Génesis 13
13
Abram Lotjai kanakmau
1Abram Egipto nugkanmaya jinki weak: Nina nuwen, ninu ainan ashi yaruak, tura nina awe Lotnasha juki Néguebnum waketkinaiti. 2Abramka orortin, jiru plata tutaisha tura tagkuri ainasha nukap arujakuiti. Iman asa shir wiakach ajakuiti. 3Néguebnumia jinki Betel nugkanam, tura Ai nugka ajapeen etentamunam yaunchuk puju jakmaurin pujustasa waketkinaiti. 4Nu nugkanam Abram tagku aina maa patasa epeatnun najanawaiti. Tura nui tagku ainan maa patas epeak Yuusan emematu jakuiti.
5Lotcha ovejartin, vacartin, tura nina inatairisha irunu, tuma asa nina iichri Abramjai metek shir wiakach ajakuiti. 6Turasha nita pujamuka nugka unchau asamtai, tagku aina shir nukap asar chirichirin wári amuina asarmatai, tsanig pujuschamnau nekapena. 7Abraman tagkurin kuitamin aina, tura Lottan tagkurin kuitamin ainajai kajernaina. Nuiyasha cananeo aina tura ferezeo ainasha nuig matsataina. 8Tumainakai Abram Lottan chicharuk: Ameka wina pataaruitme. Tumau asar ika kajernaimaitsuji. Tura amina tagkurmin kuitamin aina tura wina tagkurun kuitamin ainajaisha kajernaimain ainatsui. 9Nugka agkan awai, yamaika ijaigka kanakmi, ame wakeramu iisam pujusta. Ame nujinmani weakminka wika nugkani wetatjai, antsu ame nugkani weakminka wika nujinmani wetatjai, tusa tinaiti.
10Takai Lot iikma, nugka paka entsa Jordánnum jeakun wainkauwaiti. Turasha nuka entsa pajattrau asa, Yuusa ajari Edén ajakua numamtin yaakat Sóarnum jeaku ajakuiti. Tumau asa yaakat Egiptowa numamtin wantinu jakuiti. Nuka Sodoman Gomorrajai Yuus emeseatsaig ajakuiti. 11Lotka nugka paka Jordánnum jeakun etegkawaiti. Tura nigka etsa watainmani wuwaiti. Abram Lotjai tu kanakaru ainawai. 12Abramka Canaán nugkanam juakuiti. Antsu Lotka yaakat Sodomanam jeastatuk pujustasa wuwaiti. 13Nu yaaktanmaya shuar ainaka Yuus umirtan nakitaina asar, shir pegkerchaun tunaun takaina. 14Lot wematai, Yuus Abraman chicharuk: Ame nugka pujam nui nagkamam, etsa watainmani, etsa akatainmani, nujinmani, tura nugkanisha shir iista. 15Ame nugka wainam aunka, amee weantu aina nu, tura aminuk atii tusan ashi amastatjai. 16Tura amee weantu ainanka, yaikim nekapmamainchauwa iman amajsatnaitjai, turamu asar nekapmamainchau artinaiti. 17Amina nugkan amastataj nuna esanti, tura wagkantisha wekatusam iista, tusa tinaiti. 18Tama Abramka nuap jean juki, yaakat Hebrónnum jeastatuk shuar Mamré naartinnau númi encina tutai irunmaunam pujustasa wuwaiti. Tuma nui jeaa Yuusan ememattasa tagku aina maa patasa epeatnun najanawaiti.
Sélection en cours:
Génesis 13: hubDBL
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2010, Wycliffe Bible Translators, Inc. All rights reserved.
