Zɛnɛse 4
4
Kîŋ da Ebɛɛ
1Nya ƃe Adaŋ è ŋɔnɛnîi Iî kɔ̀lɔŋ a nɛnî. Ǹɛnîi è koo síɣe é Kîŋ maa sɔlɔ ƃó ǹyɛɛi, “Ŋa lóŋ-surɔ̂ŋ maa sɔlɔ ƃó Yâwɛɛ ŋɔkpɔŋ-maai su.” 2È ŋɔ́nɔ Kîŋ ǹêɣe Ebɛɛ maa sɔlɔ ƃó. Ebɛɛ è kɛ̀ a ƃála mɛi-kaa-nuu, Kîŋ kɛ́ ƃò a kpâlaŋ ŋá tii-kɛ-nuu. 3È kɛ̀ a tãi tɔnɔ, Kîŋ è pà Yâwɛɛ pɔ́ a ŋɔsí-sãai maa-ŋuŋ a sama-sɛŋ. 4Ebɛɛ máŋ è pà a ŋɔsama-sɛŋ a ŋɔƃála-loŋ maa-ŋuŋ da ƃála wulɔ Yâwɛɛ pɔ́. Yâwɛɛ è ǹyée sèe Ebɛɛ mu da ŋɔsama-sɛŋ. 5Kɛ́lɛ vé ǹyée see ní Kîŋ mu da ŋɔsama-sɛŋ. Nya ƃe Kîŋ è ǹíi ŋwàna kpɔ́ a ŋanaa, ŋ̀ɛ́i maa é fáleŋ. 6Nya ƃe Yâwɛɛ è mò ma ǹyɛɛi, “Ílii ŋwânaai íŋɛi maa fáleŋɔɔ, lé mɛni ma? 7À kɛ̀ ƃà tùa a ǹɛ́lɛɛ, fé pâi ńyee seêi ímu? Kɛ́lɛ à kɛ̀ ƃà wàla tûa a ǹɛ́lɛɛ, gɛ̀ ní sɔnyɔ̂ŋ káa ípɛrɛi lá a gɛɛ ǹyée é pɔ̂ri yâ, kɛ́lɛ fɛ̂ɛ í ǹyée mɛi ɣále.”
8Nya ƃe Kîŋ è mò ǹêɣe Ebɛɛ ma ǹyɛɛi, “Kú lí gbâlaŋ ŋá.” Tãi dí kɛ̀ la gbâlaŋ ŋái, Kîŋ è pɛ̀lɛ ǹêɣe Ebɛɛ ma é bàa.
9Nya ƃe Yâwɛɛ è mò Kîŋ ma ǹyɛɛi, “Ílêɣe Ebɛɛ kɔ̀ɔ?”
Ńyɛɛ mai, “Fé gɛ̂i kɔ́lɔŋ. Ńyãa ƃa ńêɣe mɛi káa-nuu?”
10Yâwɛɛ ǹyɛɛ mai, “Lé ƃé ŋí í gɛ̀i? Ílêɣe ŋãa wɔ́lɔ woo a serîi ḿâ gɛ́ kùla ǹɔii mu. 11Mɛni ma náɣaŋ káa yâ, ǹɔii mâ, nyii a ǹá ƃó a gɛɛ é ílêɣe ŋãai sɔlɔ ƃó é kúla íyêei. 12Ƃà tíi kɛ̀ ǹɔii ma, vé pâi sí-sɛŋ kpɛtɛ̂i íyêei. Ƃa pâi kɛ̂i nɔ́ a pilaŋ-gɔ́ɔ ma-nuu ǹɔii su.”
13Nya ƃe Kîŋ è mò Yâwɛɛ ma ǹyɛɛ, “Ŋátɔŋ kpɛ́-maai kɛ́tɛi é tɛ́ɛ nyii ma ŋa pɔ̂ri mui. 14Gáa, ƃa ŋ́gbɛ sâa ǹɔii ma, ǹyaŋ ŋa pâi kɛ̂i a ǹóɔɔ yâ. Ŋa pâi tela kɛ̂i nɔ́ a pîlaŋ-kɔɔ ma-nuu ǹɔii su. Ǹúui kélee pâi ŋ́gâai, a pâi ḿbaâi.”
15Yâwɛɛ è mò ma ǹyɛɛi, “Vé tí. Ǹúui kélee pâi í paâi, núu lɔ́ɔlu mɛi feerɛ a pâi saâi ŋɔsuui su.” Nya ƃe Yâwɛɛ è pɔ́ɔ kɛ̀ Kîŋ ma a ŋɛi-kɛ-maa a gɛɛ núu kélee à gàa, vé bàa. 16Nya ƃe Kîŋ è kùla Yâwɛɛ ŋɛ́i é lí é sée lɔii da su da kɛ̂ ma “Bilaŋ-gɔɔ-ma lɔii,” Idɛŋ lɔii vóloi ƃêlai-pere.
Kîŋ ŋɔsuui
17Kîŋ è ŋɔnɛnîi kɔ̀lɔŋ a nɛnî. È koo sîɣe é Inɔ maa sɔlɔ ƃó. È taa-lee tɔ̀ɔ é ǹóŋ Inɔ láa sée ma. 18Nya ƃe Inɔ è Ira maa sɔlɔ ƃô, Ira é Mɛuyɛ maa sɔlɔ ƃó, Mɛuyɛ é Mɛtusɛ maa sɔlɔ ƃó, Mɛtusɛ é Lamɛ maa sɔlɔ ƃó. 19Lamɛ è nɛnî feerɛ kùla. Dɔnɔ láa ƃé kɛ̀ a Ada, gbélii láa kɛ́ ƃò a Zila. 20Ada è Zaba maa sɔlɔ ƃô. Diai kɛ̀ a ƃûu mu nyii-kɛ-ƃelai, nyii-ŋai kɛ̀ a taa-tulɛ tɔɔ-ƃelai, dínâŋ ƃé kɛ̀ a Zaba. 21Nèɣê láa ƃé kɛ̀ a Zuba, nyii kɛ̀ a kɔnîŋ ɣale-ƃela da ƃɔɔ fɛ́ɛ-ƃela dínâŋ. 22Zila è Tuba Kîŋ maa sɔlɔ ƃô. Tuba Kîŋ è kɛ̀ a ƃara da tíi kɛ́-kɔli-sãa sii kélee ɣale-nuu. Záaƃɔ̂lɔ ƃé kɛ̀ a Naama.
23Lamɛ è mò ŋɔnɛyâai dîa ǹyɛɛi,
“Ada da Zila, ka ŋ́oo mɛ́ni.
Ŋá nalôŋ tɔnɔ pàa, nyii ńôkwa é ŋ́wanai.
24À kɛ̀ da kpa kula-laa kɛ̀ Kîŋ paa mɛni ma lɔ́ɔlu mɛi feerɛ,
gɛ̀ ní da pâi kpa kula-laa kɛ̂i ḿɛni ma buu lɔ́ɔlu mɛi feerɛ káo lɔ́ɔlu mɛi feerɛ.”
Sɛ̂ ŋɔsuui
25Adaŋ è ŋɔ́nɔ ŋɔnɛnîi kɔ̀lɔŋ a nɛnî, é koo síɣe é lóŋ-surɔ̂ŋ maa sɔlɔ ƃó, é ǹáa sée a Sɛ̂, ǹyɛɛi, “Ɣâla a lóŋ da kpɛ́ni tɛ́ɛ ḿbɔ Ebɛɛ pɔɔ ŋá, nyii Kîŋ è bàai.” 26Sɛ̂ ǹyaa máŋ è lóŋ-surɔ̂ŋ maa sɔlɔ ƃô, é ǹáa sée a Inɔsi. É síɣe maa tãi ma, núu-kpune è nâa pɛ̀lɛ Yâwɛɛ fɛliɛɛ mâ díɣâla-fɛliɛɛi su.
Sélection en cours:
Zɛnɛse 4: KWB
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2012 Bible Society in Liberia
