wia urufak. Wiam erup nain mera aawow mua-ke ne sia wafuram-ikemik, Saimon weepe Andru ikos. Saimon unuma oko Pita. 19Ne wia maakek, “Aria ni ekapep yo yookeka. Ne yos-ke mua wia aawowa nia ofakowinen.” 20Naap wia maakeya ewur akena mera sia nan wuap-puap ookamik. 21Ne naap iram-ikok Sebedi muuka wiam erup wia urufamik. Yems Yon ikos, wis pun wiena wiawi wameiya aasa-pa ikok mera sia fuluwa piitam-ikemik. Ne aria Yeesus-ke wia farek. 22Wia fareya wiawi piipuap o ookamik.
Yeesus Mua Maneka opora wia maakemi napuma wia saliwak
(Luk 6.17-19)
23Aria Yeesus Galili owow unowa nain wiar ikiwep lotu koora-pa Mua Maneka pika kemena-pa ikowa nain opora wia maakem-miek. Ne napum sira-sira wia saliwam-ikua. 24Ne o meta wiar ikiwok nain Siria kame unowa nain miimomakemik. Ne emeria mua napum sira-sira nain amapekapemik. Napuma feenap nain: mia sirirowa, sawur wia anirawowa, puep iikirowa, mia uumarowa, iiwawun naap wia pekapiwkin wia saliwak. 25Ne yakeyak maneka o ookam-miemik. Owowa fain, Galili, Dekapolis ne Yerusalem-pa ikemik nain ikip iiwawun Yuudia ne Yodan eka kame okaiwi-pa ikemik nain pun ekapep ookam-miemik.
હાલમાં પસંદ કરેલ:
Matiu 4: mhlNT
Highlight
શેર કરો
નકલ કરો
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
