Génesis 15

Abramta Tayta Dios promitishqan

1Saypitanami Tayta Dios revelacioncho Abramta nirqan: <<Abram, ama mansariysu. Noqami sapäshuqniki escüdu kaykä. Qammanmi bendicionnïta churamushaq>>.

2Sayno niptinmi Abram nirqan: <<Tayta Dios, suriynaq kaykaptïqa imaykatapis walälachir qomanki. Wanukuptïqa Damascupita ashmaynï Eliezerlachir lapan imaykäkunawanpis quëdanqa. 3Suriynaq kanäpaq destinaykämaptikiqa makïcho yuriq ashmaylächir imaykäwanpis quëdanqa>>.

4Sayno niptinmi Tayta Dios nirqan: <<Manami ashmaynikisu imaykaykiwanpis quëdanqa, sinöqa kikikipa surikimi>>.

5Saypita Abramta waqtaman pushaykurmi Tayta Dios nirqan: <<Jana pasata rikay. ¿Qoyllarkunata yupayta kamäpakunkiku?>>

Saypitanami nirqan: <<Saynömi qampita miraqkunapis yupayta mana atipaypaq kayanqa>>.#Rom. 4.18; Heb. 11.12.

6Sayno nishqanta Abram criyiptinmi jusaynaqtana Tayta Dios chaskirqan.#Rom. 4.3, 9, 22; Gál. 3.6; Stg. 2.23. 7Saypitanami Tayta Dios nirqan: <<Noqaqa Tayta Diosmi kaykä. Kay rikasishqä chakrakunata herenciayki qonäpaqmi caldeo runakuna täyashqan Ur markapita qamta jorqamurqä>>.

8Sayno niptinmi Abram nirqan: <<Tayta Dios, ¿imanöpataq musyashaq kay rikasimashqayki parti rasunpaypa noqapaq kananpaq kashqanta?>>

9Saymi Tayta Dios nirqan: <<Apamuy juk ternërata, juk cabrata y juk carnita. Say uywakuna kayäsun kimsa watayuq. Saynöpis apamuy juk kulkushtawan juk pushapa palumata>>.

10Sayno niptinmi Abram aparqan say uywakunata. Nirkur pula cuartunpa cuartusaykurmi frenti frenti churarqan. Palumatawan kulkushtami isanqa pulanpa cuartusarqansu.#Jer. 34.18-19. 11Say churashqan aysakunaman wiskurkuna shayämuptinmi Abram wajakurqan. 12Pasa sakaykaptinnami Abram wanuypanöraq punukäkurqan. Saymi sueñuynincho pasaypa sakayta rikar fiyupa mansarirqan.

13Say hörami Tayta Dios nirqan: <<Qampita miraqkunami chusku pachak (400) wata juk markacho jäpa runakunapa ashmaynin kar nakayanqa.#Éxo. 1.1-14; Hech. 7.6. 14Sayno kaptinpis say marka runakunatami castigashaq. Nirkurnami qampita miraqkunata imaykaläya riquëzayuqta jorqamushaq.#Éxo. 12.36; Hech. 7.7. 15Manaraq saykuna kaptinmi awkinyarna ali wanuypa wanukushpayki unay aylluykikuna kaqman aywakunki. 16Chusku pachak wata päsarkuptinnami qampita miraqkuna kay taykashqaykiman kutiyämunqa. Kutiyämunanpaqqa kaycho taykaq amorreo runakunapa jusankuna seqaypa poqushnami kaykanqa>>.

17Pasa sakarkuptinnami qoshtaykaq shanshayuq kanala y qerupa puntancho rupaykaq ninapis yuriskirqan. Saykunami churaraykaq aysakuna chawpinpa päsarqan.#15.17 Say wisan runakunapa costumbrin kaynömi karqan: Imatapis promitishqanta cumplinanpaq parlarqa uywakunata pulanpa cuartusaykurmi frenti frenti churayaq. Nirkurnami say aysakunapa chawpinpa päsar niyaq: <<Noqatapis ishkayman partimäsun promitishqäta mana cumpliptï>>. Saymi qoshtaykaq shanshayuq kanala y qerupa puntancho rupaykaq nina aysakuna chawpinpa päsaykaqta rikar Abram tantiyarqan kikin Tayta Dios päsaykashqanta. Sayno päsarmi Abramta Tayta Dios tantiyasirqan promitishqanta cumplinanpaq. 18Say junaqmi Abramwan pactuta rurar Tayta Dios nirqan: <<Kay taykashqayki partita qampita miraqkunatami qoykushaq. Lindërunmi kanqa Egipto mayupita Éufrates jatun mayuyaq.#Hech. 7.5. 19Saychömi taykäyan ceneo runakuna, cenezeo runakuna, cadmoneo runakuna, 20heteo runakuna, ferezeo runakuna, refaíta runakuna, 21amorreo runakuna, cananeo runakuna, gergeseo runakuna y jebuseo runakunapis>>.

Sélection en cours:

Génesis 15: qvhB

Surbrillance

Copier