Jeremiya 2
2
Ba-Israyeli mbubakatakata Leza wabo
1Lino ijwi lya-Jehova lyakandisikila, lyakati, 2#Ezk 16:8; Hos 2:15Koya ukakambauke mumatwi aabana ba-Jerusalemu kuti, Mbuboobu mbwaamba Jehova. Ndaingasila luzyalo lwako lwakubwanike bwako ambuwakali kundiyanda nowakali nabwiinga. Ndaingasila mbowakanditobela munkanda, munyika injumu iitajisi zilyo. 3#Jak 1:18; Ciy 14:4Israyeli kali musalazi wa-Jehova, kabalwebalwe wakutebula kwakwe. Kufumbwa bakamulya bakajana mulandu, bakasikilwa mapenzi, mbwaamba Jehova.
4Amuswiilile ijwi lya-Jehova, nuluzubo lwa-Jakobo amikowa yoonse yaluzubo lwa-Israyeli. 5#Is 5:4; Mik 6:3; Is 44:9; Rom 1:21Mbuboobu mbwaamba Jehova. Ino mbubinzi bamausowanu mbubakajana mulindime? Nkaambonzi balitantamukide kule kuzwa kulindime? Nkaambonzi batobela zintu zyabuyo akuba bantu babuyo? 6Tabakwe nibaamba kuti, Uli kuli-Jehova iwakatugwisya munyika ya-Egepita, iwakatweenzya munkanda, munyika yamabua ayazilindi, munyika yacimpayuma ayamudima uusia mbi, munyika iitaindwi bantu nikuba kukalwa muntu naba omwe. 7Ndime ndakamusisya kunyika yambolezi, kuti mukalye micelo yayo abubotu bwayo. Pele mbomwakanjila buyo, mwakasofwaazya nyika yangu, alukono lwangu mwakalusandula kuba cisesemyo. 8#Mal 2:6; Rom 2:20Bapaizi tabakwe nibakaamba kuti, Uli kuli-Jehova? Abalo basimilao tabakwe nibakandiziba. Beendelezi bakandibisizya, abasinsimi bakasinsima muzina lya-Baala, akutobela zintu zitagwasyi.
9 #
Is 3:13; Hos 2:2; Mik 6:2 Nkaambo kako ncikazyanya anywe, mbwaamba Jehova, abazukulu banu njookazyanya abo. 10Ma! Amwiinde kunkomwe zyacisi caba-Kitimu, mukabone; amutume ku-Kedara, mukalingule kabotu makani; amubuzye na nkwaali makani aali boobu. 11#Mik 4:5; Int 106:20; Rom 1:23Sa kuli cisi niciba cimwi icakasowa baleza baco akubika bambi, nekuba kuti tabeensi baleza loko? Pele bantu bangu balisoowede bulemu bwabo, amucibaka cabo balibikide cintu citakwe milimo. 12Amugambe numajulu kumakani aya, amukankame akuyoowesya, mbwaamba Jehova, 13#Int 36:9; Jer 17:13; Ciy 21:6nkaambo bantu bangu balijisi zibi zyobile nzibacitide. Mebo ndekasensa kamaanzi aabuumi bandileka, lino balibezela mikalo, mikalo iiandaukide iitakonzyi kujata maanzi.
14Sa Israyeli muzike? Sa wakazyalwa muŋanda yabulanda? Ino nkaambonzi waba cisaalo? 15Balavu balamuvulumina, balangwalamuna majwi aabo. Balisaalide nyika yakwe, aminzi yakwe yaba matongo aabula bantu. 16Abalo bantu baku-Noti abaku-Tahapanesi balipwayide canza cako. 17Sa teensi nduwe omwini owakaliletela mapenzi aali boobo? Nkaambo wakatakata Jehova Leza wako kuciindi eco naakali kukweenzya munzila? 18#Is 30:1,2; Ezk 17:15Lino waba anzi noya ku-Egepita kuyoonywa maanzi aa-Sihori? Waba anzi noya ku-Asuri kuyoonywa maanzi aalwizi? 19#Is 3:9; Hos 5:5; Kul 19:8Bubi bwako omwini mbobuti ku ume, akupambuka kwako kuyookupenzya. Lino koziba akubona kuti ncintu cibi cilula ncowacita mukuleka Jehova Leza wako akutandiyoowa mumoyo wako, mbwaamba Mwami Jehova wamakamu.
20Nkaambo kalekale wakatyola ijokwe lyako akudunsula zyaanzyo zyako, alimwi wakaamba kuti, Nsikoobeleka pe. Ncobeni atala lyazilundu zyoonse zilamfu amucenzule camisamu yoonse iisia wakali kuya buvuula. 21#Int 80:8; Mt 21:33; Mk 12:1Nekubaboobo nindakakubyala wakali musaansa mubotu; imbuto zyako zyakali imbuto loko. Ino wasanduka buti kuba musaansa umbi uusampukide? 22#Dt 32:34; Int 90:8; Hos 13:12Ncobeni nowakasamba amusamu akubelesya mulola munji, cibata cazibi zyako neciciboneka kumeso aangu, mbwaamba Mwami Jehova. 23#Matl 3:12,13; Tus 30:12; Rom 3:19; Jer 7:31Ulaamba buti kuti, Nsisofweede, nsina kutobela ba-Baala? Bona inzila yako yamukuti mbwiibede! Ziba mbowacita! Uli inkamele iili aluno iiya buzumbana, 24Uli imbongolo yamusokwe iizibide munkanda, iiya bununkuzya mucisusi cayo. Nguni uukonzya kukasya zisusi zyayo? Bacende bai yanda tabakonzyi kulikataazya kwiiyandaula pe, balaijana ncobeni kumwezi waya uuelede. 25Ma! Utayi azituta zitasamine indyasyo! Utalikozyi nyota! Pele uwe wakaamba kuti, Ne! Nsikonzyi kuleka. Ndayandisya beenzu, lino njeelede kuya bubatobela,
26Mbuli mubbi mbwafwa bweeme naajanwa, luzubo lwa-Israyeli luyoofwa bweeme mbubonya, Bayoofwa bweeme balo, abami babo, abasilutwe babo, abapaizi babo, abasinsimi babo boonse, 27#Bab 10:10baambila cisamu kuti, Nduwe taata, alyalo ibbwe balalyaambila kuti, Nduwe wakandizyala. Bandipa sule, tabandipi busyu pe, Nekubaboobo muciindi camapenzi aabo balandaambila kuti, Buka, utuvune. 28#Dt 32:37; Is 45:20Ma! Bali kuli baleza bako mbowakalicitila? Babuke balo, bakuvune muciindi cako camapenzi! Nkaambo mweelwe wabaleza bako ulyeelene amweelwe watninzi yako, O Juda.
29Nkaambonzi nokazyanya ambebo? Nyoonse mwandipapila, mbwaamba Jehova. 30#2 Mak 36:16; Mt 23:29; Lk 13:33,34; Inc 7:52; 1 Tes 2:15Ndakauma bana banu, pele kuuma kwakali kwabuyo, nkaambo bakakaka kwiiya. Ipanga lyanu nubeni lyakamanisya basinsimi banu mbuli mulavu uunyonyoona. 31Nubasyasunu, amubone ijwi lyaJehova mbulibede. Sa ndabeda ba-Israyeli inkanda nanka nyika yamudima uusia mbi? Ino nkaambonzi bantu bangu balaamba kuti, Twadunsuka, tatukooyooboola limbi kulinduwe. 32#Int 106:21; Jer 13:25; Hos 8:14Sa nakalindu ulaluba zyakusakatila zyakwe? Sa nabwiinga ulaluba lukumba lwakwe? Pele bantu bangu bandiluba mebo mazuba manji aatabaliki,
33Ma! Ulasalaula kabotu inzila yako mukuyandaula basikukuyanda. Nibaba banakazi babi wabaiisya inzila zyako. 34#Int 106:38; Jer 19:4Amumyoombe yazikobela zyako mulajanwa bulowa bwabantu bapengede batakwe milandu; tokwe nowakabajana balatulula pe. Nekuba kuti wacita zintu ezi zyoonse, 35#Tus 28:13waamba kuti, Nsikwe mulandu; ncobeni bukali bwakwe bwandileka. Ncobeni tuyoobetekana nkaambo kajwi lyako lyakuti, Nsina kubisya. 36#Jer 31:22; 37:7; Hos 5:13; Is 30:3; 2 Mak 28:16,21We! Ulatamauka mukweendeenda kwako. Uyoousigwa insoni kumakani aa-Egepita mbubonya mbowakausigwa insoni kumakani aa-Asuri, 37#2 Sam 13:19Uyoozwa nkuko akwalo amaanza aako ali amutwe, nkaambo Jehova wakaka bantu abo mbosyoma, aboobo tokooyoogwasigwa kulimbabo.
Sélection en cours:
Jeremiya 2: Ibbaib63
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
The Bible in Tonga (Zambia) © United Bible Societies, 1963.
