Lúkàs 9
9
Yésù tómndéé nɨ̀fuùb no cóóŋ ɨ́ bɨrɨ́b lè jɨ̀r ə́ré
(Góòmɓwê Mt 10.5-15; Mk 6.7-13)
1Yésù ɨ́ ɓáhè nɨ̀fuùb cóóŋ ɨ́ bɨrɨ́b, ŋgə́ ɨ́ nà ŋgáb nyòm ŋgáb ŋgɨ́íkɨ́ nɨ̀wàtɨ̀b, ŋgáb a wáŋhȩ̀ nɨ̀yábì. 2Ɗà ŋgə́ ɨ́ tôm ŋgáb tàtèènɨ kìn du ɓe ɨ́r Ŋgɔ̧́ɔ̧̀ Mèèín, ŋgáb a wáàŋcê nɨ̀yáàb. 3Ŋgə́ ɨ́ tànà ŋgáb ɨnè: «Nyí nɨ́m kù ŋgáré ágèwá, dùgɨ̀ túb, dùgɨ̀ càká, dùgɨ̀ cɔŋ, dùgɨ̀ mòné, dùgɨ̀ júk. 4Yɨ́ lâs nyí ɓa féínniì, dúú kùb gamndé nyí noò, dùná yó ku há̧á̧ hȩ nyí ɓa ndóŋnɨ tíí. 5Yɨ́ lâs kùb ɓa mvúnɨ nyí gàmnɨ rɨ, éíkɨ́náam kwɨ́í kɨ́ no, nyí a lámkɨ́sò mvútúúb nyínè gureè#9.5 Lámkɨ́sòó mvútúúb gureè du túúm ɨnayâna mɨ kwá tɨ̀ mɨ cùwòcɨ̀r ɓetí mɨ yúutɨ́ mɨ́ ɓíì moò, nɨ́me wu nɨ ɓe àm kù ɗàcɨ̀wá yáá na á. túùmnànɨ ŋgáb ɨnayâna ŋgáb ndɨŋtɨ́ ɓáŋhîn, ŋgáb gə́tìi.» 6Nɨ̀fuùb ɨ́ ə́llê. Ŋgáb ɨ́ yà gɨ̀tèènɨ kwɨ́ì lâs no. Ŋgáb ɨ́ yà tàtèènɨ Kìn Nyɔ̧ɔ̧́, ŋgáb a wáaŋteece nɨ̀yáàb yɨ́ lâs.
Hèrôdə̀ á mánɨ ɗə̀ə̀ŋnɨ na á du Yésù
(Góòmɓwê Mt 14.1-12; Mk 6.14-29)
7Mvókín kɨ́ no ɓwê, Hèrôdə̀ nò yi du mvèìn jírií ɨ́ ô kùb átɨ̀nɨ nɨ́ɨ́b yi du ndóŋniì. Kɨ̀cáàb ɨ́ yɔ̂ ŋgə́ ɓetí nɨ̀vɨ́tɨ̀b yaá tànɨ: «Jâŋ nò kɔhɨ kùb kɔ ə́mní ɨ́ səəmcuhó̧ mvókín nɨ̀kwíbí ru.» 8Nùb kù ɨ́ tà: «Èlî ɨ́ cuwo nɨ́ ru.» Nùb kù ɨ́ tàcê: «Tɨ́kìn Mèèín kù tɨŋtɨ̀ŋ kɨ́b ya tíí noò ɨ́ səəmcu nɨ́ ru.» 9Ɨ́dù Hèrôdə̀ ɨ́ yà tànɨ no sumí ɨnè: «Mɨ nɨ̀mɨr ya móobɓa kùb téínkɨ́ Jâŋ ŋgwé ru, nò mɨ dukwacɨ mɨ́ óknɨ wúúm noò rè ma cè nɨ́ na?» Ŋgə́ ɨ́ yà mánɨ pénɨ Yésù.
Yésù líhií nɨ̀ŋgwáàb tɔ́sìn ŋgiì
(Góòmɓwê Mt 14.13-21; Mk 6.30-44; Jŋ 6.1-14)
10 Nɨ̀fuùb ɨ́ cùwò. Ŋgáb ɨ́ átɨ̀nà Yésù nɨ́ɨ́b ŋgáb tɨ ndɨŋndé lâs. Ŋgə́ ɨ́ ɓéhô̧ ŋgáb gə́nȩ̀ȩ́, ɓe ŋgáb ɨ́ gì yɨ́ nɨ̀vɨ́tɨ̀b yi du ɗàwáá, gín kwɨ́í kù ɨ́r du Bètsáyídà. 11Ɨ́dù nɨ̀vɨ́tɨ̀b ɨ́ ɗə̀ŋhȩ̀ bɨ́ àm kɨ́, á ŋgáb tuge bɨ́ ŋgə́. Yésù ɨ́ gàm ŋgáb, ŋgə́ ɨ́ nyìnnà ŋgáb àm Ŋgɔ̧́ɔ̧̀ Mèèín. Ŋgə́ ɨ́ wáàŋcê nùb yi du yábniì. 12Hȩ mvii yi ducɨ nɨ́ gi̧né, nɨ̀fuùb cóóŋ ɨ́ bɨrɨ́b lè ɨ́ ŋgɨ̀ɨ̀sò gín Yésùù, ŋgáb ɨ́ tànà ŋgə́ ɨnè: «Mbɨ́k wu nùb lè gɨ̀cù bɨ kwɨ́ì ɓe mwaai dutee hò̧ kə́sə́ə́ no, mánɨ yɨ́ gúnnè ɓe nɨ́m ŋgáb taŋndé. Ɓetí nɨ́m du nɨ hò̧ tɨfuru̧ú̧ á.» 13Ɨ́dù Yésù ɨ́ tànà ŋgáb ɨnè: «Nyí nɨ̀miib, nanáam ŋgáb nɨ́m cɔɔ̀ŋ!» Á ŋgáb tacu ɨnè: «Nɨ́m á ɗóò ɓe bɨ̀rê ŋgiì ɓe həré bɨrɨ́b. Kèè wu ɗúú nɨ́m gɨ̀ gwɨ̀ìwònɨ cɔŋ ɓe ɨ́r vùùm nùb lèè lâs á à?» 14(Nɨ̀ŋgwáàb yi du ɓèé yaá sàmàìn ndɨŋ tɔ́sìn ŋgiì.) Yésù ɨ́ tà ŋgáb ndɨ̀ŋ nɨ̀vɨ́tɨ̀b dùtèèré ɗàá mɨ̀kù̧ú̧ mɨ̀kù̧ú̧. Mɨ̀kù̧ú̧ mwi̧ nɨ̀vɨ́tɨ̀b sàmàìn vii bɨrɨ́b ɨ́ cóóŋ. 15Ŋgáb ɨ́ jə̀ŋ nyindí kɨ́; á ŋgáb ndɨŋ nùb lâs dùré ɗàá. 16Kí á Yésù ágɨ bɨ̀rê ŋgiì ɓe həré bɨrɨ́b lè, ŋgə́ ɨ́ ŋgèèwî íí còóm, ŋgə́ ɨ́ sáktè Mèín. Ŋgə́ ɨ́ kùùmè, á ŋgə́ na nɨ̀fuùb noò gɔ̀knà nɨ̀vɨ́tɨ̀b. 17Nùb lâs ɨ́ tàŋ, ŋgáb ɨ́ fùb. Kùb ɨ́ ɓáhè kumsiì ya meré há̧á̧ lɨ̀ŋtɨ̧̀ cóóŋ ɨ́ bɨrɨ́b.
Píyéèr wáaɓatɨ́ Yésù nɨ Mèsî á
(Góòmɓwê Mt 16.13-19; Mk 8.27-29)
18Ye kù Yésù yaá mɨ̀yú̧ú̧ ŋgə́ mwi̧, nɨ̀fuùb noò ɨ́ gàìnsò ŋgə́. Ŋgə́ ɨ́ fɔ̂ ŋgáb ɨnè: «Kɨ́ nɨ̀vɨ́tɨ̀bì, ŋgáb á tàcénɨ mɨ macè na?» 19Ŋgáb ɨ́ pììnà ŋgə́ ɨnè: «Nùb kù á tànɨ wu Jâŋ nò kɔhɨ kùb kɔ ə́mní á, kɨ́ nùb kù wu Èlî á, nùb kù cè, tɨ́kìn Mèèín tɨŋtɨ̀ŋ kɨ́b ya tíí noò ɨ́ səəmcuhó̧ nɨ́ ru.» 20Yésù ɨ́ fɔ́kwà ŋgáb ɨnè: «Kɨ́ nyínè nyí ma lə́əmce mɨ macè na?» Píyéèr ɨ́ pìhè ɨnè: «Wu Mèsî á, nò Mèín ya wúrɨna gbám mvènnì.»
Yésù takɨ́yayeé àm cwá ní ɓa kúnɨ, Mèín a tì sə̀ə̀mcùhô̧ níì
(Góòmɓwê Mt 16.20-28; Mk 8.30-9.1)
21Yésù ɨ́ tà kpáb! Ŋgáb nò kù àm kɨ́ tànàwá. 22Ŋgə́ ɨ́ tàkwà ɨnè: «Á ɗúnɨ Mwin Nɨ̀rì pə́ jábɨ́r cei. Kɨ̀jííb ɓe mvènnɨ́b nùb na satɨgàà ɨ́ nɨ̀gááŋ káàtàbì ɓa ŋgə́ mvúnɨ á, kùb a kwíhè ŋgə́. Cùr jíì taarɨ́bí, Mèín a tì sə̀ə̀mcùhô̧ ŋgə́.»
23Á ŋgə́ tana nùb lâs ɨnè: «Nò kù ɨ́ ɗû mɨ tùnɨ, ŋgə́ mvúyàyè síí ŋgə́ nɨ̀mɨrí, ŋgə́ a â bàŋ noò, ŋgə́ a tùwò mɨ. 24Ɓetí nò ɗú ɓátɨ̀nɨ mè noò, ɓa mə̀mnɨ mè no kɨ́ á, ɨ́dù nò məm mè noò ɓe ɨ́r moò ɓa cénnɨ mè no kɨ́ á. 25Nɨ̀vɨ́tè ɨ́ kɨ̂ nɨ́ɨ́b ɗɔ̀ɔ́b lè noò lâs ɗà ŋgə́ ɨ́ mə̀m mè noò, ŋgə́ ɨ́ lɔ̧̂, ní ɨ́ kpɔ́khó̧ce ŋgə́ no? 26Nò kù ɨ́ ô sə̀ré ɓe mɨ, ɓe nyindí móò ɓwê, ɓwâ Mwin Nɨ̀rì ɓa cùwònɨ nyòm noò duɓwéece nyòm Tá ɓe dùgallɨbi noò, ŋgə́ ɓa ókɓwênɨ sə̀ré ɓe nò kɨ́ á. 27Mɨ tanaɓa nyí àmɨɨr wááŋ á: nùb kù tɨŋtɨ̀ŋ nùb lè noò ɓaye bɨ dùnɨ jáŋ ɓwâ Mèín ɓa ŋgáŋnɨ nɨ́ɨ́b lâs yaà á.»
Ɓɨ̀m Yésùù cə́ndɨtɨ́
(Góòmɓwê Mt 17.1-8; Mk 9.2-8)
28Sàmàìn jíì sə́r cùr Yésù yi nyin nyindí kíì, ŋgə́ ɨ́ ɓégè Píyéèr, Jâŋ ɓe Jâk. Ŋgáb ɨ́ gì ɓe kù ya Mèín yóŋnɨ. 29Ɓwâ Yésù yi du Mèín yóŋniì, ɓɨ̀m noò ɨ́ cə́ndè, júk nó sóò ɨ́ vùùɓà tóóm. 30Tií na, nɨ̀ŋgwáàb bɨrɨ́b kù ɨ́ sə̀mcɨ̀ bɨ́ ɓè sà̧nì ɓe Yésù. Yɨɨ́m Mòyîs ɓe Èlî á 31yi mwȩ́ȩhó̧ bɨ́ ɓè ɓe mwa kàm ɓɨllɨnne ru. Ɓe Yésù bɨ yaá nyɨ̀nnɨ ɓe ɨ́r cwá ŋgə́ yi ɓa kúnɨ Yèrúsàlèm, yúùnɨ nɨ́m ŋgə́ yi go ndɨ̀ŋniì rè. 32Píyéèr ɓe ɓwàjììb noò yaá bɨ́ wumí ɗákɗák; ɨ́dù ŋgáb ɨ́ sə̀mnè, ŋgáb ɨ́ pê mwa Yésùù ɓe nɨ̀ŋgwáàb bɨrɨ́b yi ə́əŋkom ɓe ŋgə́ rè. 33Ɓwâ nɨ̀ŋgwáàb lè yi du éímbɨ́kkɨ́sònɨ Yésùù, á Píyéèr tana ŋgə́: «Tá, á mîn nɨ́m dùná nɨ hò̧. Nɨ́m á óŋnɨ njáŋnɨ̀b taarɨ́b, kɨ́ woò mwi̧, kɨ́ Mòyíìs mwi̧, kɨ́ Èlíì cè mwi̧.» (Píyéèr ya nɨ́ ɗə̀ə̀ŋwá nɨ́m ŋgə́ yi du nyìnnɨ kɨ́.) 34Ŋgə́ á cè nyìnkɨ́nɨ u̧, á ɓàk kù ya go ŋgáb ɗèìnkɨ́nɨ. Vùù ɨ́ bɨ̀ɓà nɨ̀fuùb hȩ ŋgáb yi pə́ ɓàk kɨ́ ŋgáb fúùniì. 35Ɓàk kɨ́ no, kúu nyindíí kù ɨ́ tàhô̧ ɨnè: «Nò rè mwin móò mɨ caré á, jəŋnáam ŋgə́!» 36Cùr kúu kíì, kùb ɨ́ pə́ɗóòhácì bɨ́ Yésù mwi̧. Nɨ̀fuùb ɨ́ dù bɨ́ néín. Jíìb kɨ́ no, ŋgáb ɨ́ dùcè bɨ́ nò kù nɨ́m ŋgáb tɨ pə́ kɨ́ átɨ̀nàwá.
Yésù jukɨ́naá mwɨi kù nyéhè ɓáŋhîn só
(Góòmɓwê Mt 17.14-18; Mk 9.14-27)
37Kpíí kɨ́ no, Yésù ɓe nɨ̀fuùb taarɨ́b lè yaá sócùnɨ ɓeè. Kùŋkùŋ kàm nɨ̀vɨ́tɨ̀bì ɨ́ gàìnwò Yésù. 38Mɨ̀kwìn kɨ́ no, nɨ̀ŋgwá kù ɨ́ yà kɨ́ŋhó̧nɨ ɨnè: «Yée Tá tɔ̀hí! Góomwúum mwin móò íí ya, kpòk muní moò á kí. 39Nyéhè kù á ŋgə́ bìnɨ. Ɓè mu̧u̧, a nà ŋgə́ kɨ́ɨ́ŋ; ŋgə́ á ŋgə́ mgbɨ́ktɨ̀ɓànɨ, káfə́ré a yà ŋgə́ tóŋhó̧nɨ ɓɔ̧ɔ̧. Nyéhè kɨ́ á ŋgə́ ndɨ̀ŋɓànɨ ɓáŋhîn, ŋgə́ a tì éíkɨ́ɓàcì nɨ́ ŋgéé só tìírii. 40Mɨ tɨ yóŋtɨ́ nɨ̀fuùb woò jùkɨ́ nyéhè kɨ́, ɨ́dù, ɨ́ yɔ̂ nɨ́ ŋgáb.» 41Yésù ɨ́ tà: «Kə́í! Ína nyí nùb ɓáŋhɨ́b ə́ə́m sumí ɗàwá rè, há̧á̧ ɓwâ ŋge á mɨ ɓa dùkwànɨ ɓe nyí? Mɨ ɓa nyí jíìkwànɨ há̧á̧ ɓwâ ŋge? Gewona mɨ mwin wó kɨ́ hò̧.» 42Hȩ mutí yi du gòniì, nyéhè rè ɨ́ lòmsê ŋgə́ ɗàá, ŋgə́ ɨ́ mgbɨ́ktɨ̀ɓà ŋgə́ ɓe nyòme. Ɨ́dù Yésù ɨ́ pámɓà nyéhè rè, ŋgə́ ɨ́ wáàŋkî mutí. Ŋgə́ ɨ́ mbɨ́kcùnà ŋgə́ tá noò. 43Nɨ̀vɨ́tɨ̀b lâs ɨ́ gbɨ̀ɨ̀ŋɓà, ŋgáb ɨ́ tà: «Kə́í! Mèín á jíri.»
Kɨ́ gwì bɨrɨ́bí, Yésù á tànɨ àm cwá ní ɓa kúniì
(Góòmɓwê Mt 17.22-23; Mk 9.30-32)
Nùb lâs á cè gbɨ̀ɨ̀ŋháyènɨ ɓe nɨ́ɨ́b Yésù yi ndɨŋndé, á ŋgə́ tana nɨ̀fuùb noò ɨnè: 44«Óknáɓam nɨ́m mɨ du nyí tànànɨ rè mîn. Kùb ɓa nàrénɨ Mwin Nɨ̀rì nɨ̀vɨ́tɨ̀bì ŋgáré á.» 45Ɨ́dù nɨ̀fuùb ɨ́ dù bɨ́ ókwa nyindí kɨ́. Kùb ya yoonatɨ́ bɨ́ ŋgáb njàb nyindí kíì, àm ŋgáb tɨ̀ óklé. Vùù yaácè nɨ́ ŋgáb bìnɨ fɔ́nɨ Yésù njàb nyindí kíì.
Na ma ɨ́ duce jíri?
(Góòmɓwê Mt 18.1-5; Mk 9.33-37)
46 Nɨ̀fuùb ɨ́ yà ndáŋnɨ ŋgábè sumí, mánɨ ɗə̀ə̀ŋnɨ nò du jíri mvókín ŋgábè noò. 47Yésù ɨ́ ɗə̀ŋhȩ̀ nɨ́ nɨ́m ŋgáb yi lə́əmkomndé, á ŋgə́ ɗamwo mutí kù gò ə́ə̀ŋnɨ gín nóò. 48Ŋgə́ ɨ́ tànà ŋgáb: «Nò gamɓa mwɨi ti rè ɓe ɨ́r moò rɨ, gamɓa mɨ nɨ̀mɨr á. Nò gamce mé, gam nò tómwo mé á, ɓetí mvókín nyínè no, nò gesé síí nóò ɗàá rɨ, nò kɨ́ ɨ́ duɓagɨ nò jíri ru.»
Nò du nɨ́ ɓi̧í̧ ɓe nyí ɗàwáá du nɨ nò nyínè á
(Góòmɓwê Mk 9.38-40)
49Jâŋ ɨ́ gàm nyindí, ŋgə́ ɨ́ tànà Yésù: «Tá, nɨ́m tɨ péé nɨ̀ŋgwá kù ŋgɨ́nnɨ nɨ̀wàtɨ̀b ɓe ɓêé ɨ́r woò, nɨ́m ɨ́ ɗû ŋgə́ kààŋnɨ, ɓetí ŋgə́ nɨ nò nɨ́mè kpánéné sé.» 50Ɨ́dù Yésù ɨ́ tàcùnà ŋgə́ ɨnè: «Nyí nɨ ŋgə́ kàŋhɨ̀r, ɓetí nò du nɨ́ ɓi̧í̧ ɓe nyí ɗàwáá du nɨ nò nyínè á.»
Nùb kwɨ́í kù noò, ɗɔ̀ɔ́b Sàmàríì no mvúú gàmnɨ Yésù
51Ɓwâ jíìb kùb yi ɓa áwúkɨ́nɨ Yésù ɓɨllɨnne yi ɗóoré, ŋgə́ ɨ́ sàb gìnɨ Yèrúsàlèm. 52Ŋgə́ ɨ́ tómsòkɨ́yàyè tɨ́pénɨ̀b tíí. Nùb kɨ́ ɨ́ gì, ŋgáb ɨ́ gì féínnɨ kwɨ́í kù no, ɗɔ̀ɔ́b Sàmàríì no, nyààŋkɨ́nànɨ ŋgə́ gúúr. 53Nùb kwɨ́í kɨ́ noò ɨ́ mvû ŋgə́ gàmnɨ, àm ŋgə́ yi ɓa nɨ́ ndóŋnɨ ndó̧o̧ gìnɨ Yèrúsàlèm ndè. 54Ɓwâ Jâk ɓe Jâŋ nɨ̀fuùb Yésùù, yi pə́ u̧nèé, ŋgáb ɨ́ tà: «Kéké, á sàmàìn nɨ́m ɓésówo wa ɓɨllin gò nùb lè yíìndùùkɨ́niì yoo?»
55Ɨ́dù Yésù ɨ́ ɓàndɨ̀cùrê ŋgáb no, ŋgə́ ɨ́ yètè ŋgáb àm ŋgáb ya nyin u̧ kɨ́. 56Ŋgáb ɨ́ ə́llê bɨ́ gɨ̀ndóŋnɨ kwɨ́í kù no.
Nùb ɗú tùnɨ Yésùù
(Góòmɓwê Mt 8.19-22)
57Ŋgáb yaá gùrí jȩ̀ȩ̀, á nɨ̀ŋgwá kù tana Yésù ɨnè: «Mɨ á wu tùnɨ yɨ́ lâs wu ɓa gìniì.» 58Á Yésù tacuna ŋgə́: «Gáŋgbòróóŋ á ɓe ŋgwɨi ŋgábè, gààì á cè ɓe óŋnɨ́b ŋgábè, ɨ́dù Mwin Nɨ̀rì nɨ ɓàcéyè ɓe yɨ́ juu cɨ́mîn ɗàà.»
59Ŋgə́ ɨ́ tànàkwà nɨ̀ŋgwá kù: «Tuwom mɨ.» Á nɨ̀ŋgwá kɨ́ tana ŋgə́: «Tá, mbɨ́k mɨ gɨ̀yè vɨ́rɨ̀nɨ tá moò.» 60Á Yésù tacuna ŋgə́ ɨnè: «Tùwòbɨ̂ŋ wu mɨ, kɨ́ ɗàrɨ́ nɨ ə́r wóò sé. Kɨ́ woò, gɨ wu tàsénɨ kìn du ɓe ɨ́r Ŋgɔ̧́ɔ̧̀ Mèèín.»
61Nò kù ɨ́ tànàkwà ŋgə́: «Tá, mɨ ɓa wu tùnɨ á, ɨ́dù mbɨ́kye mɨ gɨ̀ nyìndɨ̀kɨ́sònɨ gbàŋ moò.» 62Yésù ɨ́ wáànà ŋgə́ ɨnè: «Nò yaré ɗȩ̀ȩ́ ɨ́ góòmcù íí cùrìì, nɨ nò ə́ré Ŋgɔ̧́ɔ̧̀ Mèèín noò sé.»
Sélection en cours:
Lúkàs 9: NTV
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2007 Alliance Biblique du Cameroun, B.P. 1133, Cameroon
