Mateusi 12
12
“Jimoava 'arà Jarà tè ije,” e'i Jesu mã'ẽ
(Maku 2.23-28; Rukasi 6.1-5)
1Ajaire jimoava 'arà mẽ, Jesu koo pyryvo okwa, wemimo'ekwerà kõ reve. Aresity koo pupe tui upa. Emimo'earà kõ ijamyay a'evo remẽ. Ajawyi aresi opo'o iwa kupa. 2Ãmẽ Pariseu kõ mõ omã'ẽ sikaepo ee kõ, a'evo ekoi kupa remẽ. Ajawyi kee e'i Jesu pè kupa:
– Neremimo'earà kõ noerovijai sõ tãmõ Moisesi remikusiwarerà jimoava 'arà rewarà age'e, e'i kupa. “Tapeposiko e'ã jimoava 'arà mẽ”, e'i maekwerà noerovijai kupa, e'i kupa.#12.2 Kee jaa tè e'i kupa: “Aepo werovija sõ kupa remẽ, moma'e rã'ãigwerà nopo'o'ãi kuwa iwa jimoava 'arà mẽ kupa mijã”, e'i tite kupa. “Janejare'e naoryi omãjã ee kõ ky'y”, jaa tè aepo e'i tite kupa.
3Ajawyi kee e'i Jesu ijupe kõ:
– [Jane kõ javya ywesõ pemoa'u katu ipi! Poroporijauesaa rè ywesõ kuwasi peja'a mijã! Na'evoi ajamã'ẽ pejẽ, e'i.] Pekuwa ipe itõkõ tãmõ Tavi manyvo wereko karamoe remẽ, amyay pè nikasi remẽ, isota kõ ve nikasi remẽ. 4Ajawyi itõkõ Janejare'e moe'ea retã wyry pè tè oike meju pyy iwa. Janejare'e pè temime'ẽgwerà tẽ tesõ o'u tãmõ Tavi, osota kõ reve. Janejare'e pè oporegeta mãe kõ kõrijõ tè a'e to'u ipi mijã. Ajamã'ẽ Tavi kõ nikasi remẽ, ome'ẽ jẽ tesõ wemĩgwai sota kõ to'u, e'i.#1Sa. 21.1-6 [“Nivoi” ne'i ajamã'ẽ Janejare'e tãmõ Tavi pè a'evo remẽ,] e'i Jesu Pariseu kõ pè.
5E'i jẽ Jesu ijupe kõ:
– Aje tijaposiko e'ã jimoava 'arà mẽ ipi, e'i. Ajamã'ẽ Janejare'e pè oporegeta mãe kõ oposiko jẽ jimoava 'arà mẽ ipi. Janejare'e moe'ea retã mè temime'ẽgwerà ojuka jẽ ime'ẽ Janejare'e pè imoe'ea rõmõ kupa ipi. Tãmõ Moisesi remikusiwarerà rupi a'evo ekoi kupa ipi, e'i Jesu Pariseu kõ pè.
6E'i jẽ Jesu ijupe kõ:
– Ikatuay Janejare'e moe'ea retã, e'i. Ajamã'ẽ ije ywesõ Janejare'e moe'ea retã wyi, Janejare'e Remimuurerà rõmõ, e'i. 7Napeja'ai Janejare'e ayvukwerà rè, kee e'i maekwerà rè: “Poroporijauesa mã'ẽ ywesõ apota. Eupe temime'ẽgwerà ywesõ rõwã”, e'i maekwerà rè.#Mat. 9.13; Ose. 6.6 Aepo jaa pekuwa sõ remẽ, nivoi mã'ẽ napemo'y teywete'ãi kuwa Janejare'e remimotarà kõ rè. Peporijauesa kõ kuwa ãmẽ mijã, e'i.
8E'i jẽ:
– Ajikuwapa yva pe wyi ajo ajimojane mã'ẽ rõmõ. Ije ywesõ jimoava 'arà wyi. Jimoava 'arà Jarà tè ije, e'i Jesu.
Jesu omokatu ipo japu'a mã'ẽ remẽwarà
(Maku 3.1-6; Rukasi 6.6-11)
9Ãmẽ Jesu oo jẽ a'e pe wyi. Janejare'e ayvu rè jimo'ea retã mõ pè oo oike, jimoava 'arà mẽ. 10Ãmẽ kwaima'e mõ ipo japu'a mã'ẽ a'e pè tui. Ãmẽ ãmõ kõ ve a'e pè tui. Tãmõ Moisesi remikusiwarerà rè poromo'e mãe kõ. Ãmõ, Pariseu kõ. A'e kõ opota teãmã nivoi mã'ẽ omo'y Jesu rè ipi. Ajawyi kee e'i Jesu pè kupa:
– I'ete põ poromokatua jimoava 'arà mẽ? Manyvo e'i põ tãmõ Moisesi a'evoa rè? e'i kupa.
11Ãmẽ Jesu e'i ijupe kõ:
– Ma'e remẽ janerima kaneiru mõ o'a sõ yvy kwarà typy mã'ẽ pupe oo remẽ, jimoava 'arà mẽ, jaitytà sipõ tomãnõ? Ãnĩ! Nijaity'ãi! Kuisẽ'ẽ jaekyità nomãnõive remeve! #Ruk. 14.5 12Ajawyi kee a'e pejẽ. Jane kõ ywesõ epy wete Janejare'e pè teima kõ wyi, e'i. Ajawyi i'ete jane mõ japãtavõ jimoava 'arà mẽ, e'i.
13Ameve Jesu e'i ipo japu'a mã'ẽ pè:
– Emomojai nepo tamã'ẽ ee, e'i.
Ãmẽ omomojai opo ikoty. Ameve py'awarà mõ ikatupa ky'y, ipo rovajarà vo ky'y.
14Ãmẽ Pariseu kõ ojisyry oo iwyi ky'y.
– Manyvo kuwa põ sireko Jesu ijukaoka? e'i ojimogeta kupa.
Jesu ojikuwa Janejare'e Remimuurerà rõmõ remẽwarà
15Ãmẽ ijukaa rã ojenu Jesu pè remẽ, ojisyry a'e pe wyi. Aty wasu kõ ve oo Jesu rupi. Itekorã mãe kõ omokatu ãmẽ. Pirujẽ omokatu erokwa kõ.
16– Erewarà tapemome'u e'ã ikõ erokwa nẽ, e'i Jesu ijupe kõ.
17A'evo poroereko, Janejare'e ayvu mojenuarà Isajasi kee e'i maekwerà rupi katu:
18“Eremĩgwai tè aã. Eremimuu tè. Eremiau tè. Erory ee mã'ẽ tè.
E'ãg ame'ẽtà ijupe imokasiarà rõmõ, eayvu ivo tekoua rewarà tomojenu pirujẽ yvy pewarà kõ pè, tokuwa kupa.
19Kee ekoità. Nojiayvu moteiteteoka'ãi ijupe kõ.
Noje'ẽgãtã'ãi teve jane kõ pè iko. Ikatusa rupi omogeta kõtà.
20Owa katu ekoità. Nikasi mãe kõ oporijauesatà.
Ovote nojireko kuwai mãe kõ opãtavõtà. Nivoi tekoua omoyvypytà. Ivo tekoua omovytà tosãi okwa.
21Pirujẽ yvy pewarà kõ Rõvijã wasu e'eay rõmõ ekoità”, e'i amãtejẽ Isajasi maekwerà.#Isa. 42.1-4
Aekwerà rupi katu Jesu ekoi, “aje ywete” taoty ijupe.
Jesu oporegeta ãjãgai rõvijã rè remẽwarà
(Maku 3.20-30; Rukasi 11.14-23)
22Ãmẽ jane kõ mõ weru ãjãg ojimoemija ee mã'ẽ mõ Jesu kyty. Naeapyoi mã'ẽ tè a'e. Noporegetai teve mã'ẽ. A'e Jesu omokatu taeapyo katu ky'y. Toporegeta teve ky'y. Ãjãg omoẽ imoisyry imono iwyi.
23Ãmẽ aty wasu a'evoa rè omã'ẽ remẽ, ijãgyoay ee omãjã.
– Haa! Pemã'ẽ Jesu kasia rè esa! e'i kupa. Tãmõ Tavi Jeapyrerà e'eay tè rõwã põkõ ãwĩ? e'i ojiupe kupa.
24Ajamã'ẽ Pariseu kõ mõ aepo wenu remẽ, kee e'i tite kupa:
– Janejare'e ayvu rupi rõwã ãjãg kõ omoẽoka imoisyry imono! Peusepu ayvu rupi tè omoẽoka! e'i ywe'e tite kupa. “Ãjãgai rõvijã ayvu rupi tè ãwĩvo”, jaa tè aepo e'i tite kupa.#Mat. 9.34; 10.25
25Ãmẽ Jesu okuwapa ijipy'amogeta ai kõ. Ajawyi kee e'i ijupe kõ:
– [Ãjãgai rõvijã nomomoi'ãi kuwa wemĩgwai kõ jane kõ wyi, e'i. Nikasi'ãi kuwa omoisyry kõ remẽ, e'i.] Tõvijã rè tè amosã'ãgatà ãjãgai rõvijã, tapekuwa sa'u, e'i. Tõvijã remĩgwai kõ mõ ojimoãpã sõ oõvijã rè remẽ, ikasi jẽ kuwa põ tõvijã ãmẽ? Ãnĩ! Nikasi'ãi kuwa! Manyvo ne'i'ãi kuwa ojimokasi ovote ky'y. A'evo ve tetãrã kõ. Jopyriwarà kõ. Ojiaka aka kupa remẽ, ojipyri nojimoena'ãi ãmẽ kupa ky'y. Ojisyrytà oo ojiwyi kupa. A'evo ojimosãsãità kupa, e'i. A'evo remẽ tõvijãgwerà nikasi'ãi etãrã rõmõ ky'y, e'i. 26Ãwĩvo 'ejẽ Satanasi, wemĩgwai ãjãg kõ reve. Omoisyrypa tè sõ wemĩgwai kõ owyi remẽ, manyvo ne'i'ãi kuwa ojimokasi rõmõ iko ãmẽ mijã. Opa kuwa ikasia iwyi mijã, e'i.
27– Kee pejẽ tite si ije: “Ãjãgai rõvijã Peusepu ayvu rupi tè ãjãg kõ omoẽ moẽ imono”, pejẽ tite ije. Pejẽ pa'e? Ava ayvu rupi põ penemĩgwai kõ omoẽ ãjãg kõ ipi? Peusepu ayvu rupi teve sipõ? Ãnĩ! A'e ayvu rupi rõwã. Ãwĩvo ve ije, ijayvu rupi rõwã teve, e'i. Ajawyi pejavy aepo pejẽ ije remẽ, e'i. 28Ije ãmẽ, ãjãgai rõvijã ayvu rupi rõwã ãjãg kõ amoẽoka ipi. Aje, Janejare'e 'Ãg ayvukasia rupi tè a'evo aiko. A'evoa rè pemã'ẽ remẽ, ekuwa kuwasi Janejare'e Remimuurerà penõvijã rõmõ pekupa mijã, e'i.
29– Ãmõ mijẽ, manyvo tekoua amome'utà tapekuwa. Imonatà mã'ẽ mõ oike sõ ikasiay mã'ẽ retã wyry pè imonatà moma'e rè remẽ, nimona te'ĩte'ãi kuwa. Kee remẽ tè imona kuwa. Opyy rã'ĩ kuwa ijarà ipokwa. Ãmẽ tè kuwa manyvo ne'i'ãi ijarà. Ãmẽ tè kuwa imoma'e weraapa kuwa. Ãmẽ nopokwai rã'ĩ sõ remẽ, manyvo noereko'ãi kuwa imoma'e reraa, e'i. [Aepo e'i Jesu ijupe kõ remẽ, “Ije ywesõ ekasi Satanasi wyi”, jaa tè aepo e'i.]
30– Kee a'e aepo jaa pè. Ava mõ ekoty rewarà rõwã sõ remẽ, a'e ojimoãpã ere mã'ẽ tè. Ãwitõ yty jamoaty aty katupa imomotà mijã. Ãmẽ jakatu ava mõ uu imosãsãi. Ãwĩvo ve ekoty rewarà kõ jamoai tojipe'a ewyi kupa remẽ, e'i Jesu.#Mak. 9.40
31E'i jẽ Jesu:
– Kee a'e pejẽ. Janejare'e “awyjepa” e'ità jane kõ aiwererà pè ky'y. Iteetejẽ joaiwererà mã'ẽ pè “awyjepa” e'ità. Ajamã'ẽ ava mõ sõ “ãjãg” e'i tite Janejare'e 'Ãg pè remẽ, aepo omo'y jẽtà ee, e'i. Ava mõ oporegeta ai epe Janejare'e rè remẽ, “awyjepa” e'i jẽ kuwa. 32Ãwĩvo ve ava mõ Janejare'e Remimuurerà ojimojane mã'ẽ rè oporegeta ai remẽ, “awyjepa” e'i jẽ kuwa ijupe. Ajamã'ẽ “ãjãg” pejẽ Janejare'e 'Ãg pè remẽ, “awyjepa” ne'i'ãi peupe. Aepo omo'y jẽtà pene. Poromoe'yi 'arà mẽ omo'y jẽtà pene, e'i.#Ruk. 12.10
“Peporegeta ai rupi pepy'a aiwerà ojikuwa”, e'i Jesu mã'ẽ
(Rukasi 6.43-45)
33-34Ãmẽ e'i jẽ Jesu Pariseu kõ pè:
– Pepojy ai tè pejẽ! Amã'ẽ pene. Peporegeta ai rupi pepy'a aiwerà ojikuwa ipi! Ayvu amome'u tarà mijẽ tapekuwa sa'u, moma'eyva'y rè, e'i. Moma'eyva'y ikatuay remẽ, i'a katuay ipi. A'evo jakuwa ikatuay mã'ẽ ipi. Ãwĩvo ve moma'eyva nikatui sõ remẽ, jakuwa ve ni'a katu'ãi teve, e'i. I'akwerà kõ rupi jakuwa. Ãwĩvo ve mirà kõ poregetaa rupi ipy'a pewarà ojikuwa ipi, e'i Jesu.#Mat. 17.17-18; 23.33; Ruk. 3.7; Mat. 15.18
35– Mirà py'a pewarà ikatuay remẽ, ikatuay mã'ẽ rè tè ojipy'amogeta ipi. Ajawyi ikatuay wetetà oporegeta ipi. Na'evoi ãmẽ nivoi mã'ẽ. Nivoi ipy'a pewarà mã'ẽ. Ajawyi oporegeta teitetetà iko ãmõ kõ pè ipi. Ojipy'amogeta ai rè tè oporegeta iko ipi, e'i. 36Aje kee a'e pejẽ. Kãramõ Janejare'e poromoe'yi 'arà mẽ, jane kõ ayvukwerà omosã'ãgatà ikuwa. Ajawyi peayvu teitete remẽ, okuwa jẽtà. Ikatuay peporegeta remẽ, okuwa tary ve ãmẽ. 37Peporegetakwerà rupi katu pemoe'yità, e'i Jesu ijupe kõ.
Jesu nomojisaoka'ãi okasia noerovijai mãe kõ pè remẽwarà
(Maku 8.11-12; Rukasi 11.29-32)
38Ãmẽ tãmõ Moisesi remikusiwarerà rè poromo'e mãe kõ mõ e'i Jesu pè, Pariseu kõ reve:
– Poromo'earà, mãrãnà jikuwa e'ã emojisaoka nekasia rupi toromã'ẽ ee. “Aje Janejare'e kasia rupi a'evo ekoi”, oro'età ãmẽ oromãjã nere, e'i rã'ãga Jesu pè kupa.#Mat. 16.1; Ruk. 11.16
39Ãmẽ Jesu e'i ijupe kõ:
– Nivoi mãe kõ tè pejẽ, age'ewarà kõ rõmõ! Erã'ã tarepe pekupa. Ajawyi aepo pejẽ tite ije. Ajamã'ẽ ije namojisaoka'ãi ekasia penovake. Janejare'e ayvu mojenuarà Jonasi rè tè ajimosã'ãgatà.#Mat. 16.4 40Kõitokõ pira wasu omõkõ pãranã wasu rupi oo remẽ. Moapy 'arà rõmõ tesõ itõkõ opyta pira wasu reykwerà pupe. [Ãmẽ itõkõ moapy 'arà paire tè itõkõ omoẽ ity ky'y. Aekwery vo itõkõ ekoi mijẽ ky'y, e'i.] A'evotà ije, Janejare'e Remimuurerà ajimojane mã'ẽ rõmõ. Moapy 'arà rõmõ apytatà rã'ĩ tyvy pupe, e'i Jesu ijupe kõ.#Jona. 1.17
41– Pejapyaka katu eayvu rè, Jonasi rewarà rè, e'i. Jonasi oẽ maire itõkõ oo Janejare'e ayvu mojenu Ninivi taa pè. A'e wãnà kõ ijayvu wenu remeve, py'awarà mõ ojimosĩoka waiwererà rè. Ojimome'upa Janejare'e pè waiwererà kõ reitypypyipaoka ky'y. Ajawyi kãramõ Janejare'e poromoe'yi 'arà mẽ, aekwerà kõ omã'ẽtà pene. Nivoi mã'ẽ omo'ytà pene pemosĩoka ãmẽ kupa. Kee e'ità kupa: “Karamoe remẽ Jonasi omojenu Janejare'e ayvu oreupe remẽ, oroitypypyipa oreaiwererà ky'y. Ajamã'ẽ orevo rõwã pejẽ, ãwisõ Jesu ywesõ ipe Jonasi wyi remẽ. Pejapyaka kuwasi ijayvu rè mijã!” e'ità pemosĩoka kupa, e'i Jesu ijupe kõ.#Jona. 3.5
42– Oiko ãmõ teve, karamoe remẽwarà. Sapaa yvy wãnà kõ rõvijã wasu. Wãivĩ tè itõkõ a'e. A'e itõkõ ke'ĩrõwã wyi uu jõvijã Saromão resa. Saromão tekokuwaa ojenu ijupe. Ajawyi uu esa. Ije ywesõ ipe atekokuwa Saromão wyi mijã. [Ajamã'ẽ napeenu'ãi sire'e eayvu ipi.] Ajawyi kãramõ Janejare'e poromoe'yi 'arà mẽ, Sapaa wãnà kõ rõvijã kee e'ità pejẽ pemosĩoka rõmõ: “Ke'ĩrõwã wyi itõkõ ajo Saromão tekokuwaa renu. Na'evoi põ pejẽ! Ãwisõ pepytery pè tè Jesu ekoi remẽ, napeenui sire'e 'eteay!” e'ità pemosĩoka, e'i Jesu ijupe kõ.#1To. 10.1-10
Ãjãg ojivy jivyrĩ wemimoaiwerà kyty mã'ẽ rewarà
(Rukasi 11.24-26)
43E'i jẽ Jesu ijupe kõ:
– [Manyvo jaa rõmõ rõwã kuwa pejipy'amokatu, Janejare'e 'Ãg napeinõokari pepy'a pè remẽ.] Kee jaa amome'utà tapekuwa sa'u. Ãjãgaiwerà oike mirà mõ pupe remẽ, oka vo ijupe. Nopotai wemimoai reity oo ipi. Ajawyi ojisyry ipupe wyi remẽ, oo rã'ĩ wetã rã reka ipi. Oo oo ipe tekoe'ãma rupi okane'õyo rõmõ. Ajaire noesai wetã mõ remẽ, 44kee e'i oupe ãmẽ: “Ajivy tarà mijẽ maevo eretãgwerà kyty aa. A'e pupe tajimoena mijẽ”, e'ità oupe. Ojivy oo ãmẽ. Ovãe omã'ẽ ee remẽ, e'i oupe: “Haa, ikatuay sikaepo erekoawerà. Ojimokatupa upa. Ivo katu ekoi ky'y”, e'i oupe. Ajawyi oike mijẽ ipupe ojimoena, wemimoaiwerà pupe mijẽ. 45Ãmẽ oo rã'ĩ etãrã kõ reka. Irõ irõte rõmõ#12.45 7 rõmõ. wesa remẽ, kee e'i ijupe kõ: “Ja'e erupi erekoawerà pupe jajimoena”, e'i ijupe kõ eru. Opãsarõ mijẽ wekoawerà jypy remẽwarà. Ãmẽ ywesõ nikatu'ãi mirà pè. Ipojy ai tètà ijupe ky'y. Ãmẽ ywesõ ojimomorijauvaytà ãjãg kõ remijaraiwerà rõmõ iko ky'y. Ãwĩvotà nivoi mãe kõ pè age'e remẽ, [Janejare'e 'Ãg noinõokari sõ opy'a pupe remẽ,] e'i Jesu ijupe kõ.
Jesu y uu imõmirĩ kõ reve esa remẽwarà
(Maku 3.31-35; Rukasi 8.19-21)
46Ãmẽ ajaire Jesu poromo'e jẽ tetã mõ wyry pè upa. Ãmẽ tetã ypy pè ijy uu ãrõ, imõmirĩ kõ reve.
– Toroporegeta Jesu reve, e'i kupa.
47A'evoa ava mõ omome'u Jesu pè.
– Ney uu neresa, nemõmirĩ kõ reve. “Toroporegeta Jesu pè”, e'i neupe kupa. Wãime tui kupa upa, tetã ypy pè, e'i Jesu pè kupa.
48Ãmẽ Jesu e'i aepo e'i ijupe mã'ẽ pè:
– Aje, ey e'e teipe uu, e'i. Ãmõ, emõmirĩ kõ teve ipe uu, e'i.
49Ãmẽ ojipomomojai wemimo'earà kõ gyty erokwa.
– Pejẽ teve eretãrã kõ vo 'ejẽ, e'i. 50Papa yvapewarà remimota rupi ekoi mãe kõ pirujẽ eretãrã kõ vo 'ejẽ. Ajawyi “emõmirĩ kõ” a'e pejẽ. Ãmõ, “ekõjã kõ” a'e. Ãmõ, “ey kõ” a'e. Aepo a'e pejẽ, e'i.#12.50 “Ãwitõ ey, ãmõ, emõmirĩ kõ aau ipi, ãwĩvo ve aau Janejare'e koty rewarà kõ”, jaa tè aepo e'i mã'ẽ.
હાલમાં પસંદ કરેલ:
Mateusi 12: oymNT
Highlight
શેર કરો
નકલ કરો
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
