Lik 23
23
Zezi devan Pilat
(Mat 27.1-2, 11-14; Mrk 15.1-5; Zn 18.28-38)
1Alor, lasanble antye ti leve e anmenn Zezi devan Pilat, 2kot zot ti konmans akiz li. Zot ti dir, “Nou'n trouve ki sa zonm pe met troub dan nou nasyon. I defann nou pey taks Sezar, e i pe dir ki se li menm Mesi, en lerwa.”
3Pilat ti demann li, “Eski ou lerwa bann Zwif?”
Zezi ti reponn, “Ou menm ki pe dir.”
4Alor, Pilat ti dir avek bann gran-pret ek lafoul, “Mon pa trouv okenn rezon pour kondann sa zonm.”
5Me lafoul ti ensiste. Zot ti dir, “Par son lansennyman, i pous lepep pour revolte. I'n konmans ansennyen depi Galile, partou dan Zide; aprezan in ariv isi.”
Zezi devan Herod
6Kan Pilat ti antann sa, i ti demande si Zezi ti en Galileen. 7Kan i ti aprann ki Zezi ti sorti dan rezyon kot Herod ti gouverner, i ti anvoy li kot Herod, ki ti osi Zerizalenm sa letan.
8Herod ti byen kontan kan i ti war Zezi, akoz i ti'n antann koz bokou lo son size, e depi lontan i ti anvi fer son konnesans. I ti espere war li fer en mirak.
9Herod ti kestyonn li pandan lontan; me Zezi pa ti reponn nanryen. 10Bann gran-pret ek bann profeser Lalwa ki ti pe debout lanmenm, ti akiz li avek tou zot lafors. 11Herod ek son bann solda ti monk Zezi e ensilte li. Apre, zot ti abiy li dan en lenz klate, e fer li retourn kot Pilat. 12Sa menm zour, Herod ek Pilat ti refer zanmi, akoz avan sa, zot ti lennmi.
Zezi I Ganny Kondannen Anmor
(Mat 27.15-26; Mrk 15.6-15; Zn 18.39—19.16)
13Pilat ti konvok bann gran-pret, bann dirizan ek lepep. 14I ti dir zot, “Zot in anmenn sa zonm kot mwan e zot in dir ki i pe met troub parmi lepep. Mon'n kestyonn li devan zot; me mon pa'n trouv li koupab pour okenn sa bann lakizasyon ki zot in mete kont li. 15Herod osi pa'n trouv li koupab. Pour sa rezon ki i'n retourn li kot nou. Donk, sa zonm pa'n fer okenn fot ki merit lanmor. 16Alor, mon ava fer fwet li, apre mon ava larg li.”
17Sak lafet Pak, Pilat ti annan koutim larg en prizonnyen#23.17 Napa sa verse dan plizyer ansyen maniskri. War Mat 27.15; Mrk 15.6..
18Me zot tou zot ti kriy ansanm, “Touy sa zonm! Larg Barabas.”
19Barabas ti dan prizon pour en krim ki i ti'n fer pandan en revolt dan lavil.
20Pilat ti oule larg Zezi. Alor, i ti adres lafoul ankor. 21Me zot ti kriye, “Krisifye li! Krisifye li!”
22Pilat ti demann zot en trwazyenm fwa, “Me ki mal sa zonm i'n fer? Mon pa trouv nanryen mal ki i'n fer pour merit lanmor. Alor, mon ava fer fwet li, apre mon ava larg li.”
23Me lafoul ti ensiste. Zot ti kriy ankor pli for ki Zezi i devre ganny krisifye. 24Alor, Pilat ti deside akord sa ki zot ti pe demande. 25I ti larg sa zonm ki ti'n ganny met dan prizon pour revolt ek krim. I ti livre Zezi dan zot lanmen pour fer sa ki zot anvi avek li.
Lo Semen Kalver
(Mat 27.32-44; Mrk 15.21-32; Zn 19.17-27)
26Pandan ki zot ti pe anmenn Zezi, zot ti rankontre en zonm ki ti apel Simon, en zabitan Sirenn ki ti sorti dan lakanpanny. Zot ti fors li anmenn lakrwa deryer Zezi.
27En gran lafoul ti pe swiv Zezi. Ti annan bann fanm ki ti pe plere e lamante lo son sor. 28Zezi ti vire. I ti dir zot, “Bann fiy Zerizalenm! Pa bezwen plere pour mwan, me pler pour zot menm ek zot bann zanfan. 29Ler pe vini kan dimoun pou dir: Ere bann fanm steril ki pa'n zanmen fer zanfan, ni donn tete. 30Alor, dimoun pou dir avek montanny: Tonm lo nou! E avek kolin: Kouver nou#23.30 Oz 10.8.! 31Akoz si zot tret dibwa ver konmsa, ki pou arive avek dibwa sek?”
32Zot ti pe anmenn osi de zonm, de kriminel, pour krisifye zot ansanm avek Zezi. 33Kan zot ti ariv dan landrwa ki ti apel Krann, zot ti krisifye Zezi ek sa de kriminel, enn lo son kote drwat, lot lo son kote gos. 34Zezi ti dir, “Papa! Pardonn zot, akoz zot pa konnen ki zot pe fer.”
Zot ti tir osor pour partaz son lenz#23.34 War Ps 22.19.. 35Lepep ti pe debout la pour gete. Bann sef Zwif ti boufonn li#23.35 War Ps 22.8-9.: I ti sov lezot! Si li menm Mesi, sa enn ki Bondye in swazir, sov son lekor aprezan!
36Bann solda osi ti monk li e ofer li vineg#23.36 War Ps 69.22.. Zot ti dir, 37“Si ou menm lerwa bann Zwif, sov ou lekor!”
38Par lao son latet ti annan en lenskripsyon: Sa zonm i lerwa bann Zwif.
39Enn parmi sa de kriminel ki ti'n ganny krisifye, ti ensilte Zezi: Pa ou menm Kris? Sov ou lekor e sov nou osi!
40Me sa lot kriminel ti reprimann li, “Ou napa respe pour Bondye, alor ki ou'n ganny menm kondannasyon ki li. 41Nou, nou merit nou kondannasyon; nou pe pey pour sa ki nou'n fer. Me sa zonm pa'n fer nanryen mal.”
42Alor, i ti dir, “Zezi! Mazin mwan kan ou pou antre dan ou rwayonm.”
43Zezi ti reponn li, “Mon dir ou, sa i laverite: Ozordi, ou pou avek mwan dan paradi.”
Lanmor Zezi
(Mat 27.45-56; Mrk 15.33-41; Zn 19.28-30)
44Ver midi, partou dan pei ti fernwanr ziska 3 er apremidi. 45Soley ti'n disparet. Rido Tanp ti desir an de par milye#23.45 War Egz 26.31-33.. 46Alor, Zezi ti kriy avek en lavwa for, “Papa! Mon remet mon lespri dan ou lanmen#23.46 Ps 31.6..”
Kan i ti'n fini dir sa parol, Zezi ti rann son dernyen soupir.
47En zofisye Romen ki ti war tou sa ki ti'n arive, ti loue Bondye. I ti dir, “Sa zonm ti vreman en zonm zis!”
48Sa gran lafoul ki ti'n rasanble ti war sa ki ti'n arive. Zot ti retourn se zot an frapan zot lestoma. 49Tou bann dimoun ki ti konn Zezi ek bann fanm ki ti'n swiv li depi Galile, ti reste debout lwen. Zot ti pe get tou sa ki ti pe pase.
Zezi I Ganny Met dan Tonbo
(Mat 27.57-61; Mrk 15.42-47; Zn 19.38-42)
50Ti annan en zonm, sorti Arimate, ki ti apel Zozef. I ti bon, respektab e en manm Konsey. 51I pa ti dakor avek sa ki Konsey ti'n deside e avek sa ki zot ti'n fer. I ti pe atann Rwayonm Bondye. 52Zozef ti al war Pilat e demann li lekor Zezi. 53Alor, i ti fer desann lekor Zezi lo lakrwa e anvlop li dan en dra. I ti depoz li dan en kavo, kot personn pa ti ankor deza ganny antere. 54Sa ti ariv zour Preparasyon; saba ti pe al konmanse.
55Bann fanm ki ti'n akonpanny Zezi depi Galile, ti swiv Zozef. Zot ti get tonbo Zezi e ki mannyer zot ti'n depoz son lekor. 56Alor, zot ti retourn se zot e zot ti prepar bann aromat ek parfen.
Zour saba, zot ti repoze, parey lalwa i ordonnen#23.56 War Egz 20.10; Det 5.14..
હાલમાં પસંદ કરેલ:
Lik 23: BSK
Highlight
શેર કરો
નકલ કરો
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
