Matiyu 11

Yeso ngge Yohana ya Batisǝma

(Luka 7:18-35)

1Chashin a Yeso è jan fwa ara be etsonchi mbwe fwa ángá, gè gwa zǝn hon nè kwa be eten eten a sǝnsen mo Galili, evǝa ge e tú mò ngge ge e du edgon mo Fwa Esese.

2Atan a Yohana ya Batisǝma, nwene è no a àtá ehwyatu ángá, è fo etkyen mo be mò a Kristi è no bwe anga, gè tson be ye è ba ye anga, be e ken e ká Yeso eka jan, 3“A bo wa nwene a bè jan nyabwa nè, eno e ra je e ka shwa a chu nobǝ efki?”

4Yeso è janfwe be, “Nye twabǝ ken jan Yohana mò a nye fo anga ngge mò a nye di ángá: 5Be ya fǝzǝn ebwibwi di zǝn, be ya e mbe anga embem kenkèn, be ya modwa-ehwyá ben ematswam. Be ya ekeketon fo fwa, be fǝ́zǝ be engǝfǝ bwa angǝ ngge be du be ya ekan edgon mo Fwa Esese anga. 6Esese a ḿ mo ende e chà vǝ́ ye eshin adi ekan engǝm a chu m ra ángá.”

7Abu be ye è ba Yohana ya Batisǝma, è twabǝ nya anga ángá, Yeso è kwa ara be nobǝ embo ya éè ngàhwya ye no ángá, fwa ejanm a chu Yohana jan, “Mò a nyè ken a tswavǝ́n, evǝa nye e di ángá, a ano? A gwakan akan a fyo tsǝ ken enò ken enó anga? 8Ano ge fwa ye enò ra, mò hon a nyè vǝ́ a je ken di ángá, a ano? Nyè vǝ́ di ndedon akan è tsàn ju ye no adi mokàn esese ángá? É yé, be ya e tsàn mokàn esese, no anga a tswa be tem̀ mo tì. 9Kǝnggwa, mò a nyè vǝ́ di a je ángá a ano? A efojan? Ee, m jan nye, ge twafǝ̀ efojan. 10Ena a nobǝ hon a bè bá mò a chu ye jan,

“ ‘Di, ma tson etsonchi

mam a kwafya mbo,

nwene a bwe a

se o efǝ ángá.’ ”

11M jan nye ebi anga, a tswa engga mo be ya be ndegwa mbwa a be ángá, be chà ben didi be ende akan e twafǝ̀ Yohana ya Batisǝma ángá ra, tea ende e nyi ti ara nwofyan a tswa zǝnotì mo Ehwya, twafǝ̀ ye. 12Tke adi ekpengga mo Yohana ya Batisǝma ti bwa anga na, be nobǝ no butsǝ anga ngge zǝnotì mo Ehwya, ngge be ya etkekàn no chifǝ anga be e fkwa e cha nó. 13Adia binbin mo be fwa mo be efojan ngge be moebam mo Mosa hon, è jan ara fwa a chu zǝnotì mo Ehwya ena, sangǝ́ Yohana ya Batisǝma è chà bwa. 14Ano nye dgyan anga nye e chadwa, Yohana a Eliya hon nwene a bè jan ga bwa ángá. 15Ende e no ngge tón mo fwa efom, ge e fo fwa mam.

16“Tea, a ngge ano a ma mbwà adi be nobǝ mo ekpengga ena? Be no abu mbǝgya e chudwa a tswa be afyan, ne no fǝ́ so dwa anga, jan,

17“ ‘Je to nye bga ge,

tea nye ge nye ge ra,

je twa nye bón fǝ,

nye kǝn nye dwafǝ ra.’

18“Yohana è bwa, gè de ye mode nè ngǝ ye mbǝ enabi ra, bè jan, ‘Ge no ngge engǝ́ esera.’ 19Nwen Nobǝ hon bwa, ge de n ngǝ, be jan, ‘Di ye, ga ya de, ya mbǝ engǝfǝ́m ngge ya emmeken mo be ya tse-eten echam tangge be ya ebgen efki.’ Tea be di enggaton mo Ehwya anga a chu be mò esese a be nobǝ mbwe bwe anga.”

Mò a bwe ngge be ya eten ya è twa be etwa ra ángá

(Luka 10:13-15)

20Kǝnggwa Yeso è kwa ara be ya eten a gè bwe be moeditanm embo a engga mo be ángá, etkya etkyam, adia bè twa be etwa ra ángá. 21“Ebwe no a chu mo nye, ya Korazon. Ebwe no a chu mo nye, ya Betseda. Adia, be è jan, be moeditanm echa a bè bwe a tswa engga mo nye ángá, be è ma bwe be a tswa be eten efifi a Taya ngge Sidon, be nobǝ hon àa twa ara etwa mo be ebgen mo be ekpe ekpe enó. Bà a nggwa ara esa mokàn ngge ton a ju be, nwone àa tú jan be gwa ara be ebgen mo be. 22Ebi m jan nye anga, nò a Ehwya a kpèn be nobǝ kǝ́n ángá, ga dwafǝ mo be ya eten efifi a Taya ngge Sidon a tkyan a chu nye. 23Ee, èé ngge nye ya a Kapanahum, ba kpu nye a vǝ́ a kpe? É yé, ba kpu nye a nggwa a shi a sen-ehwa. Adia be è jan be moeditanm a bè bwe a tswa mo nye ángá, be è ma bwe be a Sodoma, be ya a Sodoma a chà a no angǝ ti bwa a ngga nòmo. 24Tea m jan nye, nò a Ehwya a kpèn be nobǝ kǝ́n ángá, ga dwafǝ mo be ya a Sodoma a tkyan a chu nye.”

Yeso bo be nobǝ anga be e bwa a zǝn ye

(Luka 10:21-22)

25Atan enò, Yeso è bgó ebgo jan, “M tan o Àtà, a bo nwene e no Etsodwe mo kpe ngge zǝnchaje ángá, adia o kpu be mò ena kpu ngǝ̀ton ara a zǝn be ya e ka jan ba be ya enggaton, n ká ara mò ángá, o fkigwa ye tú ara be ya e chà ká be mò ra ángá. 26Ee, Àtà, ena a mò a ò fo etkwa we bwe ángá.

27“Àtà m kpu be mò binbin du ara m a bu. Ende e yi Nwen hon ángá fwa ye ra, kpwà Àtà hon. Ende e yi Àtà hon ángá fwa ye ra, kpwà Nwen hon ngge be ya Nwen hon dgyan, ge fi Àtà hon tú be anga.

28“Nye bwa a zǝn m, binbin mo nye be ya e ngǝ ekan anga, n no a tswa nya ebgenm ángá, ma no nye nya etkem. 29Nye e tso etkon mam a chu nye, nye e kǝ́n-ekǝnkǝ́n a zǝn m, adia m no ya chu engǝm a sen, m se m fǝ́ anga ra. Adi ebwem enò, nya ben nya etkem mo nya mo nye. 30Adia mò a m jan nye e bwe m ángá, fwa ye ebwedwadwa ra. Ngge mò a m jan nye e tso ángá, dgwa ye ra.”

Sélection en cours:

Matiyu 11: ICH

Surbrillance

Copier