APOEM AYANG: 2
2
1Houg: khyo" wigi mougkhung: myidjang yo' jo, moojo, dangain" ri bain phain" so: too" bye:. 2#Thu 20:11. #Heb 4:4,10. Nyhed nyid" ein: wa da" bidnyid moo: Mangsoo gi zei: lo moo" dangain" bain zei: lho: moo" zoo" no: pyam bye:. 3Hau: bidnyid gi nya: phain" so: moo" bain lho: moo" zoo" no: pyam da" bidnyid nghoid yoomo nyang: gi nyhed nyid" ein: wa da" nyid" ri mainkaid byid: lho: gooki' lid da" bidnyid danyid" khyo" to" too" bye:. 4He: zigi mougkhung: myidjang ri khasu" phain" so: to" da" khyoo: nghoid.
Eden Khyam:
Aseing Mangsoo gi mougkhung: myidjang ri phain" so: uri 5Mougmyid tho' moo mhain" we' ayug shi" ziyo' amyoug: ashi" we' anyug abain toid shi"- khasu" wim ga: ri nyang: gi moug: avoo nhang: shi" ziyo' hau: ziri yu" coung: wa byu we' anyid. 6Nghoid loug we' gyid gi myid thi" mo thu lo wigi myidjang ri deig jhu' nhang: loo bye:.
7 #
1 Ko 15:45. Hau: thang: Aseing Mangsoo gi myidjang mo myidzhoo" dajhi' ri yu lho: hau: ziyo' byu dayug alhoo: koid- nyang: gi hau: yug da" nhoo: khyung: moo kangso' ri moid kaid byid: wigi hau: byu gi kang: dei loo bye:.
8Hau: thang: Aseing Mangsoo gi bidthu shoid Eden moo khyam: daloem: ri koid to" lho: houg: mo nyang: phain" so: to" da" byu ri nyhid: too" bye:. 9#Psh 2:7; 22:2,14. Nyang: gi yu" yung" tung" da" seiggam joem aja: ja: dangain" ri houg: mo yug ri" nhang: lho: ge da" seigshi" vooshi" ri zei: nhang:. Khyam: da" agung moo kangso' shigam yo' ge ziyo' age ziri se' kho nhang: da" lasi laleug shigam yug jo,.
10Gyid dalang gi Eden moo yau lho: khyam: ri jhu' nhang:. Eden khyam: mo lid lang" hau: gyid lang gi gyid lang myid: lang bui" khari" bye:. 11Xang: shi" da" gyid lang ri Pishun- Hau: gyid lang gi Havila mungdain: mo lheing khoem yau nyid. ( 12Houg: moo sheing: gyeing" thu lho: yoo" yau: da" nam pyo: ja: yo' phoug" dab da" lug joem thu jang: nghoid.) 13Eig lang ein: wa da" gyid lang gi Gihon nghoid lho: Khusha mungdain: goem: sho' yau nyid. 14Soem" lang ein: wa da" gyid lang gi Tigri nghoid lho: Asuri da" bidthu shoid moo yau nyid wigi myid: lang ein: wa da" gyid lang gi Uphrad lang nghoid da:.
15Houg: lang" Aseing Mangsoo gi Eden khyam: ri yu" coung: lho: lhoug zung" wa shid re" houg: mo xangsu: yuggi ri nyhid: too" bye:. 16Mangsoo gi nyang: ri «Nang gi khyam: khoug: mo kha: gam mo shi" ri we' phyo' zoo: we' 17ge ziyo' age ziri se' kho' da" lasi laleug shigam mo ashi" ri za: azoo:. Nang gi hau: agam mo ashi" ri age zoo: wa. Nang zo: nghoid rigi hau: nyid" moo shid: loo" wa nghoid» ga: tid.
18Hau: thang: Aseing Mangsoo gi «yuggi gi nyang: dayug kyeing" za: nyid nyid wa agi. Nyang: ri pang" thoug wa shid re" du nyeing" da" byencang" dayug ri ngoo phain" so: wa» ga: tid. 19Houg: yoomo Mangsoo gi myidjang mo gougnyhoug joem dangain" yo' ngho' joem dangain" ri phain" so: too" bye:. Nyang: gi houg: bang: ri myeing myheing nhang: wa shid re" hau: byu jhang khyoo: shu" lo" lho: nyangnu" dangain" bang: ri" myeing lhoem: myheing byid: bye:. 20Xangsu: yuggi gi ngho' joem dangain" yo' gougnyhoug joem dangain" ri myeing myheing byid: bye:. Nghoid loug hau: bang: mo kha: ja: we' nyang: ri pang" thoug wa byencang" gi abui" shi". 21Hau: thang: Aseing Mangsoo gi yuggi ri yhoeb moo" myi" nhang: lho: yhoeb nyid uri nam cam" youg: dakhaid ri she: yu wigi houg: moo: shoo" pyeing bye:. 22Namcam" shooyoug: mo myiyi: dayug ri phain" so: lho: nya: jhang khyoo: shu" yhi: byid: bye:. 23Houg: lang" xangsu: yuggi
«Akhid"- he: zigi nga" shooyoug: mo shooyoug:-
nga" shoo" mo shoo" nyang: nghoid bye:.
Nya: myeing gi myiyi: nghoid- khasu" wim ga: ri nyang: gi yuggi mo she: thu too" su: nghoid» ga: tid.
24 #
Mat 19:5; Mar 10:7,8; 1 Ko 6:16; Eph 5:31. He: da" zigi ce: gang mo yuggi zoo: gi nya: phoo yo' nya: myhi' ri too" kho' wigi nya: yhoem: seing: myhi' yo' dage" nyid lho: nya: tang: gi dagung dashoo" za: bue" lo khyoo: nghoid.
25Hau: yuggi yo' myiyi: gi eig yug goin" shoocen: doem: nghoid nyid boem ago"- nghoid loug we' gyoug sho' khyoo: ci: ajo.
Sélection en cours:
APOEM AYANG: 2: LCL
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Lacid Bible © Bible Society of Myanmar, 2009.
