Ba-Galatiya 4
4
Kusyoma Kristo nkokutucitya bwana bwa-Leza
1Lino amwi nginti ambe ngaaya. Swaana naacili mwanikenike tabapambukene abuniini amuzike, nekubaboobo ngumwami walubono loonse. 2Pele uli mumaanza aabaleli ababanzi mane kusikila kuciindi icakabikwa awisr, 3#Gal 3:23; 5:1; Kol 2:20Mbubonya mbutubede aswebo. Nitwakacili banikenike, twakali mubuzike bwakupaila zilenge zitaanzi zyaansi. 4#Ef 1:10Pele nicakasika ciindi ceelede, Leza wakatuma Mwanaakwe, iwakazyalwa kumwanakazi, wakazyalwa mu-Mulao, 5#Rom 8:15-17#Gal 3:13,26kuti akabanunune abo bakali mu-Mulao, kuti tukatambule bwana, 6#Rom 8:15Lino mbuli mbumuli bana, Leza wakatuma Muuya wa-Mwanaakwe mumyoyo yanu, uuompolola kuti, Abba, Ta, 7#Gal 3:29; Rom 8:16,17Aboobo sunu tacili muzike, pe, uli mwana muzyale. Alimwi mbuli mboli mwana muzyale, ncobeni Leza wakucitya kuti ube swaana.
Makani amwi taagwasyi
8Kuciindi eco ncimwatakalina kuziba Leza, mwakali mubuzike bwakupaila abo batajisi bu-Leza bwinibwini. 9Pele sunu mulizi Leza, na inga ndakonzya kwaamba kuti mulizibidwe kuli-Leza. Lino mupilukilanzi kuzilenge ezyo nzizyonya zitajisi inguzu zyakugwasya? Muyandilanzi kuboola alimwi mubuzike bwakulinzizyo. 10#Rom 14:5; Kol 2:16Mulalikatazizya makani aamazuba amyeezi amapobwe amyaaka. 11#2 Joh 1:8Ndayoowa kuti ambweni milimo yangu njindakamubelekela yaba yabuyo.
Ba-Galatiya mbubakali kuyanda Paulo kukusaanguna
12 #
2 Kor 2:5
Lino bakwesu, ndakumbila kuti mube mbumbede mebo, nkaambo ambebo ndakali mbuli mbumwakabede nywebo. Teemwakandibisizya pe. 13#Inc 16:6; 1 Kor 2:3Mulizi kuti nkaambo kamatenda aamubili wangu nkindakamukambaukila Makani Mabotu kukusaanguna. 14#Inc 14:11,12Mubili wangu wakali kumukataazya, nekubaboobo teemwakandisampaula nikuba kundisesemwa, pe, mwakanditambula mbuli angelo wa-Leza, mbuli Kristo Jesu mwini. 15Pele sunu luli kuli olo lukondo ndumwakandikondelelwa? Nkaambo ndazumina kuti nikwakali kukonzeka nimwakagwisya meso aanu akundipa, 16#Am 5:10Lino sunu sa ndaba sinkondonyokwe nkaambo kakumukananina lusinizyo? 17#Gal 1:7Aba bantu balamusungwaalila, pele busungu bwabo tabuli bwaciyanza cibotu pe. Balayanda kumujalila anze kuti anywebo mubasungwaalile. 18Lino ncintu cibotu kuti musungwaalilwe muciyanza cibotu, nkabela takweensi kwaamba kuti ciindi ncendiwo luzutu pele lyoonse. 19#1 Kor 4:15Akaka, twana twangu! Ndamusungila lwabili mane Kristo abumbwe mukati kanu. 20Nindakaliwo nkumubede akusandula ijwi, nkaambo ndazingwa kumakani aanu.
Cikozyano ca-Sara a-Hagare. Bulubusi bwabunakristo
21 #
Gal 3:23
Lino amundilwiide, nywebo nomuyanda kuba mu-Mulao, sa tamumvwide Mulao? 22#Matl 16:15; 21:2,9Nkaambo kulilembedwe kuti Abrahamu wakalijisi bana bobile, umwi wakazyalwa kumwanakazi muzike, umwi kumwanakazi muzyale. 23#Rom 9:7-9; Matl 17:16Pele mwanaakwe muzike wakazyalwa kunyama buyo, anukuti mwanaakwe muzyale wakazyalwa nkaambo kacisyomezyo. 24#Gal 5:1; Rom 8:15Lino aya makani nceezyanisyo. Aba banakazi bobile balikozyenye amilongo yobile. Umwi wazwa kucilundu ca-Sina, ulazyalila buzike bana, uli mbuli Hagare. 25Hagare nkukuti cilundu ca-Sina cili mucisi ca-Arabiya, alimwi ulikozyenye a-Jerusalemu wasunu, uli mubuzike antoomwe abana bakwe. 26#Heb 12:22Pele oyo Jerusalemu uuli kujulu muzyale, ngunyina wesu toonse. 27#Is 54:1Nkaambo kulilembedwe kuti,
Sekelela, webo omusundi uutazyali,
Uma nguluulu akoongolola, webo otasungi,
Nkaambo bana banabutema mbanji
Kwiinda bana bayooyo uujisi mulumi.
28Lino nywebo, bakwesu, muli bana balusyomezyo mbuli Izaka. 29#Matl 21:9Pele mbuli oyo iwakazyalwa kunyama mbwaakali kupenzya oyo iwakazyalwa ku-Muuya, mbubonya obo mbukubede asunu. 30#Matl 21:10,12; Joh 8:35Pele malembe alaamba buti? Alaamba kuti, Tanda mwanakazi muzike amwanaakwe, nkaambo mwana wamuzike takonzyi kuba swaananyina mwanaakwe muzyale. 31#Gal 3:29Aboobo, bakwesu, swebo tatuli bana bamwanakazi muzike pe, tuli bana bamuzyale.
Sélection en cours:
Ba-Galatiya 4: Ibbaib63
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
The Bible in Tonga (Zambia) © United Bible Societies, 1963.
