APOEM AYANG: 6
6
Xangsu: Byu da" Akhyeing" Khyoo:
1 #
Yob 1:6; 2:1. Xangsu: byu yigi moug: gyab goin" moo nyid je: nyid byeung" lo" lho: myiyi: zoo: yiri khu: myhu: nyid boem ri 2Mougkhung: mougdi nu" yi dayham" gi myiyi: nu" yi yung" ziri myang yoomo yu" ngei yug ri yhoem: seing: myhi' khyo" khyen: yu boem ago". 3Houg: lang" Aseing gi «Ngoo gi byu yiri apyaid atoo: adei nyid nhang: loo: wa nyangnu" gi shid: wa byumyu" nghoid. Akhid" mo nyangnu" gi apyaid 120 zain tho' moo yo" dei jain" loo: wa anghoid» ga: tid. 4#Gys 13:33. Hau: pyaid moo we' hau: thang: moo we' xangsu: myiyi: yi yo' mougkhung: mougdi nu" yi mo nyid re" da" byugyi: byumyhang: yi mougmyid tho' moo nyid khare". Nyangnu" gi yoem: vhoo" gye" bo lho: goonham' mo myeing fu" mo, nghoid boem ago".
5 #
Mat 24:37; Luk 17:26; 1 Pe 3:20. Mougmyid tho' mo byu yugkhang" moo" gi khanham we' gye" akhyeing" da" ziyo' gye" ashoeb da" nyangnu" myid soin: khyoo: ri Aseing myang uri 6Nyang: gi nyangnu" ri phain" so: to" lho: he: mougmyid tho' moo nyhid: to" ziri nheig koug nyid bye:. Nyang: gi nung myid yo" ziyo' 7Nyang: gi «Ngoo phain" so: to" da" he: da" byu yiri ngoo shoem" shoung: pyam loo wa. Houg: lho: gougnyhoug joem yo' ngho' joem ri we' shoem" shoung: pyam wa. Khasu" wim gari nyangnu" ri ngoo phain" so: to" zi gye" nheig koug bye:» ga: tid. 8Nghoid loug we' Noa gi Aseing da" nheig dab su: nghoid nyid.
Noa
9-10 #
2 Pe 2:5. He: zigi Noa da" mhoomyid: nghoid. Nyang: gi Shem- Ham yo' Yaphed ein: da" yuggi zoo: soem" yug yo". Noa gi shoid vhang: khyoo: ajo, wigi nya: pyaid moo nyang: kyeing" za: byugi nghoid. Nyang: gi Mangsoo yo' tab did" nyid. 11Nghoid loug gootu: dangain" mo, gi Mangso shidkhoin" moo ashoeb mo, za: nghoid lho: pyi: joem: sho: moo" gi moug: gyab goin" byeung" jo, bye:. 12Mangsoo gi moug: gyab khyoo: yu" kaid lho: myang zigi byu yigi ashoeb khyo" za: nyid nyid boem yoomo akhyeing" ashoeb khyoo: ri za: yu" myang kaid.
13Mangsoo gi Noa ri «Ngoo gi xangsu: byu yi dangain" ri thang loo" nhang: wa myid phyed too" bye:. Ngoo gi nyangnu" ri jhoid phyo' shoin' pyam loo wa. Khasu" wim gari moug: gyab goin" gi nyangnu" da" pyi: joem: sho: moo" za: byeung" jo, bye:. 14Seig thi" gi yo' gyid lhid moo" zeing daloem: nanya: shid re" zhug we'. Hau: akhoug: moo ayab yab koid to" lho: athi" atho' dangain" moo seig gyid, joid too" we'. 15Hau: ziri sheing: khyoo: 450 pe:- lam khyoo: 75 pe:- myhang: khyoo: 45 pe: koid we'. 16Gyid Lhid moo" zeing moo moug: gau: we' koid nghoeb lho: voozoo, thang: gi pyiyam mo nghi: khyoo: 18 lo, shi" zi ca". Gain: jang" soem" zhang kaid wigi hkoem" daduang: phang we'. 17Dei moodei nyid moonyid ri phyo' shoin' pyam wa shid re" mougmyid tho' khyoo: ngoo gi tagyid shi' nhang: wa nghoid bye:. Mougmyid tho' moo nyid moonyid gi shid: byug wa nghoid. 18Nghoid loug ngoo gi nang yo' dang: thang" cab too" wa. Nang yo' re" yhoem: seing: myhi'- re" zoo: yi yo' re" du moo" yigi gyid lhid moo" zeing khau: khyoo: vang ge'. 19-20Nang yo' dage" gyid lhid moo" zeing khoug: khyoo: gougnyhoug acang: joeb, yo' ngho' zoo: yen" zoo: cang: joeb ri amyhi' yo' aphoo' dazoem" zoem" koid lho: kangso' loid byoin wa shid re" fang yu ge'. 21Nanu" shid re" we' gougnyhoug joem shid re" we' zoo: shug cang: joeb kaid too" ge'» ga: tid. 22#Heb 11:7. Noa gi Mangsoo tid ziyo' dakhyoo" ti" dangain" ri koid bye:.
Sélection en cours:
APOEM AYANG: 6: LCL
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Lacid Bible © Bible Society of Myanmar, 2009.
