Lik 21
21
Lofrann en Pov Vev
(Mrk 12.41-44)
1Zezi ti lev lizye. I ti war bann dimoun ris ki ti pe met zot lofrann dan trezor Tanp. 2I ti osi war en pov vev ki ti pe met de pti sou. 3I ti dir, “Mon dir zot, sa i laverite, sa pov vev in met plis ki tou lezot. 4Annefe, lezot in donn lo sa ki zot ti annan anplis, me sa vev, dan son mizer, in donn tou sa ki i ti annan pour viv.”
Zezi I Koz lo Destriksyon Tanp
(Mat 24.1-2; Mrk 13.1-2)
5Serten ti pe koz lo Tanp, ki mannyer i ti'n ganny dekore avek son bann zoli ros ek bann lofrann ki zot ti'n ofer Bondye. Zezi ti dir, 6“En zour pou arive kan tou sa ki zot pe war, pa pou reste en ros lo en lot; tou pou ganny zet ater.”
Troub ek Persekisyon
(Mat 24.3-14; Mrk 13.3-13)
7Alor, zot ti demann Zezi, “Met! Kan ki tousala pou arive, e par ki siny nou ava konnen ki sa bann keksoz i pre pour arive?”
8Zezi ti reponn, “Fer atansyon: Pa les zot ganny anbete. Annefe, en kantite pou servi mon non. Zot pou dir: Mwan menm Mesi. Sa letan in arive! Pa swiv zot. 9Kan zot pou antann lager ek bann revolisyon, pa bezwen per; akoz fodre ki sa bann keksoz i arive avan; me lafen pa pou ariv deswit.”
10Zezi ti azoute, “Nasyon pou lev kont nasyon, rwayonm kont rwayonm; 11pou annan gran tranblemandter, e dan plizyer landrwa pou annan lafanmin ek lepidemi. Pou osi annan bann fenomenn efreyan e bann gran siny dan lesyel.
12Me avan tousala, zot pou ganny arete, persekite e ganny anmennen dan bann sinagog e zet dan prizon. Akoz mon non, zot pou ganny anmennen devan bann lerwa ek bann gouverner. 13Sa i ava en lokazyon pour zot rann temwannyaz lo mon size.
14Met byen dan zot lespri ki zot pa bezwen trakase davans pour prepar zot defans. 15Annefe, se mwan ki pou donn zot parol ek lasazes, ki personn parmi zot lennmi pa pou kapab argimante, ni kontredir.
16Zot pou ganny denonse menm par zot paran, zot frer, zot fanmir ek zot zanmi. Plizyer parmi zot pou ganny kondannen anmor. 17Dimoun pou ay zot akoz mon non. 18Me pa en sel bren seve zot latet, pou perdi. 19Par zot perseverans, zot ava sov zot lavi.”
Destriksyon Zerizalenm
(Mat 24.15-21; Mrk 13.14-19)
20“Me kan zot ava war Zerizalenm anserkle par bann larme, zot ava konnen ki destriksyon i pros. 21Alor, bann ki dan Zide, sov dan montanny; bann ki dan lavil, sorti; bann ki dan lakanpanny, pa antre dan lavil. 22Sa pou bann zour vanzans, pour ki tou sa ki'n ekri, i ganny akonpli. 23Maler pour bann fanm ansent e bann ki pe donn tete pti baba pandan sa letan! Annefe pou annan gran detres dan pei, e lakoler Bondye pou ganny manifeste kont sa pep. 24Zot pou ganny masakre, e ganny anmennen koman prizonnyen parmi tou bann nasyon. Zerizalenm pou ganny kraze anba lipye bann etranze, ziska letan ki'n ganny determinen ava'n akonpli.”
Siny Letan Lafen ek Retour Zezi
(Mat 24.29-35; Mrk 13.24-27)
25“Pou annan siny dan soley, dan lalin e dan bann zetwal. Lo later, bann nasyon pou dan detres. Ler zot ava antann tapaz lanmer ek laroul, zot pa pou konnen ki zot pou fer.
26Zonm pou perdi konnesans avek lafreyer, ler zot ava mazin sa ki pou arive lo later. Annefe, bann pwisans dan lesyel pou dekontrole. 27Alor, zot pou war Fis-de-Lonm vini lo en nyaz avek gran pwisans ek gran mazeste#21.27 Dan 7.13.. 28Alor, kan sa bann keksoz ava konmans arive, dres debout e lev latet anler, akoz zot delivrans pe aprose.”
29Zezi ti dir zot en parabol, “Get pye fig ek tou lezot pye dibwa: 30De ki zot war bann fey i bourzonnen, zot konnen zot menm ki lete pe aprose. 31Ensi, kan zot ava war tou sa bann keksoz pe arive, konnen ki Rwayonm Bondye i pros.
32Mon dir zot, sa i laverite: Sa zenerasyon pa pou mor avan ki tousala i arive. 33Lesyel ek later pou disparet, me mon bann parol pa pou disparet.”
Reste Vizilan
34“Fer byen atansyon: Pa les zot lespri angourdi avek festen, labwason ek traka lavi. Fer atansyon ki sa zour pa sirprann zot 35parey en pyez, akoz i pou tonm lo tou bann zabitan later. 36Pandan sa bann zour, veye, pa arete priye. Konmsa, zot ava ganny lafors pour travers tou sa bann keksoz ki pou arive, e reste debout devan Fis-de-Lonm.”
Bann Dernyen Zour Zezi dan Tanp
37Lizour, Zezi ti ansennyen dan Tanp; me aswar i ti al pas lannwit lo montanny Zolivye. 38Depi granmaten, lepep ti vin kot li dan Tanp pour ekout li.
હાલમાં પસંદ કરેલ:
Lik 21: BSK
Highlight
શેર કરો
નકલ કરો
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
