Génesis 1
1
Tej tbant tcyakil tu'n Dios
1T-xe tnejel cub tbincha'n Dios cya'j ex tx'otx'. 2Minti'tok ttxolil tx'otx', ex minti'tok at twitz; attok klolj tibaj mar ma' t-xe', ex in yucchtok T-xew Dios tibaj a'.
3Tmatzun Dios: E tbant spic'un.
Banttzun spic'un. 4O til Dios ba'n e'la spic'un, ex el tpa'n spic'un ti'j klolj. 5K'ijl tbi spic'un oc tk'o'n; atzun klolj, konic'an tbi oc tk'o'n. Extzun jun k'ij tuc'ix jun konic'an; ex atzun tnejel k'ij jlu.
6Tmatl Dios: E tbant jun pabl tib t-xol a', tu'n tel tpa'n tib txkan a' ti'j txkantl.
Ictzun tten o bant. 7Tbincha Dios pabl tib t-xol a'. Txkan a' cyaj tjak' pabl tib, ex txkantl a' cyaj tibaj pabl tib. 8Twitz cya'j tbi pabl tib oc tk'o'n. Extzun juntl k'ij tuc'ix juntl konic'an; ex atzun tcabin k'ij jlu.
9Tmatl Dios: E tcub tchmon tib tuj junx lugar tcyakil a' at tjak' twitz cya'j, ex e tcyaj k'ancha'l aju tzkij.
Ictzun tten o bant. 10Tx'otx' tbi aju tzkij oc tk'o'n; atzun a' otok cub tchmon tib, mar tbi oc tk'o'n.
O til Dios ba'n e'la jlu. 11Tmatl Dios: E ttzaj pok'l c'ul twitz tx'otx' tuc'ix tcyakil wik awal in tk'o'n tiyjil, ex tze' in tk'o'n twitz ex at tiyjil tuj, teyle te junjun tiyjil.
Ictzun tten o bant. 12Jaw pok'l c'ul twitz tx'otx', tuc'ix tcyakil wik awal in tk'o'n tiyjil, ex tze' in tk'o'n twitz ex at tiyjil tuj, teyle te junjun tiyjil. O til Dios ba'n e'la jlu. 13Extzun juntl k'ij tuc'ix juntl konic'an; atzun toxin k'ij jlu.
14Tmatl Dios: E cybant k'ol spic'un twitz cya'j, tu'n tel cypa'n k'ijl ti'j konic'an, tu'n cyajben te cyechal tk'ijlalil, k'ijl ex abk'i, 15ex tu'n cykoptz'aj twitz cya'j, tu'n cyk'onte spic'un twitz tx'otx'.
Ictzun tten o bant. 16Tbincha Dios cabe nmak k'ol spic'un, aju k'ol spic'un mas matij tu'n t-spic'bante k'ijl, atzun juntl ch'in k'ol spic'un tu'n t-spic'bante konic'an. Ax icx tbincha ke che'w. 17E oc tk'o'n Dios twitz cya'j tu'n cyk'onte spic'un twitz tx'otx' 18k'ijl ex konic'an, ex tu'n tel cypa'n spic'un ti'j klolj. O til Dios ba'n e'la jlu. 19Extzun juntl k'ij tuc'ix juntl konic'an; ex atzun tcyajin k'ij jlu.
20Tmatl Dios: E cypok'l nim cyajlal txcup tu'n cyyucch tuj a', ex e cypok'l chyu'j ex txkantl jil tu'n cylipan twitz cya'j.
21Tbinchatzun Dios ke nmak txcup tuj mar ex cycyakil ke jil nim cyajlal in che yucch tuj, akeju ax e pok'l tuj mar, teyle te junjun tiyjil, ax icx ke chyu'j ex ke txkantl txcup in che lipan twitz cya'j, teyle te junjun tiyjil. O til Dios ba'n e'la jlu. 22E cubtzun tcy'iwla'n ex tma cyja': Che pok'lxe, chmet-x cybaje ex cynojsame mar; ex e tchmet cybaj chyu'j twitz tx'otx' ex txkantl jil in che lipan twitz cya'j, chi Dios. 23Extzun juntl k'ij tuc'ix juntl konic'an; ex atzun tjwe'yin k'ij jlu.
24Tmatl Dios: E cypok'l alumaj twitz tx'otx', teyle te junjun tiyjil, ex txcup in xi cyjaku'n cyc'u'j twitz tx'otx', ex txkantl txcup ate' twitz tx'otx', teyle te junjun tiyjil.
Ictzun tten o bant. 25Tbincha Dios ke txcup twitz tx'otx', teyle te junjun tiyjil, ke alumaj, teyle te junjun tiyjil, ex cycyakil txcup in xi cyjaku'n cyc'u'j twitz tx'otx', teyle te junjun tiyjil. O til Dios ba'n e'la jlu.
26Tmatl Dios: Kbinchan cub xjal ic tza'nx ke kilbilal, ic tza'nx ke ko que'yin, ex e tten tcawbil cyibaj cyiẍ tuj mar, cyibaj chyu'j ex txkantl jil in che lipan twitz cya'j, cyibaj alumaj, tibaj tcyakil twitz tx'otx', ex cyibaj txcup in xi cyjaku'n cyc'u'j twitz tx'otx'.
27Cubtzun tbincha'n Dios xjal ic tza'nx te tilbilal, ic tza'nx tilbilal Dios cub tbincha'n; xinak ex xu'j e cub tbincha'n.
28E cubtzun tcy'iwla'n ex xi tma'n cye cyja': Che c'wa'line, chmet-x cybaje, cynojsame twitz tx'otx' ex che cawine tibaj. Cbel ten cycawbile cyibaj cyiẍ tuj mar, cyibaj chyu'j ex txkantl jil in che lipan twitz cya'j, ex cyibaj cycyakil txcup ate' twitz tx'otx'.
29Tmatltzun Dios cye cyja': Ma txi nk'o'ne cyeye tcyakil awal in tk'o'n tiyjil, aju tcub tuj tcyakil twitz tx'otx', ex tcyakil tze' in tk'o'n twitz ex at tiyjil tuj. Atzun cxe'l cynic'be'ne. 30Atzun cye cycyakil txcup ate' twitz tx'otx', cyuc'ix ke chyu'j ex txkantl jil in che lipan twitz cya'j, cyuc'ix keju in xi cyjaku'n cyc'u'j twitz tx'otx', cycyakil keju itz' ke, cha'x c'ul c'oquel te cywa, chi Dios.
Ictzun tten o bant. 31O til Dios tcyakilju otok bant tu'n, tbanilxix tcyakil. Extzun juntl k'ij tuc'ix juntl konic'an; ex atzun tkakin k'ij jlu.
Sélection en cours:
Génesis 1: MAMH
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Mam del Norte © Sociedades Bíblicas Unidas 1993
