Akt de Zapot 14
14
Pol ek Barnabas dan Lavil Ikonyonm
1Kan Pol ek Barnabas ti ariv Ikonyonm, la osi, zot ti antre dan sinagog bann Zwif e koz dan en fason tel ki bokou Zwif ek non-Zwif, ti krwar. 2Me bann Zwif ki ti refize krwar, ti eksit bann non-Zwif e tourn zot kont bann frer. 3Sa pa ti anpes Pol ek Barnabas pour reste pli lontan dan Ikonyonm. Zot ti koz avek lasirans, e ranpli avek konfyans dan Senyer. Senyer ti donn zot pouvwar fer en kantite siny ek mirak. Konmsa, zot ti montre ki sa mesaz ki zot ti pe anonse lo lagras Bondye ti vre. 4Me popilasyon lavil ti divize ant zot. Serten ti dan kote bann Zwif e serten ti dan kote bann zapot.
5Avek zot bann sef, Zwif ek non-Zwif, ti deside anploy lavyolans e saboul Pol ek Barnabas a koud ros. 6De ki sa de zonm ti aprann sa, zot ti sov List ek Derb, de lavil Likaoni, e dan bann zanviron. 7La osi, zot ti anons Bonn Nouvel.
Pol ek Barnabas dan Lavil List
8Dan List, ti annan en zonm ki ti pe asiz, akoz son lipye ti paralize depi son nesans, e i pa ti'n zanmen marse. 9I ti pe ekout sa ki Pol ti pe dir. Pol ti fikse li. I ti war ki i ti posed lafwa pour li ganny geri.
10Alor, byen for, Pol ti dir li, “Leve! Debout drwat lo ou lipye.” Sa zonm ti sot debout e konmans marse.
11Kan lafoul ti war sa ki Pol ti'n fer, zot ti kriye dan lalang Likaonyen, “Bann bondye in pran laform zonm e zot in desann kot nou!”
12Zot ti donn Barnabas non zot bondye Zeis, e Pol, Ermes, akoz i ti portparol. 13Pret bondye Zeis ki son tanp ti dan lantre lavil, ti anmenn bann toro ornen avek girlann fler devan laport sa tanp. Ansanm avek lafoul, zot ti oule ofer Pol ek Barnabas en sakrifis.
14Me kan sa de zapot ti aprann sa, zot ti desir zot lenz. Zot ti tay parmi lafoul an kriyan, 15“Bann zanmi! Akoz zot fer sa? Nou, nou zis bann zonm parey zot. Nou pe anmenn zot Bonn Nouvel pour ki zisteman, zot abandonn sa bann zidol initil e vin kot Bondye ki vivan, ki'n fer lesyel, later, lanmer ek tou sa ki egziste#14.15 War Egz 20.11; Ps 146.6.. 16Dan letan pase, Bondye in les tou bann nasyon fer sa ki fer zot plezir. 17Me kantmenm sa, i'n touzour revel son bonte. I'n donn zot son lapli sorti dan lesyel, ek bann rekolt, sakenn dan son sezon. I'n donn zot osi manze e i'n ranpli zot leker avek lazwa.”
18Malgre sa bann parol, apenn si zot ti reisi anpes lafoul ofer zot en sakrifis.
19Me bann Zwif sorti Antyos an Pisidi ek Ikonyonm, ti vini. Zot ti arive ganny konfyans lafoul. Alor, zot ti saboul Pol avek ros pour touy li. Kan zot ti'n fini, zot ti trenn li an deor lavil, akoz zot ti krwar i ti'n mor. 20Me kan bann krwayan ti rasanble otour li, i ti leve e antre dan lavil. Lannmen, i ti al Derb avek Barnabas.
Pol ek Barnabas I Retourn Antyos an Siri
21Pol ek Barnabas ti anons Bonn Nouvel dan lavil Derb kot zot ti ganny bokou disip. Apre, zot ti retourn List, Ikonyonm ek Antyos dan Pisidi. 22Zot ti fortifye leker bann krwayan e ankouraz zot pour reste solid dan lafwa. Zot ti dir ki zot bezwen pas par bokou soufrans pour antre dan Rwayonm Bondye.
23Dan sak Legliz, zot ti nonm bann ansyen. Apre ki zot ti'n zennen e priye, sa de zapot ti konfye zot dan lanmen Bondye dan ki zot ti'n krwar.
24Apre sa, zot ti travers rezyon Pisidi e zot ti ariv Panfili. 25Zot ti anons Parol Bondye dan Perze, e apre, zot ti desann Atali. 26La, zot ti pran bato pour retourn Antyos, lavil kot zot ti'n ganny konfye avek lagras Bondye, pour akonpli sa misyon ki zot ti'n konplete.
27Kan Pol ek Barnabas ti ariv Antyos, zot ti reini Legliz e rakont tou sa ki Bondye ti'n fer atraver zot: Koman i ti'n ouver en laport pour ki bann non-Zwif osi ava kapab krwar. 28Zot ti reste ase lontan Antyos avek bann krwayan.
હાલમાં પસંદ કરેલ:
Akt de Zapot 14: BSK
Highlight
શેર કરો
નકલ કરો
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
