Akt de Zapot 4
4
Pyer ek Zan devan Konsey Siperyer
1Pyer ek Zan ti ankor pe koz avek lafoul, kan bann pret, komandan Tanp ek bann Sadiseen ti arive. 2Zot ti byen ankoler akoz sa de zapot ti pe ansenny lafoul e anons zot ki Zezi ti'n resisite. 3Zot ti aret sa de zapot e ferm zot dan prizon ziska lannmen, akoz ti deza tar. 4Me bokou parmi bann ki ti'n antann sa mesaz ti krwar, e lakantite krwayan ti ariv anviron 5,000 zonm.
5Lannmen, bann sef Zwif, bann ansyen ek bann profeser Lalwa ti rasanble dan Zerizalenm. 6La prezan, ti annan Gran-Pret Hann, Kaif, Zan, Aleksann ek lezot manm dan lafanmir Gran-Pret. 7Zot ti fer anmenn bann zapot devan zot e demann zot, “Par ki pouvwar oubyen lo ki non ki zot in fer sa gerizon?”
8Alor Pyer, ranpli avek Lespri Sen ti dir zot, “Sef pep Izrael ek bann ansyen! 9Ozordi nou pe ganny kestyonnen konsernan dibyen ki nou'n fer anver en zonm paralize, e ki mannyer in geri. 10Alor, i enportan ki zot tou, zot ek pep Izrael antye, zot konnen ki, si sa zonm i la devan zot konpletman an bonn sante, se par non Zezi-Kri, sa Nazareen ki zot ti krisifye e ki Bondye in resisite. 11Lo li menm sa Zezi, ki Lekritir ti dir:
Sa ros ki zot, bann konstrikter, in rezete,
in vin li menm ros kwen prensipal,
ros pli enportan dan fondasyon#4.11 Ps 118.22..
12Zis li menm ki kapab sov zot, akoz napa okenn lot non dan lemonn antye, ki Bondye in donnen par lekel nou kapab ganny sove.”
13Bann manm Konsey ti byen etonnen. Annefe, zot ti war mannyer ki Pyer ek Zan ti koz avek lasirans. Zot ti osi rekonnet ki sa de zonm ti bann zonm senp, san gran ledikasyon. Zot ti osi rekonnet ki zot ti bann zanmi Zezi.
14Kan zot ti'n war sa zonm ki ti'n geri pe debout akote Pyer ek Zan, zot ti napa nanryen kontrer pour dir. 15Alor, zot ti fer sorti sa bann zonm, e zot ti diskit ant zot.
16Zot ti dir, “Ki nou pou fer avek sa bann zonm? Tou dimoun dan Zerizalenm i konnen ki sa mirak ekstraordiner in ganny fer par zot, e sa, nou pa kapab nye. 17Pour anpes sa nouvel fann plis parmi lepep, annou averti zot ki nou defann zot koz ankor avek nenport ki lo non Zezi.”
18Alor, zot ti apel sa bann zapot dan lasal e ordonn zot aret konpletman koz oubyen ansenny lo non Zezi. 19Me Pyer avek Zan ti reponn zot, “Zize zot menm devan Bondye, si i byen obei zot, plito ki obei Bondye. 20Kanta nou, nou pa kapab aret koz lo sa ki nou'n war e tande.”
21Bann manm Konsey ti menas zot ankor e apre larg zot. Zot pa ti trouv okenn rezon pour pini bann zapot, akoz lepep antye ti pe loue Bondye pour sa ki ti'n arive. 22Annefe, sa zonm ki ti'n ganny geri par sa mirak, ti annan plis ki 40 an.
Lapriyer bann Krwayan
23De ki zot ti'n ganny libere, Pyer ek Zan ti rezwenn zot bann zanmi, e zot ti rakont tou sa ki bann gran-pret ek bann ansyen ti'n dir zot. 24Kan zot ti antann sa zistwar, bann krwayan ti met zot ansanm pour priy Bondye, “Met! Ou ki'n kre lesyel, later, lanmer ek tou sa ki lo later e dan lanmer#4.24 War Egz 20.11; Ps 146.6.. 25Ou menm ki, par Lespri Sen e par labous David, nou zanset, ou serviter, in dir:
Akoz bann nasyon i azite?
Akoz lepep i fer bann konplo pour nanryen?
26Bann lerwa lo later in prepar lager,
bann sef in ini zot ansanm,
kont Senyer e kont son Kris#4.26 Ps 2.1-2..
27Annefe, i byen vre ki Herod ek Pons-Pilat ti ini ansanm dan sa lavil, avek bann nasyon etranze ek pep Izrael, kont Zezi, ou sen serviter ki ou'n konsakre#4.27 War Lk 23.7-11; Mat 27.1-2; Eza 61.1.. 28Konmsa, zot in akonpli tou sa ki ou ti oule e deside davans.
29Aprezan, Senyer! Ekout zot menas e permet ou bann serviter anons ou mesaz avek lasirans san okenn lafreyer. 30Montre pouvwar ou lanmen, pour ki gerizon, siny ek mirak i ganny akonpli lo non Zezi ki ou sen serviter.”
31Kan zot ti'n fini priye, landrwa kot zot ti'n reini ti sekwe. Zot tou, zot ti ranpli avek Lespri Sen e zot ti konmans anons mesaz Bondye san okenn lafreyer.
Bann Krwayan I Partaz zot Byen Ant Zot
32Tou bann krwayan ti annan en sel leker ek en sel lespri. Personn pa ti apel sa ki i annan son byen personnel, me zot ti partaz ant zot, tou sa ki zot ti posede. 33Avek gran pwisans, bann zapot ti anons rezireksyon Senyer Zezi. Bondye ti akord zot son benediksyon annabondans. 34Personn parmi zot pa ti mank sa ki ti neseser. Annefe, sa enn ki ti posed propriyete oubyen lakaz, ti vann e anmenn larzan ki zot ti gannyen. 35Zot ti donn sa larzan avek bann zapot ki ti distribye avek sakenn zot, dapre son bezwen.
36Par egzanp, ti annan en zonm, Zozef, sorti dan tribi Levi, e ki ti'n ne dan zil Sip. Bann zapot ti'n apel li Barnabas, (savedir, sa enn ki donn lankourazman.) 37I ti vann son propriyete e remet larzan avek bann zapot.
હાલમાં પસંદ કરેલ:
Akt de Zapot 4: BSK
Highlight
શેર કરો
નકલ કરો
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
