Tsakariyaxi 10
10
Yawé Kura pɨ'ɨwiyani
1Yawé xekeneutawawiri mɨkawiyekɨ witarita.
Mɨkɨ kanihɨkɨtɨni hai mɨyɨyɨwi mɨtiwewiwa
meta wiyeri meyenɨ'awa.
Mɨkɨ kanihɨkɨtɨni yunaime teɨteri wahetsiemieme
kwiepa tupiriyate mɨtiutinenetɨwa.
2Kakaɨyarixi memɨwewiyatɨka 'itarikakɨ mepɨtekuxata,
temaiwawemete 'itarika mepɨteheinɨtsa,
mepɨtekuxata 'itarikakɨ kememɨtenieritɨarie
meta kememɨteyɨnɨtɨwa pɨtiyakɨ.
'Ayumieme xeme xepeuyexɨrie
muxatsi memɨkatehekakutsiyari wahepaɨ.
3Nepɨha'a tehɨwemete wahepaɨtsita,
nepɨwa'uximatɨani mɨkɨ memanuyetei.
Yurikɨ Yawé Naimekɨmɨtɨrɨkaɨye
Kura kwieyaritsie kiekatari kaniwa'ɨwiyani, mɨkɨ muxatsimama mekanihɨkɨtɨni,
'arike yukawayutsixima memɨtɨrɨkawi kaniwarayeitɨamɨkɨ
kepauka muyutamieni.
4Kura hetsie mepɨyekɨne
tete 'itsikina mieme meta kɨye 'ixuriki kiyari mukuhanani,
tupi kuyaxa mieme meta yumɨiretɨ te'aitamete.
5Meyuxewitɨ yunaitɨ memɨte'ayu'iwa mepɨhɨkɨtɨni
meyukwitɨwetɨ mepɨte'ayu'iwani kaye'utɨma muhaxuyatsie,
kawayutsixi wahetsie memutei mepɨwaranakaxɨrɨwani,
Yawé wahamatɨa muyeikanikɨ waparewietɨ.
6«Ne Kura nuiwarimama tɨrɨkariya nepuwapitɨani
meta nepɨwatawikweitsitɨani Kutse nuiwarimama.
Nepɨwarutinenimayataxɨ
hikɨ 'ayumieme nepuwarakunuitɨani.
Wa'atɨtɨ hatsuaku nepɨkatiwaruku'eiri nepɨ'aneni,
Ne Yawé nemɨhɨkɨkɨ wakakaɨyari,
nepuwata'eiya.
7'Epɨrahini kiekatari kuyaxi memɨte'ayu'iwa wahepaɨ mepɨ'aneni,
wa'iyari puyutemamawieka
winu memanu'ieni hepaɨ.
Waniwema kepauka memɨwaxeiya mekaniyukatemamawikuni,
wa'iyari puyutemawieka Yawé hetsiemieme.
8Ne nepuwatahɨawe hikɨ nepuwakuxeɨrieni.
Kepauka nemɨwatawikweitsitɨani netinetuame,
meyumɨiretɨ mepakɨne meripai hepaɨ.
9Tsepa nemɨwareutaxɨriexɨa hipame teɨteri watsata,
'ateewa paitɨ me'u'uwatɨ mepɨnetsihaye'erieni.
Tsepa muwa meme'uwakai yuniwema yunaitɨ,
mekani'axɨakuni yukwietsie.
10'Ekipitutsie nepɨwarayewitɨni,
metatsiere 'Atsiriya kwieyaritsie,
Karaha kwieyaritsie nepɨwa'atɨani meta Riwanu hɨriyaritsie,
'akuxi hipatɨ hakewa memetiyaxe kwie hauyewetɨ kanayeimɨkɨ.
11Haramara kayuwatɨ mɨkatimatsie mepɨkɨne,
ne peru hamewari kayuwatɨ nepɨpitɨani,
meta Niru hatuxameyari 'amatiyewa pakawani.
'Atsiriya kemɨtiyuta'ɨre nepeitiparitɨani,
meta 'Ekipitu kemɨti'aita nepikumaweriya.
12Netɨtɨ nepɨhɨkɨtɨni nemɨwatɨrɨkariyani,
hikɨ mɨkɨ mepuhuni nekɨmana»,
mɨpaɨ kanaineni Yawé.
Sélection en cours:
Tsakariyaxi 10: hch
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2020, Wycliffe Bible Translators, Inc.