KAOBAK 2
2
1Kho tegü müh si kao pendou yeikei. 2#Ibr 4.4 Hobaje nyetbounyet Mühghaüei haoei kümbü pendou thonkei; hibü nyetbounyet haoei kümbü kümsilei pendou ka hao haksokei. 3Hobaje Mühghaüei chalou nyetbounyet kho haükuko saüenkei; aiei haoei yaübü kümsilei pendou khünei hao haksokei. 4Ho müh si kao kümbü meten.
Eden Ba
Ladang Bunyubou Mühghaüei müh si kao kümbei. 5Kaodaka bulong deilong ai akitei hoba kelang onglang mokhittei; aieilausi Mühghaüei kaodak to lang ayantiko kikei; hoba kao shapla khünei müt che ongkei akitei, 6lausikei kaonyu maang ka dei pakkei hoba deiei kaothe pendou to dei lakkei.
7 #
1 Kor 15.45 Kheijinei Bunyubou Mühghaüei kao ka tham sungan müt kümbei hoba haoeibü kungkhüna lang kibü hak metan jinkukei, hoba müt kho lang kibü chela yeikei.
8Kheijinei Bunyubou Mühghaüei chaang aenei Edena ba che lekei; hoba khünei haoei kümbü müt kho phokei. 9#Tk 2.7 Hobaje Bunyubou Mühghaüei kao ka hemaibü busidei hoba shaula maibü buhek yoan yemtikei. Bamang jenyua langkeibü bunyu hoba maibü amaibü ngebü bunyu haoei yemtikei.
10Bamang kho nyakko Eden ka shumang che koukei hoba kho ka shumang lei la jankei. 11Shaangbou shumang nyen kho Pishon, hoei hon kibü Havila kaodak pendou jembo kouda, 12hoba kho kaodak kabü hon kho maibü; hoba khünei phülem hoba oniks laang kia. 13Nyiboubü shumang nyen kho Gihon; ho Kush kaijembo kouda. 14Hobaje semboubü shumang nyen kho Tigris, ho Assiria chaang aeto kouda. Hobaje leiboubü shumang kho Eufrates.
15 Bunyubou Mühghaüëi müt kho Eden bamang to leijung hauan khünei kümlaleila hoba lomla apyokei. 16Hobaje Bunyubou Mühghaüei müt kho to ngühkhüm kuko laukei, “Nyi bamanga bunyu pendou ka shaula thükkei, 17#Rom 6.23 lausikei maibü si amaibü ngebü bunyu ka nyi teshau; aieilausi nyi laobou chalou ka shaulaje khünyet ka no maimaitham hailabü.”
18 Bunyubou Mühghaüei laukei, “Müt kho boushou kila amai; ngei hao shanga thuiyobü che kümbho.” 19Tou Bunyubou Mühghaüei kao ka yamkabü meisiau pendou hoba müh kabü au pendou küman phaia haoei ai nyen nyenkulaje dogo hao jungto leibakei; hoba müt khoei lang kibü meisiau yangsikok weko la nyen nyenkukei, hoba kho haoeibü nyen la yeikei. 20Hibü müt khoei samkeisamuk pendou hoba mühkabü au pendou hoba yamkabü meisiau pendou la nyen nyenkukei, lausikei Adam shanga thuiyobü müt mubü che ühüpou.
21Hibü Bunyubou Mühghaüei müt kho nyeket maisho shitikei, hoba ladang yepan kikei, kheijinei haoei müt khoeibü hiplo che sungkei hoba kho kaoen kho phejakei shamtikukei; 22hoba hiplo laobou Bunyubou Mühghaüei müt ka sungenkei, kho ka haoei yaksa che kümbei, hoba sao kho müt jungto leibakukei. 23#Efe 5.28,30 Kheijinei müt khoei laukei,
“Ho tou ngeibü lo ka lo hoba
ngeibü phe ka phe;
Sao yaksa dogo nyenlabü,
Aieilausi sao bousu ka
sungenkei.”
24 #
Mk 10.7-8 Khoei bousuei jembü nyu si bou apyoan jembü yak to maangshikko paplepbo kilabü, hoba ham kho phe chela yeilabü.
25Bousubou si yaksanyu ham mütkong kikei, hoba haosi ihimouyoko kikei.
Sélection en cours:
KAOBAK 2: CHANGBSI
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
