Génesis 9
9
Noéta Tayta Dios promitishqan
1Nirkurmi Noétawan surinkunata Tayta Dios bendicionninta qoshpan nirqan: <<Kay pasaman juntäyashqaykiyaq mirayay.#Gén. 1.28. 2Lapan casta uywakuna, pajaqkuna#9.2 Wakin runakunaqa vuelaqkuna niyanmi., pachalanpa, lätaypa puriqkuna y lamarcho kawaqkuna mansakuyäshunkimi. Saynöpis say uywakuna lapanmi qamkunapa munaynikicho kayanqa. 3Tukuyläya kawaqkuna, mikuykuna y verdürakunapis mikuyänaykipaqmi kaykan. 4Isanqa ama mikuyankisu yawaryuq aysata. Yawarninchömi kawaynin kaykan.#Lev. 7.26-27; 17.10-14; 19.26; Deut. 12.16, 23; 15.23.
5<<Runa mayinta wanusiq kaqqa wanusishqami kanqa. Saynölami runata wanusiq kaq uywapis wanusish kanqa. 6Kikï niraqtami runata kamashkä.#Gén. 1.26. Saymi pipis runa mayinta wanusiptinqa kikintapis wanusinqa.#Éxo. 20.13.
7<<Qamkuna askaman mirayay. Saynöla qampita miraqkunapis kay pasaman juntäyashqanyaq mirayäsun>>.
8Nirkurnami Noéta surinkunatawan Tayta Dios nirqan: 9<<Diluviuwan yapay mana ushakäsinäpaqmi qamkunawan y qamkunapita miraqkunawan pactuta ruraykä. 10Saynölami pactüta ruraykä arcapita yarquq lapan casta pajaqkunawan, ashmana kaq y mana ashmana kaq uywakunawan y maysaychöpis uywakunawan. 11Kay pactuta cumplirmi imaypis diluviuwan ushakäsishaqnasu kay pasata, runakunata ni lapan kawaqkunatapis. Kanan kashqan diluviunöqa manami imaypis kanqasu.
12<<Tukuy casta uywakunawan y lapan runakunawan pactu rurashqäta imaypis yarparänäpaqmi 13pukutaycho seqyawta#9.13 Wakinqa seqyaw ninanpa trukan turmanyuy niyanmi. rikakäsimushaq. Say seqyawmi imaypis señal kanqa kay pasawan pactuta rurashqäta yarpänäpaq. 14Saymi pasa jananpa pukutay shamuptin seqyawta rikakäsimushaq. 15Say seqyaw ichiptinmi yarpäshaq qamkunawan y kay pasacho kaq lapan casta uywakunawan pactuta rurashqäta. Saymi kay pasata yakuwan imaypis ushakäsishaqnasu. 16Pukutaycho seqyaw ichimuptinmi yarpäshaq lapan runakunawan y uywakunawanpis pactuta rurashqäta. Say pactutaqa imaypis cumplishaqmi. 17Saymi seqyawta señalpaq churashkä qamkunawan y uywakunawan pactuta rurashqäta yarpänäpaq>>.
Saynömi Noéwan Tayta Dios parlarqan.
Surinkuna imano kayänanpaq kashqantapis Noé nishqan
18Noépa surinkunami kayarqan Sem, Cam y Jafet. Say kimsan surinkunawanmi arcapita Noé yarqayämurqan. Cam karqan Canaánpa papäninmi. 19Noépa kimsan surinkunapitami kay pasacho lapan runakuna mirayash.
20Purun chakrata kichaskirmi üvata Noé plantarqan. 21Saypitanami üva poquskiptin vïnuta upur Noé shinkarqan. Shinkarkurnami qarapächula toldun rurincho jitaraykarqan. 22Papänin qarapächula jitaraykaqta rikaykurmi Canaánpa taytan Cam ishkay kaq wawqinkunata wilaq aywarqan. 23Saymi Semwan Jafet jinan höra capötita ayllukurkur papänin kaqman qepapaylapa yaykuyashpan saparkuyarqan. Sayno saparkuyarqan papänin qarapächula kaykaqta mana rikayänanpaqmi.
24Malaq shonquyashna rikcharkamurmi Noé musyarqan shulka kaq surin wawqinkunata wilashqanta. 25Saymi nirqan:
<<¡Canaán maldicionädu kasun!
¡Payqa wawqinkunapa ashmaylanmi kanqa!>>
26Nirkurnami yapay nirqan:
<<Semtaqa lapanchöpis Tayta Dios yanapaykuläsun.
Canaánpita miraqkuna isanqa Sempita miraqkunapa ashmayninkuna kayäsun.
27Jafetta Tayta Dios yanapaykusun askaman mirananpaq.
Sempita miraqkunawan juntu täyänanpaqpis kamakaykasisun.
Saynöpis Jafetpita miraqkunapa ashmaynin Canaánpita miraqkuna kayäsun>>.
28Diluviu kashqanpita Noé kawarqan kimsa pachak pisqa chunka (350) wata masraqmi. 29Noé wanurqan esqun pachak pisqa chunka (950) watayuq kaykarmi.
Sélection en cours:
Génesis 9: qvhB
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2003, Wycliffe Bible Translators, Inc. All rights reserved.
