Tsakariyaxi 11
11
1Riwanu hɨriyari, keneupitɨa
tai 'akariuxa mɨtitaiyakɨ.
2Keneutatsuakani 'ekɨ, huku kɨyeyari, kariuxa kɨyeyari matixɨriyakɨ
meta kɨyexi mumamariwawekai matixɨrikɨ.
Xekeneutitsuanani, tuaxa Watsani miemete.
Mukumaweriyariekɨ kɨyexi wawemete.
3Xekeneu'eni muxatsi wahɨwemete watsuari,
wa'ɨxa witsimɨtiu'anekai kanakuxɨtsitɨarieni.
Xekeneu'eni mayetsi watsuari,
Kurutani muweritsie 'ɨtsi 'amayetsuikai makumaweriyariekɨ.
Muxatsi wahɨwemete yuhutatɨ
4Mɨpaɨ kanaineni Yawé nekakaɨyari: «Keniwa'ɨwiyani muxatsi kemɨ'ane 'ari memɨyetuiya memɨkwi'iwakɨ. 5Kemɨ'ane memɨwanane mekaniwakwika mekawanenimayatɨ, meta kemɨ'ane memɨwatua mɨpaɨ meputiyuane: “'Aixɨa ke'itɨarieka Yawé, 'ari xiku nepatɨa”. Memɨwahɨtɨtɨ nenimayatsika mepɨkahexeiya wahepaɨtsita mieme. 6'Ayumieme 'ariri nepɨkawatinenimayata 'ikɨ kwieyaritsie memɨkiekatari —mɨpaɨ kanaineni Yawé—, pɨta nekaniwayetuamɨkɨ wa'aurie kiekatari wahetsɨa meta tiwa'aitɨwame hetsɨa. Tsepa wakwieyaritsie memɨtetahaxɨa meteyuniyatɨ, ne wahetsie nepɨkatanuani».
7Hikɨ newahɨnetɨ nekanayani muxatsi memɨkwi'iwakɨ memɨ'ayumiemetetɨkai. Hutame tihɨweme 'itsɨya nekaniuti'ɨni: xeime 'Aixɨa Mɨtiuka'iyari nekatiniuterɨwa, xeimeta Memɨyunɨ'ɨ, hikɨ newa'ɨwiyatɨ nepatɨa muxatsi. 8Kwitɨwa xeimetseritsie nepɨwaranayexɨri yuhaikame muxatsi wahɨwemete.
Peru neputi'uxixɨ muxatsi wahekɨ, mɨkɨta muxatsi nekɨmana yaxeikɨa meputi'uxixɨ. 9'Ayumieme mɨpaɨ nepɨtiwarutahɨawixɨ: «Neri xehɨweme nepɨkahayani. Kehate xemɨkwini tsepatsɨ xemukwi, kehate xemɨkwi'iwa, tsepa xemukwi'iwaxɨ, kemɨ'aneta memɨyuhayewa, tsepa memɨyutikwai».
10Hikɨ 'itsɨ ne'utikweka 'Aixɨa Mɨtiuka'iyari nemɨtiterɨwaxɨ, nekanenumura. Mana memɨtanenierekai mɨpaɨ memɨtehetimanikɨ kename Kakaɨyari tɨratu nuiwarite wahamatɨa kemɨrexeiyakai 'enumurakai. 11'Ana tukaritsie kwitɨwa tɨratu kaneutipare, muxatsi wanawemete memɨnetsixeiyakai mɨpaɨ mekatenetimani kename Yawé niukieyatɨkai.
12Hikɨ mɨpaɨ nekatiniwarutahɨawe: «Xɨka 'aixɨa 'aneni xehepaɨtsita, xekeneteneupitɨa ne'uximayatsikakɨ, yatɨ pɨtikatixaɨ, tsepa xekena'ɨtɨ». Mekaneteniupitɨani xeitewiyari heimana tamamata pɨrata tuminiyarikɨ. 13Kenemɨtiupitɨarie 'etsipupaɨmekai.
Hikɨ Yawé mɨpaɨ kanetiniutahɨawe: «Keneyetua tepɨa mɨtikwaxiya hetsɨa». Hikɨ pɨrata tuminiyari nene'ɨni xeitewiyari heimana tamamata, nekaneiyetuani tewi mitikwaxiya hetsɨa Yawé tukita.
14Hikɨ nekanenumurata hutarieka mieme 'itsɨ Memɨyunɨ'ɨ nemɨtiterɨwaxɨ, mɨpaɨ mɨtimatsiɨkɨnikɨ Kura 'Ixaheri hamatɨa kememɨteyuxewikai hikɨri mepeutaxɨriyaxɨakai. 15Yawé hikɨ mɨpaɨ kanetiniutahɨaweta: «Hikɨta 'iya muxatsi wahɨwemete memɨka'u'iyari wahepaɨ ketineuyukemaritɨa, 16karikɨ ne xeime muxatsi wahɨweme nekananukakemɨkɨ 'ikɨ kwieyaritsie, mɨkɨ pɨkayu'iyaritɨaka muxatsi memɨkwixime wahetsiemieme, meta pɨkawatiwauni 'etsimemɨpepe, meta pɨkawati'uayemani memɨti'ɨkamɨrike, meta 'aixɨa memɨ'anene pɨkatiwamini, matsi pɨwatikwani kemɨ'ane memɨwaiyatɨka meta wakarutsa panutihɨnaxɨani».
17Xɨa'ui tihɨweme nitixaɨtɨkɨ mɨkatiyunaki'erie
mɨwaruku'eiri yumuxatsima.
'Ixipara pewiteni mamaya,
meta hɨxieya tserietana mieme nawaxakɨ ke'uyetsekieni.
Mamaya kayuawetɨ ke'ayani,
meta hɨxieya tserietana mieme, kanieretɨ ke'ayani.
Sélection en cours:
Tsakariyaxi 11: hch
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2020, Wycliffe Bible Translators, Inc.