Maaku 14

Inɛ ngbo ŋa à waa busi njɛ a kpa Jesu

(Cɔ Matie 26:1-5; Luku 22:1-2; Zãa 11:45-53)

1Si afei ajɔ minji jingaui Iku ku kua do ti Pɛ̃ɛ hai nɛ levɛ̃ɛ á to wa. Ŋɔi inɛ ngboi woo weei Ilaaɔ̃ ŋa do woo kɔ inɛ ŋa si wooda ŋau à waa dɛ kpãa bɛi aa ce a mu Jesu do bisi a kpaa. 2Amma à waa ni, kù sĩa ku jɛ si waatii jingauu ku ba hoya hoya ku maà dede si zamaau.

Abo gɔ í fãsi irii Jesu tuae

(Cɔ Matie 26:6-13; Zãa 12:1-8)

3Jesu í wa Betani kpasɛ̃i Simɔɔ iyi í tako í ce bɔ̃ɔi dintɛu, ŋɔi abo gɔ í lɔ wa bi tɛɛ waati iyi à waa jɛ. Wa mu ama caka kusĩa gɔ iyi í nɛ tuae iyi à ce do ikpoi naadi#14:3 Ikpoi naadi Tuae iyi à ce do icãi jĩi ndii naadii. À naaò tuaeu wa si ilɛi Zudeei hai ilɛi Ɛndi. . Tuaeu í caada. Ŋɔi í lɛgɛ ama cakau nɔ í fãsi tuaeu si irii Jesu. 4Nɔ inɛ gɔ ŋa à wa bɛ. À sɔ̃ njɛ do idɔɔkɔ̃ à waa ni, na mii í ce abou í koo í ce asɔɔi tuaeu ihɛ̃. 5Aa ka taai wo zakai fiai icɛi adɔ̃ akã nɔ ka mua ilu are ŋa. Ŋɔi à waa la si abou do kugaabu. 6Amma Jesu í ni, i jɔ̀ abou. Na mii í ce ì waa yɛ taaleɛ ŋa. Mii jiidai í ceem bɛ. 7Ntɔ ntɔ, ilu are ŋa aa maa wɛɛ do iŋɛ waati kãma fei, nɔ waati iyi ì bi fei aa yɔkɔ i ce nŋa jiida ŋa, amma amu n kaa n na n wɛɛ do iŋɛ hee do ajɔ fei. 8Abou í ce andi gbugbãɛ iyi á yɔkɔ mbɛ, í fãsi aram tuae do njuma ku ceò sɔɔlui kusim. 9Ntɔ ntɔ, tengi bii inɛ ŋa aa koo a maa waazo laabaau jiidau si andunya fei, aa sisi ide iyi abou ihɛ̃ í ce a maa yeò gigiɛ.

Zudasi á fita anyii Jesu

(Cɔ Matie 26:14-16; Luku 22:3-6)

10Ŋɔi Zudasi Isikariɔti, inɛ akãi mɔcɔ maateeji ŋau, í bɔ bi inɛ ngboi woo weei Ilaaɔ̃ ŋau í ni nŋu á da nŋa Jesu si awɔ. 11Iyi à gbɔ ideu, ŋɔi inɔ nŋa í dɔ̃ nɔ à ni aŋa aa muaa fia. Ŋɔi Zudasi wa dɛ kpãa bɛi á ce ku zambaò Jesu ku na ŋa.

Jesu wa jɛ jingaui Iku ku kua* do mɔcɔɛ ŋa

(Cɔ Matie 26:17-25; Luku 22:7-14, 21-23; Zãa 13:21-30)

12Si ajɔ sintei jingaui Pɛ̃ɛ hai nɛ levɛ̃ɛu, si waati iyi inɛ ŋa à ya saka ama angudã ŋa si jingaui Iku ku kua a ceò kuwee, ŋɔi mɔcɔi Jesu ŋau à beeɛ à ni, iwoi ì bi kaa ceɛ ijɛi jingauu. 13Ŋɔi í bɛ amanɛ minji si inɔi mɔcɔɛ ŋau í sɔ̃ ŋa í ni, i bɔ inɔ ilu, aa yɛ mɔkɔ gɔ wa so inyi jɔlɔ. I tooɛ. 14Mɔkɔu á koo ku lɔ kpasɛ̃ gɔ. Kpasɛ̃ bii á lɔu, i koo i sɔ̃ ilu kpasɛ̃u i ni ŋa, Mɛɛtu í ni ka beeɛ ile bii nŋu á jɛ jingaui Iku ku kua do mɔcɔi nŋu ŋa. 15Mɔkɔu á bɔò ŋɛ si antaii ile kukpɛkɛ gɔ nɔ á nyisi ŋɛ ilaawa nla gɔ iyi à ce sɔɔlui fei ndɛɛ tã. Bɛi aa ce nwa sɔɔlui jingauu ŋa. 16Ŋɔi mɔcɔ ŋau à dasi kpãa à nɛ. Iyi à to inɔ iluu nɔ à yɛ ideu í ce bɛi Jesu í sɔ̃ ŋau, ŋɔi à ce sɔɔlui ijɛi jingauu bɛ.

17Iyi alɛ í lɛ, ŋɔi Jesu í to wa do mɔcɔ maateeji ŋau. 18Waati iyi à waa jɛ ŋɔi Jesu í ni, ntɔ ntɔ, inɛ akã nŋɛ iyi awaò à waa jɛi á zambam. 19Ŋɔi inɔi aŋa fei í fɔ, nɔ à wasi ku beeɛ akã akã à waa ni, isa kù jɛ amu ya. 20Ŋɔi Jesu í jɛ nŋa í ni, si inɔi iŋɛ maateejiu, inɛ akã nŋɛ á gũsi pɛ̃ɛ si inɔ jɛɛ awaò ajɔ. Lafɛ̃ɛi á zambam. 21Do ntɔ amu Amai Amanɛ an ku si bɛi kukɔi idei Ilaaɔ̃ wa fɔ. Amma inɛ iyi á zambam á yɛ ijuukpã nla nla. Á tiaa inɛɛu bii í jɛ a kù búu mɔm wo.

Ijɛ iyi aa ka yeò gigii ikui Jesu

(Cɔ Matie 26:26-30; Luku 22:14-20; Kɔrɛnti 1, 11:23-25)

22Waati iyi à waa jɛ, ŋɔi Jesu í so pɛ̃ɛ í saabu Ilaaɔ̃ titã í bɛi í bububuɛ í na mɔcɔɛ ŋau í ni, i gba ŋa. Iyi ihɛ̃i í jɛ aram. 23Ŋɔi í so kɔɔfu má si bii à dasi vɛ̃ɛ í saabu Ilaaɔ̃ nɔ í na ŋa aŋa fei à mɔ. 24Ŋɔi í sɔ̃ ŋa í ni, iyi ihɛ̃i í jɛ njɛm. Nŋui í jɛ nyindai akabuu iyi Ilaaɔ̃ í dĩ do amanɛ ŋa. An nikãɛ na irii dulum dii inɛ nkpɔ. 25Ntɔ ntɔ, n kaa n mɔ atɛ̃ vɛ̃ɛ má í gbe hee ajɔ iyi an mɔ vɛ̃ɛ titɔ̃ si bommai Ilaaɔ̃. 26Si anyiɛ à kɔ̃ iri ŋa nɔ à fita à bɔ geetei Olivie ŋa.

Jesu wa fɔ iyi Piɛɛ á jã ku ni kù mà nŋu

(Cɔ Matie 26:31-35; Luku 22:31-34; Zãa 13:36-38)

27Ŋɔi Jesu í sɔ̃ mɔcɔɛ ŋa í ni, iŋɛ fei aa nyiò anyi na irim. Bɛi Ilaaɔ̃ í fɔ si kukɔi ideɛ, bɛɛbɛi á ce. Í ni,

an kpa woo degbeu

nɔ angudã ŋau a fangaa bii fei.#14:27 Cɔ Zakari 13:7.

28Amma amu Jesu an jĩ hai si balɛ nɔ n cua nŋɛ n bɔ ilɛi Galilee. 29Ŋɔi Piɛɛ í sɔ̃ɔ í ni, baa bii inɛ fei wa nyiò anyi na iriɛ, amu n kaa n nyiò anyi pai. 30Ŋɔi Jesu í sɔ̃ɔ í ni, ntɔ ntɔ, nnyi, idũuyi mɔm, hee ajɛɛ ku maa kɔ isɛ gbeeji, aa jã isɛ gbɛɛta i ni i kù màm. 31Amma bɛi Jesu wa fɔ, bɛɛbɛ mɔi Piɛɛ í ya fɔ hee lele ku ni, n kaa n kɔ̀siɛ pai, baa bii í jɛ an ku do awɔ ajɔi. Ŋɔi aŋa fei à fɔ bɛɛbɛ.

Jesu wa ce kutɔɔ Gɛsemanee

(Cɔ Matie 26:36-46; Luku 22:39-46)

32Ŋɔi Jesu do mɔcɔɛ ŋa à bɔ inya gɔ iyi à ya kpe Gɛsemanee. Iyi à to bɛ nɔ í sɔ̃ ŋa í ni, i buba ihɛ̃ titã ŋa n koo n ce kutɔɔ wa. 33Ŋɔi í gbã Piɛɛ do Zaaki do Zãa à bɔ waju. Nɔ njo í muu hee araɛ fei í rɔ. 34Ŋɔi í sɔ̃ ŋa í ni, inɔ kufɔ í naa sim nla nla hee wa bi ku kpam. I wa ihɛ̃, i wɔ njoo ŋa. 35Iyi í fɔ bɛɛbɛ í tã ŋɔi í bɔ waju keeke í koo í sɛɛbata ilɛ wa ce kutɔɔ, bii á ce, wahalau ku jĩò nŋu. 36Wa ni, Baam, aa yɔkɔ i ce mii fei. Jɔ̀ wahalau ihɛ̃ ku jĩim. Amma do nŋu fei, ku maà ti ku jɛ ti idɔɔbim, jɔ̀ idɔɔbiɛ ku ce.

37Si anyiɛ ŋɔi í nyi wa bi mɔcɔ mɛɛta ŋau í ba ŋa à waa sĩ njoo. Ŋɔi í bee Piɛɛ í ni, Simɔɔ, ì waa sĩ njooi? Debɛi, i kù yɔkɔ i kù wɔ njoo baa isɔ akã? 38I wɔ njoo nɔ i maa ce kutɔɔ ŋa ku ba i maà dasi kulɛlɛi inɛ ŋa. Idɔi amanɛ í bi, amma araɛ í kua gbugbãɛ. 39Ŋɔi í nyi má í koo í ce kutɔɔ si ide akãu. 40Iyi í nyi wa bi tu ŋa má, nɔ í ba ŋa à waa sĩ njoo má, domi njoo wa kpa ŋa. Iyi í jĩ ŋa nɔ a kù mà bɛi aa sɔ̃ɔ má.

41Ŋɔi í nyi í koo í ce kutɔɔ má nɔ í baa bi tu ŋa isɛ gbɛɛtasiaɛ í bee ŋa í ni, ì sũ ì waa sĩmi ŋai hee nsɛi? Í to bɛɛbɛ. Wee awaatiu í to tã, iyi aa mu amu Amai Amanɛ, á daa ilu dulum ŋa si awɔ. 42Wee inɛ iyi á zambam wa to wa. I dede ka kòo ŋa.

À mu Jesu

(Cɔ Matie 26:47-56; Luku 22:47-53; Zãa 18:3-12)

43Iyi Jesu wa fɔ bɛɛbɛ gbakã, ŋɔi Zudasi, inɛ akãi mɔcɔ maateeji ŋau, í to wa. Zamaa nla gɔ wa tooɛ wa à waa mu taakuba ŋa do golo ŋa. Inɛ ngboi woo weei Ilaaɔ̃ ŋau do woo kɔ inɛ ŋa si wooda ŋa do inɛ ngboi Zuifu ŋaui à bɛ ŋa wa. 44Zudasi nŋu iyi á zamba Jesuu, í tako í sɔ̃ zamaau nyinda gɔ iyi nŋu á ce. Í ni, inɛ iyi an koo n ya n baabaaɛ, lafɛ̃ɛ mbɛ. I muu dim dim i nɛɛ ŋa. 45Hai Zudasi í to wa gbakã, í sɛkɛɛ si Jesu í ni, Mɛɛtu. Ŋɔi í baabaaɛ. 46Ŋɔi inɛ ŋau à to Jesu awɔ à muu. 47Ŋɔi inɛ akãi mɔcɔ ŋau í yɔ taakubaɛ í cafe itĩi amaacɛi woo wee nlai Ilaaɔ̃u í buu. 48Ŋɔi Jesu í bee ŋa í ni, amui ì naa ku mu ŋa do taakuba do golo ŋa bɛi woo ce ile? 49Ǹ ya n wa inɔ nŋɛ ajɔ fei n maa n kɔ inɛ ŋa si cio kpasɛ̃i Ilaaɔ̃, nɔ i kù mum ŋa. Amma mii ŋau ihɛ̃ fei wa cei ku ba kukɔi idei Ilaaɔ̃ ku kɔ̃. 50Ŋɔi mɔcɔ ŋau fei à jɔ̀ɔ à sa.

51Ŋɔi ama awaasũ gɔ mɔ wa too Jesu, wa kpaka acɔ. Ŋɔi inɛ gɔ wa dɛ ku muu, 52amma í sa basĩ í jɔ̀ acɔu.

Jesu í wa wajui igbɛi woo kiiti ŋa

(Cɔ Matie 26:57-68; Luku 22:54-55, 63-71; Zãa 18:13-14, 19-24)

53Ŋɔi à bɔò Jesu bi woo wee nlai Ilaaɔ̃u. Tengi bɛi inɛ ngboi woo wee ŋau do inɛ ngboi Zuifu ŋau do woo kɔ inɛ ŋa si wooda ŋau à tɔtɔɔ. 54Nɔ Piɛɛ í wa hee jĩijĩ wa too Jesu wa do anyi hee í bɔ inɔ bantumai kpasɛ̃i woo wee nlau. Ŋɔi í buba bɛ do woo degbe andɛ koofa ŋau, wa nyia kɔkɔi ina.

55Waati nŋu inɛ ngboi woo wee ŋa do igbɛi woo kiiti ŋau fei à waa dɛ ide gɔ iyi aa yɛò taalei Jesu a ba a kpaa. Amma a kù ba. 56Inɛ nkpɔ í wasi ku máa ide, amma ide nŋa kù waa so njɛ. 57Ŋɔi inɛ gɔ ŋa à dede à máa ide à ni, 58à gbɔ iyi í ni nŋu á lɛgɛ kpasɛ̃i Ilaaɔ̃u nɔ si afei ajɔ mɛɛta nŋu á be ku ma mmuɛ iyi kaa jɛ do awɔi amanɛ. 59Amma baa si bɛ, ide nŋa kù so njɛ. 60Ŋɔi woo wee nlau í dede í leekĩ si wajui aŋa fei, nɔ í bee Jesu í ni, i kù waa ni ide gɔ? Ide mii inɛ ŋau ihɛ̃ à waa yɛò taaleɛ. 61Amma Jesu wa cokoɛ, kù fɔ ide gɔ. Ŋɔi woo wee nlau í beeɛ má í ni, awɔi ì jɛ inɛ iyi Ilaaɔ̃ í cica, Amai Ilaaɔ̃ iyi à waa saabu? 62Ŋɔi Jesu í jɛaa í ni, oo, amui. Nɔ aa yɛ ŋa amu Amai Amanɛ ǹ wa n buba si awɔ njɛi Ilaaɔ̃ ilu gbugbã fei. Nɔ ajɔ akã aa na i yɛm ŋa ǹ wa n naa si kudũi ijĩ má.#14:62 Cɔ Iri ku kɔ̃ 110:1; Daniɛli 7:13. 63Ŋɔi woo wee nlau í ga ibɔɛ ku nyisiò idɔɔkɔ̃ɛ. Nɔ í ni, a kù waa dɛ siɛ ilu sɛɛda kãma má. 64Ì gbɔ bɛi wa bu Ilaaɔ̃ ŋa. Bɛirei ì yɛ a cea mɔkɔu ŋa. Ŋɔi aŋa fei à yɛ taaleɛ à ni a kpaa.

65Ŋɔi inɛ gɔ ŋa à wasi ku tu si Jesu antɔ gbakã nɔ à bii ijuɛ à bɛi à waa daa kutu à beeɛ à waa ni, awɔ walii, sɔ̃ wa inɛ iyi í cãɛ. Ŋɔi sooge ŋau à mu Jesu à wasi ku sambalaɛ.

Piɛɛ í jã í ni nŋu kù mà Jesu

(Cɔ Matie 26:69-75; Luku 22:56-62; Zãa 18:15-18, 25-27)

66Waati iyi Piɛɛ í wa bantumai kpasɛ̃u, ŋɔi inɛ akãi ama inaabo woo ce icɛi woo wee nlai Ilaaɔ̃u í naa bɛ. 67Iyi í yɛ Piɛɛ wa nyia, ŋɔi í cɔɔ sɛ̃ɛ í ni, awɔ mɔ, ì tako ì wɛɛ do Jesu inɛi Nazarɛtiu. 68Amma í jã í ni, n kù màa fɔ́, n kù gbɔ ide iyi ì waa fɔ. Ŋɔi í fita í bɔ ikpa andɛ kabau. Waati bɛɛbɛi ajɛɛ wa kɔ. 69Ŋɔi ama inaabo woo ce icɛu í yɔɔ bɛ má, ŋɔi í wasi ku sɔ̃ inɛ ŋa iyi à wa bɛu wa ni, inɛɛu ihɛ̃ inɛ akã nŋai. 70Ŋɔi Piɛɛ í jã má. Iyi í kpɛ keeke, ŋɔi inɛ ŋa iyi à wa bɛu à sɔ̃ Piɛɛ à ni, ntɔ ntɔ, awɔ inɛ akã nŋai, domi awɔ mɔ inɛi Galileei. 71Ŋɔi Piɛɛ í ceekpe nɔ í sisi í fɔ do kugbasi í ni, n kù mà mɔkɔ iyi ì waa fãau bɛ ŋa. 72Bɛ gbakã ajɛɛ í kɔ isɛ gbeejisiaɛ. Ŋɔi Piɛɛ í ye gigii ide iyi Jesu í sɔ̃ɔ wo í ni, hee ajɛɛ ku maa kɔ isɛ gbeeji aa jã isɛ gbɛɛta i ni i kù màm. Ŋɔi Piɛɛ í lɔsi ku kpata.

હાલમાં પસંદ કરેલ:

Maaku 14: MKL

Highlight

શેર કરો

નકલ કરો