Akt de Zapot 2
2
Lespri Sen I Desann lo bann Disip
1Zour Lapannkot#2.1 War Lev 23.15-21; Det 16.9-11., tou bann disip ti'n rasanble ansanm dan en menm landrwa. 2Toutakou, ti annan en tapaz sorti dan lesyel parey en gro divan ki ti ranpli sa lakaz kot zot ti pe asiz. 3Zot ti war en keksoz ki ti resanble en bann lalang dife ki ti separe e apoz lo sakenn zot. 4Zot tou, zot ti ranpli avek Lespri Sen e zot ti konmans koz dan lezot lalang, dapre ki Lespri Sen ti donn zot pouvwar.
5Annefe, ti annan bann Zwif relizye dan Zerizalenm, bann ki sorti dan tou nasyon, dan lemonn antye. 6Kan zot ti antann sa tapaz, en gran lafoul dimoun ti rasanble. Zot ti vreman etonnen, akoz sakenn ti antann bann zapot pe koz dan son prop lalang. 7Dan zot letonnman, zot ti demann dan zot menm, “Sa bann zonm ki pe koz konmsa, zot tou, pa zot Galileen? 8Ki mannyer, nou tou ki pe ekout zot, nou antann zot koz dan nou prop lalang? 9I annan parmi nou ki sorti dan pei Part, Medi ek Elanm. I annan ki sorti Mezopotami, Zide ek Kapados; i annan ki sorti Pon ek provens Lazi. 10I annan ki sorti Frizi ek Panfili, Lezip ek rezyon Libi ki pre avek Sirenn; e i annan ki sorti Ronm, 11Kret ek Arabi. I annan serten ki'n ne Zwif, bann ki'n konverti dan larelizyon Zwif. Pourtan, nou tou, nou antann zot pe rakont dan nou prop lalang, sa bann mervey ki Bondye in fer.”
12Zot ti sitan etonnen ki zot ti demann avek kanmarad: Ki savedir tousala?
13Me ti annan en bann ki ti gognarde. Zot ti dir: Sa bann zonm in tap zot diven e zot sou!
Diskour Pyer
14Alor, avek sa onz lezot zapot, Pyer ti debout. Avek en lavwa byen for, i ti adres lafoul, “Zot bann zabitan Zide, e zot tou ki pe reste dan Zerizalenm! Ekout byen tou sa ki mon annan pour dir: 15Sa bann zonm pa sou parey zot mazinen. Annefe, i zis 9 er bomaten. 16Me, sa ki profet Zoel ti dir, pe ganny realize ozordi:
17La sa ki Senyer i deklare:
Dan sa bann dernyen zour,
mon pou repann mon Lespri lo tou bann et imen.
Zot bann garson ek zot bann fiy pour profetize.
Zot bann zennzan pour ganny bann vizyon.
Zot bann vyeyar pour ganny bann rev.
18Wi! Dan sa letan,
mon pou devers mon Lespri
lo mon bann serviter
ek mon bann servant,
e zot pou profetize.
19Mon pou fer bann mervey
lao dan lesyel
e bann siny mirakile anba lo later.
Pou annan disan, dife, ek en nyaz lafimen.
20Soley pou vin fernwanr,
e lalin pou vin disan,
avan ki zour Senyer i arive,
sa zour gran e glorye.
21Alor, sa enn ki pou envok non Senyer,
pou ganny sove#2.21 Zl 3.1-5..
22Zabitan Izrael! Ekout mwan byen: Zezi, ki sorti Nazaret, i sa zonm ki Bondye ti swazir pour anvoy kot zot. Parey zot konnen, par li, Bondye in fer bann mirak, bann mervey ek bann siny ekstraordiner. 23Sa zonm ki Bondye, par son prop volonte e konnesans, ti'n etabli davans dan son plan, i'n ganny livre dan zot lanmen. Bann zonm kriminel ti touy li e klout li lo lakrwa#2.23 War Mat 27.35; Mrk 15.24; Lk 23.33; Zn 19.18..
24Me Bondye ti resisit li, e delivre li dan soufrans lanmor. Annefe ti enposib pour lanmor gard li anba son pouvwar. 25Annefe, David ti dir lo son size:
Mon ti war Senyer toultan devan mwan.
I touzour dan mon kote drwat
pour mwan pa tranble.
26Pour sa rezon, mon leker ti dan lazwa;
dan mon labous ti sorti parol lazwa.
Byen plis ki sa, mon lekor pou repoz dan lesperans,
27akoz ou pa pou abandonn mwan
dan lemonn lanmor,
ni permet ou Sen konn dekonpozisyon.
28Ou'n montre mwan semen lavi,
e ou prezans pou ranpli mwan avek lazwa#2.28 War Ps 16.8-11..
29Mon bann frer! Mon bezwen fer byen kler lo sa ki konsern patriars#2.29 Sa teks i refer lo lerwa David e pli lwen (7.8), lo 12 garson Zakob. David: I ti mor e i ti ganny antere. Son tonbo i parmi nou ziska ozordi. 30David ti en profet, e i ti konn bann promes ki Bondye ti'n fer avek li par serman. Bondye ti promet pour fer enn son desandan vin lerwa parey li#2.30 War Ps 132.11; 2 Sam 7.12-13.. 31David ti war davans sa ki ti pou arive, e i ti pe koz lo rezireksyon Mesi kan i ti dir:
I pa'n ganny abandonnen
dan lemonn lanmor,
e son lekor pa'n ganny dekonpoze.
32Sa Zezi, Bondye in resisit li, e nou tou, nou temwen. 33I'n ganny plase lo kote drwat Bondye e in resevwar Lespri Sen avek son Papa parey i ti'n promet li. Sa ki zot pe tande e war la, sanmenm sa Lespri ki i'n devers lo nou. 34Annefe, David li menm pa ti mont dan lesyel, me i ti dir:
Senyer i dir avek mon Senyer:
Asiz lo mon kote drwat,
35ziska ki mon met ou bann lennmi
anba ou lipye#2.35 Ps 110.1..
36Pep Izrael antye i devre alor konnen avek sertitid ki sa Zezi ki zot in klout lo lakrwa, li menm ki Bondye in fer Senyer e Mesi.”
37Kan zot ti antann sa bann parol, zot ti trouble en kantite, e zot ti demann Pyer ek lezot zapot, “Frer! Ki nou devre fer?”
38Pyer ti reponn zot, “Sanz zot mannyer viv e ki sakenn i ganny batize lo non Zezi-Kri, pour li ganny pardon son bann pese. Alor, zot ava resevwar kado Bondye: Lespri Sen. 39Annefe, promes Bondye in ganny fer pour zot tou, pour zot bann zanfan, e tou bann ki lwen, ki Senyer nou Bondye ava apele.”
40Pyer ti dir zot bokou keksoz ankor pour konvenk zot e ankouraz zot. I ti dir zot, “Separ zot avek sa zenerasyon koronpi.”
41Bokou parmi zot ti krwar dan sa mesaz e ti aksepte pour ganny batize. Sa zour la, anviron 3,000 dimoun ti vin zwenn avek zot.
Lavi parmi bann Krwayan
42Zot ti konsakre bokou letan pour aprann lansennyman bann zapot. Zot ti viv ansanm, koman frer; zot ti partaz dipen, e pas letan dan lapriyer.
43Tou dimoun ti ranpli avek lafreyer, akoz bann siny ek bann mirak ki bann zapot ti fer. 44Tou bann krwayan ti ini e zot ti met an komen tou sa ki zot ti posede. 45Zot ti vann zot propriyete ek tou zot byen. Zot ti distribye larzan ki zot ti gannyen parmi zot, dapre bezwen sakenn.
46Tou le zour, zot ti reini regilyerman dan Tanp. Zot ti partaz dipen dan zot lakaz, manz dan lazwa, avek kontantman ek senplisite dan zot leker.
47Zot ti rann glwar Bondye, e tou dimoun ti annan lestim pour zot. Tou le zour, Senyer ti azout dan zot group, tou bann ki ti pe ganny sove.
હાલમાં પસંદ કરેલ:
Akt de Zapot 2: BSK
Highlight
શેર કરો
નકલ કરો
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
