San Juan 9
9
Bi eewe dau khĩsu thaabatarr Jesuu monaautarr
1Mag ich mokou baraag ẽkha nʉm ee, Aai i jeeujem degmua oberwia Jesuu woun ãb bi eewe dau khĩsu thaabatarr ooimajim. 2Mag oobaimaawai maach i dʉi ogdʉba wenʉrraajerr khʉʉnauchata marau maach Maestroog jeeujim, ajapcharan ich Jesuugma, jãgwi mag woun dau khĩsu thaabajĩ: ¿ich dennaan pekau gaaimua ajĩ, wa ichdeucha pekau wautarr gaaimua ajĩ? 3Mag ichig jeeubaawai Jesuu magjim marag:
—Jã chan ich pekau gaaimua khaba, ni ich dennaan pekau gaaimuajã khabajimgui ajim. Jãg thaabatarran, jãan jãg dau khĩsu sim gaaimua Ẽwandamau ich jua theeg õrag oopiegta jãg thaabapijimgui ajim. 4Magnaa marag, Pãrau khaphʉ nʉmgui ajim, ãsdaaupaita phidkhaajem. Edau kheubaadeewai tag phidkhaba aajem. Ich agjota simgui ajim, Ẽwandamau nem waupi sim wawaagjã. Magua muajã mʉch meebam aig chan jua ʉ̃ʉijem ed awiajã mʉch pʉitarrau jaaupʉitarr phidag pʉaba ich mag wau chitajugui ajim. Magbamʉn mʉg chitawi mʉ meebaadeewai ya tag magʉm phidag wauju khaba aadejugui ajim. 5Mʉʉta mʉig eegar mʉg jẽb gaai chirʉm aiguin mʉchta õor atheem araragaugui ajim.
6Maimua mag iekhanaa, jẽb gaai icho thunaa, mag icho eepai jẽb wãwãkha waunaa, agua chi dau khĩsu khitarr dau phuurpʉijim. 7Mag phuurpʉinaa irig, —Jãimua Siloé ee mawia pʉch dau sũgbapʉimí ajim.
Mag thʉrrdo Siloé anʉm maach meúan “pʉitarr” a simʉu. Ichig mag jaaubaawai chadcha chi dau khĩsu khitʉmua mawia ich dau sũgbapäaiwai daujã wajaug aadejim anaabá. Mag, ag na dau khĩsu khaba sĩerrjo dau monakkha ich di aar barjim aajem. 8Mag daujã wajaug sĩsim oobaawai i dʉi di dakha naajerr khʉʉnau maimua ag nawe sĩi dich nʉm khʉʉnag i nem inagdam jeeu sim oojerr khʉʉn dʉimua amach wir aigpai, “¿Ma, jã ar dau khĩsu khitarr sĩi õor dich nʉm khʉʉnag dau aphʉʉ nemdam jeeujerr khabamá?” aajeejim anʉm.
9Magbaawai ãaur khʉʉnau, “Chadcha, ichma” anʉm ee, jũrr bigaaum khʉʉnau, “Ãhã, jã chan ar khabam, sĩita arjoo simgui” aajeejim aajem.
Pari magbaawai amau mag nʉm ee, jũrr ichdeu, “Mʉ ich ar khabahab” aajeejim anʉm.
10Amachig magbaawai, —¿Magan jãga jãg pʉ daujã wajaug aadejĩma? a jeeujeejim anʉm amach garmua.
11Magbaawai ichdeu, —Jãan woun ãb ar Jesús aajemuata icho ee jẽb wãwãkha waunaa, agua mʉ dau phuurnaa mʉrʉg, “Chum Siloé ee mawia pʉch dau sũgbapʉimí” abaawai, chadcha mua i ipierr mawia mʉch dau sũgbapäaiwaita chadcha mʉ daujã wajaug aadejimgui aajeejim aajem amag.
12Magbaawai deeu amachdeu irig jeeumamua, —¿Jam sĩ mag pʉ dau monaautarr woun? abaawai, —Mua khaugbam jam sim khai aajeejim anʉm ichdeu.
Fariseonaanau mag chi dau khĩsu khitarrag jeeutarr
13-14Pari Jesuu mag icho jẽb ee waaureunaa woundam dau khĩsu khitarr monaautarr jua ʉ̃i kheeujem ed arr aawai fariseonaan aar i warrjierram aajem. 15Mag amach aar wai barbaimaawai irig jeeumamua, —¿Jãga jãg pʉ daujã wajapha chirsijĩ? ajierram anʉm.
Magbaawai i iek irua jaaubaadewi, —Icho ee jẽb waaureunaa mʉ dau phuurpʉinaa, ʉpi jaaubaawai, i ipierr awiata mua wajapha oo chirsijimgui ajim aajem.
16Irua magbaawai chi fariseonaan ee ãaur khʉʉnau, —Chi pʉ dʉi magtarr woun chan magan Ẽwandamau pʉitarr khabam; maguata mʉg jua ʉ̃ʉijem edjã ʉʉrkhaba simgui ajierram aajem.
Pari maagwai jũrr ãaur khʉʉnau, —Pari i Ẽwandamau pʉitarr khaba akhiin, ¿jãga irua jãg Ẽwandam jua theegau õor monaaubarju? Pekau paraam khʉʉnau chan pod i denjo jãgbamgui aajeejim anʉm.
Amach magphobaadem gaaimua warag amach eepaijã ihãba iekhaba nʉm iekhau 17warag chi dau khĩsu khitarragta, —Pua khĩirjuawai ¿khanim woun agá? Pʉ dauta irua monaautarr aawai puata i jaauju aai chirʉmgui aajeejim anʉm irig.
Magbaawaita ichdeu, —Mua oowai merag chukhu sim, jãan ich Ẽwandam jua theegau nem wau nʉrrʉmta jãg nʉrrʉmgui ajim aajem.
18Pari mag dau khaugba khitarrta dau wajapha monaau sĩsimjã judionaan chi pornaanau ʉkhamapha naajim anaabá. Mag ʉkhamaaugau, i iek warag i dennaanta thʉ̃rkha auwi amagta, 19—¿Chadcha mʉg woun pãar chaairá? ajim anʉm. ¿Pãachdeujã pãrau chadcha bi eeweta dau khaugba thaabajim anʉ́? Magtarrta ¿jãga ĩs jãg dau wajapha oo simma? a jeeujierram aajem chi dennaanagcha.
20Magbaawai chi dennaanau, —I chadcha maar chaai khabahab; aauwai chadcha bi eeweta dau khĩsu khitabajieb ajierram aajem. 21Pari i dau monaautarr chan marau khaugba nʉm, jãga awiata ĩs jãg dau wajapha sĩsi, ni khaíuta i dau monaaubarm khai. Ichigchata jeeubat ajierram anʉm. Ya i chi jooi aawai ichdeuta irua pãrag jaauju aai sĩebá ajierram aajem amag.
22Pari amau jaaumapha magpai jaau narran, ar Jesús igwiata chadcha ich warrgarwe pʉiju aajerrta jãg nʉrrʉm a iekha nʉm khʉʉnan judionaan chi thethem khʉʉnau Ẽwandam iek jaaujem degjã tag dubpiba aag ya ibep nʉm khaphʉ narr aawaita magpai jaau naajim anaabá. 23Maguata amau sĩi, “Ichigta jeeubat, ya i chi jooi khabahab ichdeucha pãrag khap jawaag” aajeejim aajem warag chi fariseonaanagta.
24Magbaawai i iek chi thethemnaanau deeu ichchata thʉ̃r aunaa, —Chadcha Ẽwandam dakhĩir meerba marag jaaubá ajierram anʉm. Oob Jesuuta pʉch monaaujim am. Marau khaphʉ nʉmgui ajierram anʉm, jãan pekau pom sĩerrʉm.
25Magbaawai ichdeu, —Mua chan khaugba chirʉm, í mag pekau pom sĩ wa pekau chukhu sĩ a chirajim aajem irua. Ãba mua khaphʉ chirʉmʉn, warr chadcha mʉ dau khĩsu chirajim, pari magtarrta ĩs mua wajapha oo chirʉm. Maata mua khaphʉ chirʉmgui ajim anʉm amag.
26Magbaawai ũwaai amachdeu wajapha jejewagmamua, —¿Ma jãga ajĩma pʉ dʉi? ¿Khanta jãgjĩ pʉ dau eerdʉpieg? ajierram anʉm irig.
27Magbaawai ichdeu, —Ya khabá mua pãrag jaaubarmgui ajim anʉm. Magʉmjã pãrau ʉkhab nʉm. Mag nʉmta ¿khan atchata deeu ũwaai jaaupi nʉmma? ¿Wa mag jaaubaawai i iek ʉkhawia pãachjã i khapeenkhaagwa? ajim aajem.
28Magbaawai irig ich khĩircha iekha thʉnʉʉuwia magjierram aajem:
—Pʉchin pʉ i igar chirama; pari maran Moisés igarta nʉm. 29Marau khaphʉ nʉmgui ajim anʉm, Moiseegan ich Ẽwandamauchata iekhajim; pari jã chan marau khaugbamgui ajierram aajem, jammuata jãg nʉrraichejim khai.
30Magbaata irua mag chirajim aajem:
—Ʉ̃khabam. Magan pãrau chan khaugba naabma ajim anʉm, jammuata i beejĩ; pari mag simuata mʉ dau monaaupʉijim. 31Maadeu khaphʉ nʉmgui ajim anʉm, sĩi parhooba pekau pomkham khʉʉn iek Ẽwandamau ũrba aajem. Irua ũurjemʉn, ichig jeeunaa ich ipierraa nem wau nʉm khʉʉn iekta ũurjem. 32Pãraujã khaphʉ nʉmgui ajim anʉm, bʉ̃ʉrjã ag na õrau mʉg mʉjo bi eewe dau khĩsu thaabatarr khʉʉn dau wajaug paa au nʉm anʉm ũrba aajem. 33Mʉg mʉ dau wajapha apitarr woun ich Ẽwandamau pʉitarr khaba akhiin, irua jãgʉm nem pod wauba aajeekhamgui ajim aajem amag.
34Amachig magbaawai sereu phobaadewi irig, —Pʉ sĩi dau aug pekau pom thaabatarrta, ¿khani mag sĩma? ¿Wa puata maar khãaijã khapcha sĩwa ajierram anaabá, marag jawaag?
Maimua tag Ẽwandam iek jaaujem degjã dubpiba, warag amach aigmua i jʉrpʉijierram aajem.
Khaphʉ nʉm anʉmta dau khĩsumjo nem waaujem khʉʉn
35Chi judionaanau mag woundam dʉi magtarr Jesuu khaug athajim. Maimua ag khur chi woundam oobaimaawai ich Jesuu irig, —¿Pua chadcha Emkhooi Iewaa iek thãraucha ʉkha chirʉ́? a jeeujim.
36Magbaawai jũrr ichdeu, —Señor, ¿ma khaíuma? Mʉrʉg wajapha jaaubá ajim, mua khaphʉ aadeewai i iek ʉkhaag.
37Magbaawai, —Pari ya khabá pua mʉ oo sima; mʉchta pʉ dʉi iyʉʉ chirabahab ajim jũrr ich Jesús garmua irig.
38Jesuu ichig magbaawai, i khĩirphee thʉkhoonaa irig, —Señor, ĩsin mua chadcha khaphʉ chirʉmgui ajim, pʉʉta ich Ẽwandamau pʉitarrau.
39Magbaawai Jesuu irig magjim:
—Mʉ beetarran, khaíuta chadcha Ẽwandam iek ʉkha sĩ wa khaíuta ʉkhaba sĩ a khap amkhĩirta beejimgui ajim. Ar dau khĩsu khitheem khʉʉnjo amach khaibag ee nʉm khaphʉ nʉm khʉʉn peerdʉ aunaa ĩchab ar jũrr wajapha nʉm anʉm khʉʉnta amach pekau gaaimua khĩchag eemjo nʉm jawaanta beejimgui ajim.
40Jesuu magbarm ũrwia fariseonaan eem ãaur khʉʉn aig narr khʉʉnau irig, —Pʉrʉgan magan maran dau khĩsuta naabma ajierram.
41Magbaawai Jesuu, —Pãar chadcha dau khĩsu naawaita jãg naakhiin, pãar pãach pekau gaaimua kulp pomcha khaba naakhamgui ajim. Mamʉ magba pãar iek mag wajapha khaphʉ nʉm anʉmta juau jãg nem khaigba waum khõchgau mʉ igbam gaaimuata, pãar Ẽwandam dʉi iekkhõr pooma nʉmgui ajim Jesuu amag.
હાલમાં પસંદ કરેલ:
San Juan 9: noaA
Highlight
શેર કરો
નકલ કરો
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
