Takwiin 9
9
Muʼaahadat Allah maʼa Nooh
1Wa l-Rabb baarak Nooh wa awlaadah wa gaal leehum : «Aldo wa abgo katiiriin wa amlo al-ard. 2Wa kulla l-makhluugiin al-hayyiin fi l-ard yakhaafo minku wa l-ruʼub yakrubhum, misil tuyuur al-sama wa zawaahif al-ard wa huut al-bahar, kulluhum ke nantiihum leeku fi iideeku. 3Misil awwal anteetku al-khadaar le l-akil, hassaʼ nantiiku kulla l-makhluugiin al-hayyiin.
4«Laakin ma taakulu laham be dammah Achaan al-ruuh gaaʼide fi dammah. 5Wa laakin kan le dammuku intu aw hayaatku, ana niʼaakhib al-haywaan al-yaktul naadum. Wa niʼaakhib ayyi insaan al-yaktul insaan. Aywa, niʼaakhibah fi chaan hayaat akhuuh al-hu katalah. 6Wa l-naadum al-daffag damm hana naadum, hu kula, naadum aakhar yidaffig dammah. Achaan Allah khalag al-insaan fi suurtah. 7Wa kan leeku intu, aldo wa abgo katiiriin wa ziidu fi l-ard.»
8Wa l-Rabb gaal battaan le Nooh wa le iyaalah al-maʼaayah : 9«Kan leyi ana, nisawwi muʼaahadati maʼaaku wa maʼa zurriiyitku min baʼadku, 10wa maʼa kulla l-makhluugiin al-hayyiin al-gaaʼidiin maʼaaku, al-tuyuur wa l-bahaayim wa l-haywaanaat, yaʼni kulla l-makhluugiin al-marago maʼaaku min al-safiina. Wa dool kulla l-makhluugiin al-yiʼiichu fi l-ard. 11Wa ana nisawwi muʼaahadati maʼaaku wa abadan kulla makhluug hayy ma yiddammar be l-kharag. Wa abadan al-kharag ma yidammir al-ard.»
Alaamit al-alaakha
12Wa l-Rabb gaal : «Di hi al-alaama hana l-muʼaahada al-nukhuttaha beeni wa beenku wa been kulla l-makhluugiin al-maʼaaku. Wa l-muʼaahada di tabga daayme min zurriiye le zurriiye. 13Ana nukhutt nubbaali wa hu hajjaaz al-matar fi l-sahaab wa da yabga alaama hana l-muʼaahada beeni wa been al-ard. 14Wakit nilimm al-sahaab min foog le l-ard wa hajjaaz al-matar yibiin fi lubb al-sahaab da, 15ana nifakkir fi l-muʼaahada al-sawweetha maʼaaku wa maʼa kulla makhluug hayy. Wa abadan al-kharag ma yanzil le yidammir kulla makhluug hayy. 16Wakit hajjaaz al-matar yibiin fi l-sahaab, ana nichiifah wa nifakkir fi l-muʼaahada al-daayme al-gaaʼide beeni ana al-Rabb wa been kulla l-naas wa kulla makhluug hayy fi l-ard.»
17Wa l-Rabb gaal le Nooh : «Di bas al-alaama hana l-muʼaahada al-sawweetha maʼa kulla l-makhluugiin al-gaaʼidiin fi l-ard.»
Awlaad Nooh al-talaata
18Wa Nooh marag min al-safiina maʼa iyaalah wa humman Saam wa Haam wa Yaafas. Wa Haam hu abuuh le Kanʼaan. 19Wa kulla l-naas al-muchattatiin fi l-ard marago min iyaal Nooh al-talaata dool bas.
20Wa Nooh hu awwal harraati al-maggan jineenit inab. 21Wa gamma chirib al-khamar hana asiir al-inab wa sikir wa ragad aryaan fi lubb kheemtah. 22Wa Haam abu Kanʼaan chaaf ire abuuh wa marag macha khabbar akhwaanah. 23Wa khalaas, Saam wa Yaafas chaalo khalag kabiir hana abuuhum wa khattooh fi kataafeehum wa raakho be gafaahum wa khatto oorit abuuhum. Wa ma chaafo oorit abuuhum achaan humman ma muwajjihiin aleyah.
24Wakit al-sakar chattat min Nooh, hu irif al-cheyy al-wileedah al-sakhayyar Haam sawwaah leyah. 25Wa gaal :
«Allah yalʼan Kanʼaan
wa yabga abd al-abiid hana akhwaanah.»
26Wa gaal battaan :
«Baarak Allah Ilaah Saam.
Khalli Kanʼaan yabga abid le Saam !
27Khalli al-Rabb yiwassiʼ turaab Yaafas
wa hu yaskun fi kheemit Saam
wa Kanʼaan yabga leyah abid.»
28Wa baʼad al-kharag, Nooh aach 350 sana 29wa maat fi umur hana 950 sana.
Sélection en cours:
Takwiin 9: ADT19
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Arabe tchadien (alphabet latin) Bible © Alliance Biblique du Tchad, 2019.
