Akt de Zapot 20
20
Vwayaz Pol pour Masedwann ek Lagres
1Apre ki tou bann dezord ti'n kalmi, Pol ti konvok bann disip, ankouraz zot, dir zot orevwar e al Masedwann.
2Pandan ki i ti travers sa rezyon, i ti donn bann krwayan bokou lankourazman. Apre, i ti al Lagres, 3kot i ti reste trwa mwan. I ti'n prepar li pour al Siri, kan i ti aprann ki bann Zwif ti pe fer konplo kont li. Alor, i ti deside pour retourn par Masedwann. 4Sopater, garson Piris ki sorti lavil Bere, ti pe akonpanny Pol, ansanm avek Aristark, ek Segondis, ki sorti Tesalonik; Gayis, ki sorti Derb, ek Timote; Tisik ek Trofim ki sorti dan Provens Lazi. 5Zot ti al avan nou e esper nou Troas. 6Apre bann zour lafet Dipen san lelven, nou ti pran bato Filipi. Senk zour apre, nou ti rezwenn zot Troas, kot nou ti pas en semenn.
Dernyen Zour Pol dan Lavil Troas
7Premye zour lasemenn, nou ti reini pour kas dipen ansanm. Pol ti adres Lasanble e kontinyen koze ziska minwi, akoz i ti pe ale son lannmen. 8Ti annan en kantite lalanp alimen dan sa lasal dan letaz kot nou ti'n rasanble. 9Ti annan en zennonm ki ti apel Etikis, ki ti'n asiz lo bor lafnet. Pol ti kontinyen koze pandan lontan. Etikis ti ganny sonmey. I ti baskile e tonbe depi trwazyenm letaz. Zot ti ranmas li mor. 10Pol ti desann, bes lo li, e pran li dan son lebra. I ti dir, “Pa bezwen trakase, i vivan.”
11Apre sa, Pol ti remonte, partaz dipen e manze. I ti kontinyen koz avek zot ziska bardzour; apre, i ti ale. 12Zot ti anmenn sa zennonm se li vivan, e sa ti en gran rekonfor pour tou dimoun.
Vwayaz Sorti Troas pour Al Mile
13Nou ti al avan e anbark lo bato ki ti anmenn nou Asos, kot nou ti devre pran Pol parey i ti'n deside, akoz i ti oule vwayaz par later. 14Kan nou ti ariv Asos, nou ti pran Pol abor e nou ti al Mitilenn. 15Nou ti kit sa lavil e kontinyen. Lannmen nou ti ariv devan Kyo. En zour apre, nou ti ariv Samos, e son lannmen, nou ti ariv Mile. 16Pol ti'n deside kontiny son vwayaz san aret Efez pour pa perdi letan dan provens Lazi. I ti pe depese pour ariv Zerizalenm, si posib zour lafet Lapannkot.
Pol I Koz avek bann Ansyen Sorti Efez
17Letan Pol ti Mile, i ti anvoy en mesaz Efez pour demann bann ansyen dan Legliz pour vin zwenn li. 18Kan zot ti arive, Pol ti dir zot, “Zot konnen koman mon'n pas mon letan pandan ki mon ti avek zot, depi premye zour ki mon ti ariv dan provens Lazi. 19Mon'n servi Senyer avek bokou limilite dan sagren ek lapenn, akoz konplo bann Zwif. 20Zot konnen ki mon pa'n kasyet nanryen ki ti kapab itil pour zot, kan mon'n ansennyen an piblik e dan zot lakaz. 21Mon'n sipliy Zwif koman Grek pour tourn kot Bondye e krwar dan nou Senyer Zezi-Kri.
22Aprezan, mon pe al Zerizalenm parey Lespri Sen pe obliz mwan fer, san konnen sa ki pou ariv mwan laba. 23Sel keksoz ki mon konnen, se ki dan sak lavil ki mon'n traverse, Lespri Sen in averti mwan ki prizon ek persekisyon pe esper mwan. 24Me mon pa atas okenn valer spesyal avek mon lavi. Pourvi ki mon kapab akonpli mon misyon e fini sa travay ki Senyer Zezi in konfye mwan, pour anons Bonn Nouvel lagras Bondye.
25Mon'n reste parmi zot pour pres Rwayonm Bondye. Me mon konnen aprezan ki personn pa pou war mon figir ankor. 26Pour sa rezon, mon dir zot ozordi, si okenn parmi zot i arive perdi, mon pa responsab. 27Annefe, mon pa'n negliz nanryen pour anons zot plan Bondye an antye.
28Vey byen lo zot lekor e pran swen troupo ki Lespri Sen in konfye zot koman bann gardyen. Pran swen Legliz ki Bondye in gannyen par disan son prop Garson.
29Mon konnen ki apre mon depar, pou annan bann zonm parey loulou feros ki pou enfiltre parmi zot. Personn parmi zot pa pou ganny eparnyen. 30Menm parmi zot, pou annan dimoun ki pou leve pour ansenny bann mansonz pour antrenn bann krwayan avek zot. 31Alor, vey byen, e rapel zot ki pandan 3 an, lizour koman aswar, mon'n ansenny sakenn zot, menm avek larm.
32Aprezan, mon konfye zot avek Bondye, e avek parol son lagras. I annan pouvwar fer zot progrese dan lafwa. I kapab donn zot son bann byen ki i rezerv pour son pep. 33Mon pa'n zanmen anvi ni larzan, ni lor, ni lenz personn. 34Zot konnen zot menm ki mon'n travay avek mon prop lanmen pour ganny tou mon neseser, ensi ki pour mon bann koleg. 35Dan tou sirkonstans, mon'n montre zot ki fodre travay pour kapab ed bann ki pli pov e rapel zot parol Senyer Zezi li menm:
I annan plis lazwa pour donnen ki pour resevwar.”
36Apre sa bann parol, Pol ti tonm azenou avek zot tou e i ti priye. 37Tou dimoun ti plere, ser Pol dan zot lebra e anbras li, pou dir li adye. 38Zot ti tris sirtou akoz i ti'n dir zot ki zot pa pou war li ankor. Apre, zot ti akonpanny li ziska kot bato.
હાલમાં પસંદ કરેલ:
Akt de Zapot 20: BSK
Highlight
શેર કરો
નકલ કરો
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
