Torubu 3
3
Gusunɔ u win tɑkɑ koorɑ kpuro bɔ̃rusi
1N deemɑ wɑɑ yɑ bwisi bo ɡbeeku yɛɛ kpuro sɔɔ yi Yinni Gusunɔ u tɑkɑ kuɑ. Yerɑ yɑ nɑ kurɔ win mi, yɑ nùn bikiɑ yɑ nɛɛ, kɑ ɡem Gusunɔ u nɛɛ, i ku ɡbɑɑ tenin dɑ̃ɑ binu kpuro di?
2Mɑ kurɔ wi, u ye wisɑ u nɛɛ, sɑ rɑ ɡbɑɑ ten dɑ̃ɑ binu di ni, 3mɑ n kun mɔ te tɑ wɑ̃ɑ suunu sɔɔ. Terɑ u nɛɛ, su ku mɑm ten binu bɑbɑ su sere di su ku kɑ ɡbin sɔ̃.
4Yerɑ wɑɑ ye, yɑ kurɔ wi wisɑ yɑ nɛɛ, i ǹ ɡbimɔ pɑi! 5Domi Gusunɔ u yɛ̃ dɔmɑ te i ten binu di, bɛɛn nɔni koo wukiɑrɑwɑ kpɑ i n sɑ̃ɑ nɡe win tii, i n ɡeɑ kɑ kɔ̃sɑ yɛ̃.
6Mɑ kurɔ wi, u wɑ dɑ̃ɑ te, tɑ kɑ dii dobu weenɛ tɑ wɑɑbu wɑ̃, tɑ koo mɑɑ kpĩ tu nùn ko bwisiɡii. Mɑ u ten bii ni sɔrɑ u di. U mɑɑ win durɔ wɛ̃ kɑ wi bɑ wɑ̃ɑsinɛ, mɑ wi, u mɑɑ di. 7Yerɑ be yiru kpuron nɔni wukiɑrɑ bɑ ɡiɑ mɑ tererɑ bɑ wɑ̃ɑ. Mɑ bɑ dɑ bɑ dɑ̃ɑ te bɑ mɔ̀ fiɡien wuru bɑkɑsu burɑ bɑ swɛɛnɑ bɑ kɑ tii ɡɑndi.
8Ye bɑ Yinni Gusunɔn nɔɔ nuɑ u bɔsu ɡbɑɑ te sɔɔ yokɑ, yerɑ bɑ dɑ bɑ nùn kukue ɡbɑɑ ten dɑ̃nun suunu sɔɔ. 9Adɑmɑ Yinni Gusunɔ u durɔ wi sokɑ u nɛɛ, mɑnɑ ɑ wɑ̃ɑ.
10Durɔ wi, u wisɑ u nɛɛ, ye nɑ wunɛn nɔɔ nuɑ ɡbɑɑru sɔɔ, bɛrum mɑn mwɑ domi tererɑ nɑ wɑ̃ɑ, mɑ nɑ kukuɑ.
11Gusunɔ u nɛɛ, wɑrɑ nun sɔ̃ɔwɑ mɑ tererɑ ɑ wɑ̃ɑ. Nɡe ɑ dɑ̃ɑ ten binu diwɑ te nɑ nɛɛ, ɑ ku di.
12Durɔ wi, u nɛɛ, kurɔ wi ɑ mɑn wɛ̃ u n kɑ mɑn wɑ̃ɑ wiyɑ mɑn dɑ̃ɑ ten binu wɛ̃ mɑ nɑ di.
13Mɑ Yinni Gusunɔ u kurɔ wi bikiɑ u nɛɛ, mbɑn sɔ̃nɑ ɑ kuɑ mɛ.
Mɑ u wisɑ u nɛɛ, wɑɑ yɑ mɑn kɔkurɑ nɑ kɑ di.
14Yinni Gusunɔ u wɑɑ ye sɔ̃ɔwɑ u nɛɛ, yèn sɔ̃ ɑ kuɑ mɛ, ɑ kuɑ bɔ̃rurɑ n yɛɛ kpuro kere.
Wunɛn nukurɑ kɑɑ n dɑ kɑ kɑbiri.
Temɑ kɑɑ n dɑ di
sere kɑ wunɛn wɑ̃ɑrun nɔrɔ.
15Nɑ kon mɑɑ yibɛrɛ tɛɛru doke
wunɛ kɑ kurɔ win bɑɑ sɔɔ,
kɑ mɑɑ wunɛn bweseru kɑ win bweserun bɑɑ sɔɔ.
Win bweserun ɡoo u koo nun wiru kɔrɑ,
kɑɑ mɑɑ win nɑɑ tokuru mɛɛrɑ ko.
16Yerɑ u mɑɑ kurɔ wi sɔ̃ɔwɑ u nɛɛ,
kon wunɛn ɡurɑn wɑhɑlɑ sosi.
Kɑɑ n dɑ mɑwɑ kɑ nɔni swɑ̃ɑru.
Wunɛn kĩru kpuro tɑ ko n wɑ̃ɑwɑ wunɛn durɔ sɔɔ,
wiyɑ ko n mɑɑ sɑ̃ɑ wunɛn wiruɡii.
17-19U mɑɑ durɔ wi sɔ̃ɔwɑ u nɛɛ, yèn sɔ̃ ɑ wunɛn kurɔn ɡɑri wurɑ, mɑ ɑ dɑ̃ɑ ten binu di te nɑ nɛɛ, ɑ ku di,
nɑ tem bɔ̃rusi wunɛn sɔ̃.
Sɑ̃kunu kɑ ɑwĩiyɑ mu koo nun kpiiyɑ,
wunɛn wɑ̃ɑru kpuro sɔɔ,
nɔwiɑwɑ kɑɑ n dɑ ko
kpɑ ɑ wɛnyɑ ɑ sere wunɛn dĩɑnu wɑ ɡberɔ.
Yen biru kɑɑ ɡbi
kpɑ bu nun sike temɔ,
domi temɑ nɑ kɑ nun kuɑ.
Kɑɑ mɑɑ wurɑ ɑ ko tem mɛ.
20Mɑ Adɑmu u win kurɔ yĩsiru kɑ̃ Efɑ, domi wiyɑ u sɑ̃ɑ tɔmbu kpuron mɛro. 21Mɑ Yinni Gusunɔ u Adɑmu kɑ win kurɔ yɑɑ ɡɔnɑn yɑbenu kuɑ u bu sebusiɑ.
22Mɑ Yinni Gusunɔ u nɛɛ, wee tɔnu wi, u kuɑ nɡe mɛ nɑ sɑ̃ɑ, u ɡeɑ kɑ kɔ̃sɑ ɡiɑ. Tɛ̃ nɑ ǹ kon de u dɑ̃ɑ bii ni nu koo nùn wɑ̃ɑru wɛ̃ sɔri u di u n kɑ wɑ̃ɑ kɑ bɑɑdommɑɔ.
23Yerɑ u nùn ɡirɑ Edɛnin ɡbɑɑ ten min di u dɑ u tem wuku mɛ u kɑ nùn mɔmɑ. 24Nɡe mɛyɑ u kɑ Adɑmu ɡirɑ mɑ u wɔllun kɔ̃sobu doke Edɛnin ɡbɑɑ ten kɔnnɔwɔ, ɡe ɡɑ wɑ̃ɑ sɔ̃ɔ yɑri yerun berɑ ɡiɑ. Bɑ tɑkobi nɛni bɑ ye fĩɑmɔ mɑ yɑ bɑllimɔ sɔ̃ɔ sɔɔ nɡe dɔ̃ɔ yɑrɑ, bɑ kɑ dɑ̃ɑ tèn binu nu koo tɔnu wɑ̃ɑru wɛ̃ kɔ̃su.
હાલમાં પસંદ કરેલ:
Torubu 3: BAR
Highlight
શેર કરો
નકલ કરો
Want to have your highlights saved across all your devices? Sign up or sign in
Bariba Bible © UEEB/SIM au Benin, 1996.