Matiyu 3
3
Fwa mo Ehwya a Yohana ya Batisǝma è jan anga
(Marku 1:1-8; Luka 3:1-18; Yohana 1:19-28)
1Adi be tsǝnò hon, Yohana ya Batisǝma è ken a ehwen chá efa mo Yahudiya, nè no du edgon anga a zǝn. 2Gè no jan be nobǝ anga jan, “Nye e twa etwa mo be ebgen mo nye, adia zǝnotì mo Ehwya bwa tén ara.” 3Ena a ende a efojan Eshaya è jan fwa a chu ye jan,
“Be nobǝ fo aken mo ende akan jan fwa mo
Ehwya anga a ehwen,
‘Bwese efǝ nyi Etsodwe hon,
bwe ywa be efǝku mbwe hon ju, nyi ye.’ ”
4Yohana è tsàn bwi ju ye anga ngge mokàn a bè bwe ngge fǝfǝ mo rakumi, nè tè bwi kanda a bè bwe ngge kpumo ángá a chin mbwe. Mode mbwe a gè de anga è no be embǝgwa ngge ngǝ̀ mo ju. 5Be nobǝ è vǝ chá Urishelima ngge binbin mo Yahudiya ngge binbin mo be efa mo Kǝn a Joda, nè no bwa anga a zǝn ye. 6Bè no janvǝ mo be anga a chu be ebgen mo be, kǝnggwa gè bwe be batisǝma a tswa Kǝn a Joda.
7Tea atan a gè di be Farisi ngge be Sadosi embo è no nyabwa a zǝn ye, evǝa ge e bwe be batisǝma ángá, gè ká be eka jan, “A nye mbǝgya mo fkonde, ende e twa nye echa jan, nye e tse e gwa engo mo Ehwya e bwa tén ara na, a ara? 8Nye e bwe be mò e tú jan nye twa ara etwa mo be ebgen mo nye ángá. 9Nye e ka nye jan nye tse a ga adi engo hon, adia nye jan, ‘Ebrayi a ate je,’ ángá ra. Adia m jan nye anga jan, Ehwya a bwe twanga a ti be ten e dwana be e no mbǝgya mo Ebrayi. 10Asuswana, be fu tsenti jwa ken no a chin mo be tumo, egwa egwa mo tumo e gwa ye ga esese ra, ba sen ye a twa a fǝ̀.
11“M bwe nye batisǝma ngge mbǝ abu echi e tú jan nye twa ara etwa mo be ebgen a nyè bwe ángá. Tea ende akan e twafǝ̀ m ángá, nyabwa chashin mam, m chà kǝn m me e fken be dgomo mo kpumo a tkyafù mbwe ra. Ga bwe nye batisǝma ngge Engǝ́ mo Ehwya ngge fǝ̀. 12Ge no ngge mò fan zǝn a kpwabu mbwe, a ge ti a fan a se etebwa mo mò ebam, evǝa ge e ngga e kwa fwenfonmo (alkama) ngge wimo. Ga wi a fǝn fwen alkama hon a nggwa a tswa eben, tea ga tkòn be wimo a tswa fǝ̀ e din a didi ye ra ángá.”
Abu Yohana è bwe Yeso batisǝma a tswa mbǝ ángá
(Marku 1:9-11; Luka 3:21-22)
13Ekǝnggwa, Yeso è gwa sǝnsen mo Galili nè ken a Kǝn a Joda evǝa Yohana e bwe ye batisǝma. 14Tea Yohana è tkyan ge e jan e ngga Yeso, gè jan, “Ma bwa a zǝn o a me evǝa we bwe m batisǝma, ano bwe a ge o bwa a zǝn m?”
15Tea Yeso è janfwe ye, “Ge e no enò asuswana, ge no esese je e bwe e kǝ̀n binbin mo be mò a Ehwya è jan ara ekpe ángá.” Kǝnggwa, Yohana è chadwa nè bwe Yeso batisǝma.
16A bè bwe fwa re Yeso batisǝma, abu gè nyavǝ́ a je mo mbǝ hon ángá, kè akan atan enò, gè di bè fkigwa kpe, Engǝ́ mo Ehwya, è no nyashwa chá kpe abu eba, nè shwa pe ye a ju. 17Kǝnggwa, aken è shwa chá kpe jan, “Ena a Nwen m, m dgyan ye anga, m fo etkwa mbwe anga àywá.”
Sélection en cours:
Matiyu 3: ICH
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2024 Luke Initiative for Scripture Translation
