Luka 20

Bè ká Yeso eka a chu mo emwentì mbwe

(Matiyu 21:23-27; Marku 11:27-33)

1Nò kè akan, Yeso è no tú be nobǝ mò anga a chuukwa mo Àtá mo Ehwya, nè jan be Fwa Esese a chu Ehwya anga, be Ekǝ́n echa ngge be etumo mo edon, tangge be atkwen nobǝ è bwa a zǝn ye. 2Bè ká ye eka jan, “Jan je adi emwentì ani a o bwe be mò nwone a o bwe anga? Ende e no o emwentì ena ángá, a ara?”

3Gè jan be, “Me e ká nye eka èé me. Nye jan m, 4emwentì a Yohana è ti bwe batisǝma anga, è shwa a zǝn Ehwya nè, gè vǝ a zǝn nobǝ bwa?”

5Bè pa pyoro e sojube jan, “Ano je jan, ‘Gè vǝ a zǝn Ehwya shwa.’ Ga ká je eka jan, ‘Ano bwe a ge, nyè tsǝ́ nye ekǝ̀n a chu ye ra?’ 6Tea, ano je jan, ‘Gè vǝ a zǝn nobǝ bwa.’ Binbin be nobǝ a twa je ten, adia be chadwa a tsuruku mo be jan ne, Yohana è no efojan mo Ehwya.”

7Enona, bè janfwe ye jan, “Je yi je zǝn a gè ben emwentì hon ángá ra.”

8Yeso è jan, “A me gaten ma jan m nye adi emwentì ani, m ti bwe be mò ena anga ra.”

Hufwa a chu be yawa ewakpwam

(Matiyu 21:33-46; Marku 12:1-12)

9Yeso è tso be hufwa jan, “Ende akan è shin be tu enabi a wá mbwe, nè ti wá hon du be yawa ewakpwam a bu, nè nya echan ken a eten efki ken no dgyenfon a zǝn. 10Adi ekpengga mo ga enabi hon ebgam è bwe ara ángá, yagwamo kpèn hon è tson nwen mochi mbwe akan ken a zǝn be yawa ewakpwam hon, evǝa ge e cha be ga enabi hon e no ḿ mbwe ángá. Tea be yawa ewakpwam hon è bu ye mò, nè du ye twabǝ nya bu kukwa. 11Gè tson nwen mochi efki ken. A ge gaten bè bu ye, nè no ye ebgenju, nè nyon ye nya bu kukwa. 12Enona, gè tson nwen mochi adi e ta. Bè dì ye ju, nè ti ye twa vǝ́ a je.

13“Yagwamo kpèn hon è bi chu ye jan, ‘Asuswana ma bwe engǝ? Ma tson nwen edgyan mam akan tete, ehwyà ba no ye egǝ̀n.’

14“Tea abu be yawa ewakpwam hon è di nwen hon ángá, bè jan e sojube. ‘M̀hǝ̀m, ena a edefǝ́n hon. Je e gu ye, abu mofǝ́n hon a nga ḿ mo je.’ 15Enona, bè nyon ye vǝ́ a je mo kpèn hon, nè gu ye.

“Ekǝnggwa, mò a nye ka anga, yagwamo kpèn hon a bwe be ya ewakpwam ángá, a ano? 16Ge bwa a gu be yawa ewakpwam hon, na twanga a ti kpèn hon a du be nobǝ efki a bu.”

Atan a be nobǝ hon è fo fwa a Yeso è jan ángá, bè jan, “Tse-etsem, mò ena ge e bwe ye ra.”

17Yeso è diseshi be nè bi jan, “Ano nye cha nye dwa ra, engà mo fwa ena a be bá no a tswa Afketa mo Ehwya jan,

“ ‘Ten hon a be ya àtá embwem è segwa ángá,

bwa nga ara ten e fu

àtá hon no ángá,’

a ano?

18Egwa egwa e kpo twa a chu mo ten hon, ten hon bwi a shan ye. Tea ano ten hon twa a chu nobǝ akan, ga fya ende hon a no enono.” 19Be etumo mo edon ngge be Ekǝ́n echa è nda efwa evǝa be e fu ye kè akan, adia bè yi jan ne Yeso è tso hufwa hon anga a chu be. Tea bè tsen etsentsen mo be nobǝ anga.

Nye e kpwa tse-eten e no Kaisa

(Matiyu 22:15-22; Marku 12:13-17)

20No enona, bè no ngà ye anga, nè tson be engǝ̀di, ya è tú chu be abu ba be no nobǝ ebi ángá ken a zǝn Yeso. Bè ka anga jan ne, ba fu ye ngge fwa a gè jan anga, evǝa be e ti ye ti e du a bu mo echakpo ngge emwentì mo gomna. 21Be engǝ̀di hon è ká Yeso eka jan, “Etumo, je yi jan, fwa a o jan ngge mò a o tú anga no eshwen. O cha ebgan sǝ́ mbo nobǝ ra, tea o tú mò a Ehwya dgyan anga adi ebi. 22Asuswana we jan je, ge se a je e kpwa tse-eten e no Kaisa nè, je kpwa je ra?”

23Adia Yeso è yi ara mò a bè ka anga, gè jan be, 24“Nye tú m fwentse dinari. A engǝ́ ngge ti mo ara no a ju mo nó a ge?”

Bè janfwe ye, “Ḿ mo Kaisa.” 25Yeso è jan be, “Enona, nye ti mò e no ḿ mo Kaisa ti e no Kaisa, mò e no ḿ mo Ehwya ti no Ehwya.” 26Enona, bè fu ti be ye a chu fwa a gè jan a chafya mo be nobǝ ángá ra. Fwa hon a gè jan ángá è kǝn be nya, bè jan ti be fwa efki efwe ra.

Eka ekam a chu ezǝbwam angǝ ngge zǝno ben

(Matiyu 22:23-33; Marku 12:18-27)

27Be Sadosi, be etso mo be nobǝ ya è cha be dwa jan be ya e fǝ ara, a nyi be etkyen ra ángá, è bwa a zǝn Yeso. 28Bè ká ye eka jan, “Etumo, Mosa è bá no je jan ne, ano nobǝ fǝgwa ara gwa ye, n mbwa ye nwen ngge nó ra, ge no ara kenm a nwenjin ye a defǝ́n mo ndegwa hon, evǝa be e mbwa be mbǝgya adi ti mo nwenjin ye hon. 29Be ndedon chwen a fà è no nwenjwa so, è no di ara. Ekwafya mo be è fǝ́ ndegwa, nè fǝgwa nó, bè mbwa be nwen eso ra. 30Adi e fà è ti ndegwa hon, nè fǝgwa nó, bè ben be nwen ra gaten. 31Nobǝ adi e ta è fǝ́ ye èé ge. Mò hon e ken tén enò ti ken adi e chwen a fà mo be, è ben ye nwen ra. Tú anga, binbin mo be, bè fǝ́ ye, nè mbwa be mbǝgya ngge ge ra. 32Ekǝn-etkyen mo nó ndegwa hon fǝ èé ge. 33We jan je, nò a be ya e fǝ ara a nyi etkyen ángá, ndegwa hon a no gwa ara a engga mo be, abu egwa egwa mo be è fǝ́ di ara ye na?”

34Yeso è jan be jan, “Be nobǝ mo zǝnchaje ena tè ben anga, n du don anga. 35Tea be ya Ehwya no ara be zǝn enom a kpe ángá ngge ya a nyi etkyen angǝ ángá, a fǝ́ be ndegwa ra, na du be don ra. 36Ba fǝ be efwe ra, adia be no abu be maleka. Ba mbǝgya mo Ehwya, adia ba mbǝgya ya è nyi etkyen a dì ángá. 37A chu mo be ya e fǝ ara, na nyi etkyen ángá, Mosa è tú jan be ya e fǝ ara zǝ a bwa angǝ. Adia adi fwa mo fǝ̀ è de fǝtu a tswavǝ́n ángá, gè fǝ́ Etsodwe hon jan, ‘Ehwya mo Ebrayi, Ehwya mo Eshaku, ngge Ehwya mo Yakubu.’ 38Ge fwa ye Ehwya mo be engǝfǝ ra, ga ḿ mo ya e no angǝ ángá, adia a zǝn ye, binbin mo be no angǝ.”

39Be etumo mo edon ya ehwyà è jan ye jan, “Etumo, o jan yi ara fwa.” 40Kǝnggwa, ende akan è ká ti ye ye eka efki efwe ra.

Kristi hon a nwen ara?

(Matiyu 22:41-46; Marku 12:35-37)

41Ekǝnggwa, Yeso è ká be eka, “Ano bwe a ge be nobǝ no jan anga jan, Kristi a Nwen mo Dawuda? 42Adia Dawuda e chu ye è bá nó no adi Afketa mo Zabura jan,

“ ‘Etsodwe hon jan ngge Etsodwe mam,

“Chu bwa chá budgo mam,

43ken a ngga atan a ma bwe be ya eze mbo

a nga mò tu fu mbo ángá.” ’

44Ano Tì Dawuda è fǝ́ ye ‘Etsodwe,’ ano bwe a ge, ga a no nwen ye?”

Echa etwam a chu mo be etumo mo edon

(Matiyu 23:1-36; Marku 12:38-40)

45A be nobǝ binbin è no fo ye anga, Yeso è jan be ya è ba ye anga jan, 46“Nye e bgeshi fǝzǝn adi be etumo mo edon. Be nda be e tku e ken anga ngge be mokàn echuvǝ, n dgyan be e bi be fwa adi egǝ̀n a afyan jwa, ngge be e chu adi zǝn echum esese a àtá chuefǝnm ngge be e chu a chu bò mo nobǝ echa a zǝn esǝ. 47Be bwede be gwafǝ́n n fkwacha be atkimo mo be. Be tú chu anga adi ebgo ebgonbgon ebgom evǝa be tú jan be kǝn ara. Be ya ena a ngǝ ti ara ekan àywá a bu mo Ehwya.”

Sélection en cours:

Luka 20: ICH

Surbrillance

Copier