San Juan 10
10
Oveja thʉamie ich nemchaain dʉi
1Maimua mag iekhamamua Jesuu amag mʉg ejemplo jaaujim:
—Ar oveja phãarkha thʉnʉm aar dubaag ẽkha simta puertdi garmua dubba sĩi chi thuur phʉʉrdʉ sim ʉ̃rta waaidʉ dich sim wounan, maan sĩi nem jĩgmie aawaita mag simgui ajim. 2Pari magba puertdi garmuata dub simʉn, ma chi pastorrau, chi thʉa. 3Magʉg mag chi oveja ierr phãarkha thʉnʉm puertdi aig simuajã ʉdʉraa dubpijugui ajim. Mag dubwi chi pastor amach oo phe wai nʉrraajemua aawai amach thʉ̃r gaai thʉ̃rbaimaawai amachdeujã i khaug aaujerram. Mag warag dawag phe arrwia 4ya thum daau paaukhabaadeewai, am na dʉnʉisie amachdeujã i ẽudee weetjemgui ajim, ya amach ich mag phe wai nʉrraajem dʉi aawai. 5Pari magba jũrr õor amachdeu khaugbam khʉʉnauta am thʉ̃rchekhiin, mag dʉi chan wetba, warag parhoobata khaphig phobaadejugui ajim, i okgau. Amau amachdeu õor khaugbam khʉʉn iekjã khaphʉ aajemgui a jaaumajim Jesuu.
6Jesuu mag amag jaaumarran, jãg chi oveja thʉajemua ich nemchaain oopaar phe wai nʉrraajemjo iruajã ich iek ʉkha nʉm khʉʉn dʉi ich agjota aajem a sim ajim. Pari mag jaaumamta aig i iek ũr narr khʉʉnau pod khaug auba, sĩi oveja chaarta jaau simpii naajim.
Jesús chi Pastor chaar
7Maimua deeu ich ag iekpai igwia Jesuu amag, —Muan chadcha pãrag, “Mʉʉta makhʉʉn oveja duubjem puertdiiu” a chirʉmgui ajim, õor i iek ʉkha nʉm khʉʉnan i gaaimuata ʉ̃gtharjã oberju igwia.
8Maimua chi fariseonaan khĩir iekhamamua, —Ar mʉ beeju nawe seukha amachdeupai amauta Ẽwandam iek jaau nʉm awia sĩi õor khũgurnaa amachigta ee apiejem khʉʉnan nem jĩgkhamienaugui ajim. Pari jãg oveja charau amachdeu õor khaugbam khʉʉn iek asekasba aajemjo, mʉg chadcha mʉ iek ʉkha nʉm khʉʉnau chan par am mag seukha wenʉrrajieb mamʉ, am iek asekasbajierramgui ajim. 9Magnaa amag, Mʉʉta puertdi charau; chi mʉ iek ʉkha nʉm gaaimuata peerdʉ nʉm khʉʉnan chadcha mʉ denkham iekta mʉ denkha nʉisimgui ajim. Chi mag nʉisim khʉʉnagan, jãg chi pastorrau ich nemchaain wajapha oopaar phũak khopi wai nʉrraajemjo, muajã ĩchab am thʉa wai chitajugui ajim.
10’Pari magba ar seukha chikham khũguurjem khʉʉnan, chikham õorta jũrr amachig paa aumam gaaimua chikhamnaan ovejata jĩgkha aumamjo sĩerrjeemgui ajim. Mag nʉmʉn pari sĩi amach iek ʉkhabarmuata chadcha peerdʉju a jaauwai warag ʉdʉʉr ʉ̃gtharcha oberpiejem iekjã ũrpiba, õor khĩirjug ãrpʉi nʉmta mag nʉrrjee aajemgui ajim. Mamʉ mʉ chan am denjo magaagta beebajim. Mʉʉn sĩi mʉchdeu Ẽwandam iek jaau chitʉmta ʉkhabarmʉn, ich mag i denkha wenʉrranaa mʉig eegarwejã onee amkhĩirta beejimgui ajim. 11Magnaa, Mʉʉta Pastor chaar chi wajapcharamʉugui ajim. Pastor chi wajapham abarmʉn ich nemchaain peerdʉ awaagjã ichta ʉdʉraa thõopiejemgui ajim. 12Pari magba ar pastor anʉm khʉʉnjã sĩi phatkhon atheepai thʉnʉm khʉʉnan, lobou nemchaain pʉraan urum oowaijã warag amachta khaphigbaadeejem. Amach nemchaain khaba aawai bʉ̃ʉrjã am gaai mas khaba sim. Mag warag parhooba nemchaain dau aphʉʉ aaidʉpiejemgui ajim. 13Mag warag pastornaan anʉmta amachdeupa ogkhawia khaphig phobaadeejemgui ajim, nemchaain thʉam khõchgau khaba sĩi phatkhon atheepaita naawai.
14-15Maimua mag iekhamamua deeu ichdeupai, —Mʉʉta Pastor chaar chi wajapcharamʉugui ajim ich igwia. Ich jãg mʉ Ayau wajapha mʉch khaphʉnaa muajã mʉch Aai khaphʉ chitʉmjo, mʉch igar nʉm khʉʉnjã mua khaphʉ chitʉm; maagwai amachdeujã mʉ khaphʉ aajemgui ajim. Chadcha mʉch den aawai mua am kõit ʉdʉraa mʉch thõopijugui ajim, am peerdʉ awaag. 16Pari agjo deeum khʉʉn thʉnʉmgui ajim, mʉg israelnaan khabam khʉʉn. Makhʉʉnjã mua ãbamʉg jʉr phe aujugui ajim, amaujã mʉ iek ũrbaawai ʉkhamkhĩir. Mag, israelnaan dʉi pap ãbam denkha nʉisiewai mʉchta am Pastorkha chitajugui ajim, amach thum ãba thʉa wai chitaag.
17’Magua, mag pastor wajaphamjo õor kõit ʉdʉraa mʉch thõopiju aawai mʉ Ayau mʉ daupii wai simgui ajim. Pari mag ʉdʉraa mʉch thõopiwiajã deeu iiu phiidʉjugui ajim. 18Mag mʉch thõopiju a chirʉm chan, ajués chikhamnauta mʉrʉg magpi naawai khaba, mʉch khĩrauta õor kõit mʉch thõopijugui ajim, am peerdʉ awaag. Mʉ Ayau mʉrʉg magta apitarr aawai mua chadcha ʉdʉʉr mʉch thõopiju aai chirʉm. Pari deeu ũwaai mag iiu phiidʉagjã jua theeg chirʉmgui ajim am jʉ̃g daar.
19Pari chi judionaan chi pornaanau Jesuu mag iekhabarm ũrbaawai, amach pem aawai, deeu ũwaai sĩi chum aaiphur iyʉʉ ihãbajã khaba nʉisim iekhau, 20khapankham khʉʉnau warag amach khapeenag, —¿Khanthee pãrau i iek ũr nʉma? Jã sĩi ich por ee dosãt ben wai simua lokoo sĩewaita mag iekha sĩebahab aajeejim, chi Jesús igwia.
21Pari magbaawai ãaur khʉʉnau mag nʉm ee, jũrr warm khʉʉnau, —Pãar dak por ee dosãt ben paraam khʉʉnau i denjo mag iekhajupa anaajim. ¿Wa pãrau khĩirjuawai meperau dau khĩsum khʉʉnjã daujã wajaug apiju aai sĩwa? aajeejim, ich Jesuu bi eewe dau khĩsu thaabatarr monaautarr igwia.
Jesuu mag iekhatarr mag phiesta Las Enramadas anʉm dichtarr khur ajim.
Judionaan chi pornaanau Jesús isegtarr
22Maimua ag khur nʉʉ awia Jerusalén phobor ee deeum phiesta wau naajim, Aai i jeeujem di eu aaipawia di theerthʉgtarr phiesta. Magtarrta ewag pawiajã ich ag edau paawai ich mag phiesta waaujeejim. Mag phiesta noseg jaar ajim. 23Maigta Jesús phʉʉrdʉ nʉrrajim daaugajãr Aai i jeeujem di bigaau, “Pórtico de Salomón” a thʉ̃r sim ee, dijãjo nem pom weu wejom ee. 24I mag nʉrrʉmta judionaan khapan i aig pos aichewia irig, —¿Jãagwaita pua marag meerba pʉch jaaujuuta jãg sĩma? Pʉʉta chadcha warrgarwe ich Ẽwandamaucha pʉiju aajerr khai, warre marag jaaubá ajierram, marau khap aag.
25Magbaawai ich Jesuu amag, —Mua khabá ya pãrag jaaubarm, pari pãrau ʉkhamapha nʉmgui ajim. Mʉ Ayau mʉchig waupitarrjo wau chitʉm oo nʉm gaaimua pãrau khaphʉ aju aai nʉm, mʉ chadcha ichdeu pʉitarr. 26Pari chaig mʉchdeu jaau chirarrjo, pãar mʉ igar khaba naawai, mua mag mʉ Ayau mʉ pʉijim a jaau chirʉmjã pãrau ʉkhaba nʉmgui ajim. 27Chadcha mʉ denkha nʉm khʉʉnaun, jãg ovejanaanau iek gaaipai amach pastor khaug aaujemjo, mʉjã khaphʉ nʉm, mʉ khai agá; maagwai mʉchdeujã mua am khaphʉ chitʉmgui ajim. Mag mʉ khaphʉ naawai mʉʉta am na dʉnʉisimʉn, amachdeujã mʉ ẽudee weetjemgui ajim. 28Magbaawai mʉchdeuta mʉch Aai aar am oberju aai apiejem, tag okhooba sĩi i chaainkha ich mag wenʉrramkhĩir. Ya magbarm chan ni ãbmuajã mʉ jua eem khechthʉg aubamgui ajim. 29Mʉ Aai ichta thumaam khʉʉn khãaijã ʉ̃rpai sĩerrʉmuata mʉrʉg makhʉʉn deejimgui ajim. Mag ichta ʉ̃rpai sĩerrʉmua deetarr aawai ãbmuajã i jua eemjã pod khecheubamgui ajim. 30Magnaa, Mʉ mʉch Aai dʉin maran ich ãbampaiugui ajim.
31Amachig magbaawai chará chi judionaan ũwaai sereu phobaadewi deeu i mokou barm ig naajim. 32Pari mag nʉm ee Jesuu amag magjim:
—Mʉ Ayau ich jua theeg mʉrʉg deetarrau mua chadcha pãar dakhĩir nem wajapham pom khĩir pogkhe wauwia chirʉm. Pari mag nem khĩir pogkhe wautarr ee, ¿chijãg gaaimuata pãrau mʉ mokou barm ig nʉ? ajim.
33Magbaawai chi judionaan chi pornaanau, —Marau chan mag pua nem wajapha waaujem gaaimuata pʉ mokou baraagpam aba nʉm. Marau chadcha pʉ mokou barm ig nʉmʉn, pʉch iek gaaimuapaita pʉ barm ig nʉmgui ajierram irig, mʉg maach ãba thum agdaujopai thʉnʉmta pʉ iek mag pʉʉn Ẽwandamau anaawai.
34Magbaawai ich Jesuu amag, —¿Pãrau oowai mua magju khaba chirʉ́? ajim. ¿Pãrau khĩir eyaa khaba nʉ, ar Ẽwandamau pãar jooinag ich iek phãpitarr gaai, “Pãran ẽwandamnaanau” a phã sim? 35Irua magtarran ich i jaaumkhĩir jʉr autarr khʉʉn igwiata mag sĩejimgui ajim. ¿Pari makhʉʉnjã agjo mʉig eegarm khʉʉn khabajĩ? Magua maadeu khaphʉ nʉmgui ajim, ich Ẽwandamauta mag phãpitarr aawai mua mag mʉʉn Ẽwandam Iewaau a chirʉm aig pãrau mua khaigba iekha chirʉm aju khaba nʉmgui ajim. 36Ich Ẽwandamauta ich aarmua mʉ jʉr auwia mʉg jẽb gaai pʉitarrta, ¿jãga pãrau mʉrʉg mag mua khaigba iekha chirʉm abarju, mua Ẽwandamag Aai icheewai? 37Pãachdeu oowai mua mʉch Ayau nem waaujem khĩir waubata chirʉm khai, magan oob mʉ iek ʉkhamiet ajim. 38Pari pãachdeu oowai muajã irua nem waaujemta wau chirʉm khai, mʉ iek ʉkhaba awiajã khaphʉ abat ajim: ich Ẽwandam chi Aaijã mʉ dʉi sim, maagwai mʉchjã mʉch Aai dʉi chirʉm.
39Pari ich Jesuu magbaawai ũwaai i pʉr auju ẽkhajierram. Pari ich pʉr aupiba, ʉu peerdʉ kheerbaadejim.
40Maimua mawia ag na Juan chi õor por choomieu Jordán ee õor por choo sĩerr gar dʉrbawia maig sĩsijim, edau obeerjem gar. 41Mag i maig sĩeimaawai õor pom i aar wetwia amach eepai, —Keena, chadcha Juanau chan mʉg Jesús denjo ag na õrau nem ooba aajemjã wauba khitajim. Mamʉ irua ich mʉg woun igwia nem jaaujerran, chadcha thumaa ich ag eeta jaaumajimgui ajierram.
42Maig irua Ẽwandam iek jaau sim ũrwia õor khapankham khʉʉnau i iek ʉkhajierram.
હાલમાં પસંદ કરેલ:
San Juan 10: noaA
Highlight
શેર કરો
નકલ કરો
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
