Medheteththa Maxaafa 11
11
Baabiloone Gimbe
1Biitta bollan diza asi wuri koyro issi doonanne issi qaala haasayees. 2Asay arshey mokkiza bagga simmidi bishe Sana7oore geetettiza biittan issi dembaso demmidi heen uttides.
3Istti issoy issaa, «Haa yiite; xuube medhdhidi ane taman xuuggoos» giidi istta shuchcha gishshas xuube, urqqa gishshas shida 4ekkidi, «Haa yiite! Nu sunth xeygisanaassinne qasse nuni ha biitta ubbaa bollan laalettontta mala issi gita katamanne xeeray pude salo gakkiza issi gimbe ane keexxoos» gida.
5Gido attiin GODAY asay keexxida gita katamazanne gimbeza beyanaas duge wodhdhidi, 6«Hekko istti issi asa! Qasse istti wurikka issi qaalan haasayeettes; istti ha7i hayssa ooso oykkidaappe guye, istti baas ooththanaas qoppidayssa istta digganay deenna. 7Haa yiite! Ane nu duge wodhdhidi istti issoy issaa qaala erontta mala istta qaala walakkoos» gides. 8Hessa gishshas GODAY istta hessafe biitta ubbaa bollan laalliin istti he gita katama ooththizayssa aggaagida. 9GODAY biitta asaa qaalaa heen walakkida gishshas he katamaya Baabile#11:9 Baabile: Baabile guussi Ibraaweta qaalara birsheththi baynda haasaya. geetettadus. GODAY istta hessafe biitta ubbaa bollan laallides.
Seeme Zereth
(1Taari 1:24-27)
10Seeme zereththi hayssafe kaallidi xaafettidayssa; dhayssa haaththi simmiin nam7u layththafe guye Seemes layththay 100 gidiin Seemey Arfaakiside yelides. 11Seemey Arfaakiside yelidaappe guye 500 layth de7ides; hara attuma naytakka macca naytakka yelides.
12Arfaakisidey 35#11:12 35 gizayssa Ibraaweta maxaafan laappun tammu eranchchati 135 geettes. layth de7idi Sheelahe yelides; 13Arfaakisidey Sheelahe yelidaappe guye 403 layth de7ides; hara attuma naytanne macca naytakka yelides.
14Sheelahey 30#11:14 30 gizayssa Ibraaweta maxaafan laappun tammu eranchchati 130 geettes. layth de7idi Eboore yelides; 15Sheelahey Eboore yelidaappe guye 403 layth de7ides; hara attuma naytanne macca nayta yelides.
16Eboorey heedzdzu tammanne oyddu#11:16 heedzdzu tammanne oyddu gizayssa Ibraaweta maxaafan laappun tammu eranchchati 134 geettes. layth de7idi Peeleege yelides; 17Eboorey Peeleege yelidaappe guye 430 layth de7ides; hara attuma naytanne macca nayta yelides.
18Peeleegey 30 layth de7idi Era7e yelides; 19Peeleegey Era7e yelidaappe guye 209 layth de7ides; hara attuma naytanne macca nayta yelides.
20Era7ey 32 layth de7idi Saruge yelides; 21Era7ey Saruge yelidaappe guye 207 layth de7ides; hara attuma naytanne macca nayta yelides.
22Sarugey 30 layth de7idi Naakoore yelides; 23Sarugey Naakoore yelidaappe guye 200 layth de7ides; hara attuma naytanne macca nayta yelides.
24Naakoorey 29#11:24 29 gizayssa Ibraaweta maxaafan laappun tammu eranchchati 109 geettes. layth de7idi Taara yelides. 25Naakoorey Taara yelidaappe guye 119 layth de7ides; hara attuma naytanne macca nayta yelides.
26Taaray 70 layth de7idi Abraame, Naakoorenne Haaraane yelides.
Taara Zereth
27Taara yeletay hayssafe kaallidi xaafettidayssa; Taaray Abraame, Naakoorenne Haaraane yeliin Haaraaney Looxe yelides. 28Haaraaney ba aaway Taaray paxa dishin ba yelettida Kaladaaweta biittan Uure geetettiza gita katamaan hayqqides. 29Abraameynne Naakoorey nam7ayka machchida; Abraame machchey sunththi Soora; qasse Naakoore machchey sunththi Milka; Milkay Haaraane naa; Haaraaney Milkissinne Yiskaanissi aawa. 30Sooray maynne; izis nay baawa.
31Taaray ba naa Abraame, ba naaza Haaraane naa Looxenne ba naa Abraame machcho Soora ekkidi keziin istti issife Kanaane biitta baanaas Uure geetettiza Kaladaaweta katamappe dendida; gido attiin istti Kaaraane geetettiza katama gakkanaas biidi heen de7ida. 32Taaray 205 layth de7idi Kaaraanen hayqqides.
Sélection en cours:
Medheteththa Maxaafa 11: GM
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
The Word for the World International
