Matthew 8
8
Kekama elavea kemahana ke{leprosi}
(Mrk 1.40-45; Luk 5.12-16)
1Kulana Jesus nihaele iho ilalo kemouna la, naonohenua elahi la eo nokaꞌa lakou. 2Kena hekama elavea kemahana {leprosi} ehaele aꞌe nokoukuli imua Jesus, kena ime aꞌe, “Kealiꞌi, poi aꞌoe eaunahie, aꞌoe ukonaꞌi mai anau ikaualeꞌa.”
3Kena iko Jesus iapaꞌe kelima aia nokaohi kama la, kena ime aꞌe, “Anau eaunahie kekonaꞌi aꞌoe ikaualeꞌa.” Vahola oia, kemahana ke{leprosi} la uoki, kena kama la ukaualeꞌa. 4Kena Jesus eme aꞌe kama la, “Aꞌoe isekakala aꞌe alakama hea anau ekonaꞌi aꞌoe. Haele nohuli aꞌe kinokama aꞌoe iꞌike kemaakua la, kena uau aꞌe kehamalu aꞌoe la, poi hea Moses nikakala mai, ihuli aꞌe keonohenua la pela aꞌoe ukaualeꞌa.”
Kekama heheaꞌu kepulepule hamakua
(Luk 7.1-10)
5Kulana Jesus nihaele iloko kemakaꞌina Capernaum, kekama hamakua napulepule la ehaele nome aꞌe Jesus, 6“Kealiꞌi, kekama heheaꞌu anau la selavaa kehakikiꞌe soia, kena emoe i hale halono lihu haeꞌo.”
7Kena iko Jesus ime aꞌe kama la, “Anau mehaele aku nokonaꞌi kama na ikaualeꞌa.”
8Ia kama hamakua la eme aꞌe, “Kealiꞌi anau sekau pela aꞌoe ihamai iloko hale kehale anau. Aꞌoe imea nakakala oia, kena kama heheaꞌu anau la memaakala muli.
9“Anau ehalono nakama hamakua anau. Ia napulepule anau ehalono anau. Poi anau eme aꞌe pulepule la ihaele, kama la ehaele. Ia anau eme aꞌe kelaa pulepule ihamai, kama la ehamai. Ia poi anau eme aꞌe kama heheaꞌu la ipena kemea, kama la ehalono mai anau.”
10Keualoko Jesus nilono nakakala nei, kama la umasalo haeꞌo, kena ime aꞌe nakama kaukali aia la, “Anau eme aku kehamaoni. Kama nei ehakina hamaoni Keakua. Anau sehikama elave iloko Israel kela ehakina penei hoi. 11Anau eme aku okou, komaꞌi nakama enoho pouli kemaalama nei meio noꞌai lakou ma Abraham, Isaac, ia ma Jacob iloko kenoholana kevaelani. 12Ia Keakua meihakui nakama Israel la i keꞌina pouli ihalono lihu, kena nakama la meikani, ia meihaꞌaki naniho lakou.”
13Kena Jesus eme aꞌe kama hamakua la, “Haele i hale. Keakua mekonaꞌi kekama heheaꞌu aꞌoe la ikaualeꞌa, ehau poi aꞌoe ehakina la.” Saika la oia, kama heheaꞌu la umaakala muli.
Jesus ekonaꞌi komaꞌi nakama
(Mrk 1.29-34; Luk 4.38-41)
14Keualoko Jesus ukae kehale a Peter la, Jesus eꞌike hinaona hine Peter emoe iluna kelomoena aia la, elavea kinoꞌo. 15Kena Jesus ekaohi kelima kehine la nomaakala muli. Kena iko kehine la imasiꞌe iluna noau aꞌe naꞌai nakama la iꞌai.
16Kulana keiahi, keonohenua la eko aꞌe komaꞌi nakama eisi nakipua saꞌino. Kena Jesus ehakui nakipua la ikaha i namahi nakakala aia, ia ekonaꞌi nakama lavea la nokaualeꞌa. 17Kena nakakala Keakua nime aꞌe Isaiah nei uhamaoni,
“Kama la eko namahana kakou
Ia esau nahalono lihu kakou la ikaha.”
Nakama hihai kaukali Jesus
(Luk 9.57-62)
18Keualoko Jesus eꞌike keonohenua la emumui aꞌe aia, kama la eme aꞌe nakama kaukali aia la, “Kakou io i kelaa vahi kemoana la.” 19Kena hekama epolopolo nakuaa ehaele nome aꞌe Jesus, “Rabai, anau mekaukali aꞌoe heꞌina pehe aꞌoe mehaele.”
20Ia Jesus eme aꞌe kama la, “Alamanu emoe nalua lakou, ia namanu lelele eisi naohana lakou. Ia {kama ekipu kama} seisi keꞌina aia inoho.”
21Kena kelaa kama ekaukali Jesus eme aꞌe, “Kealiꞌi. Hakali ikanu kamana anau la imua.”
22Ia Jesus eme aꞌe kama la, “Kaukali mai anau. Nakama kela seiko keola hamaoni la ekau kekanu nakama emake.”
Jesus ehamau kemakani
(Mrk 4.35-41; Luk 8.22-25)
23Jesus ma nakama kaukali aia la uꞌae iluna kemonoui nohaele. 24Kama ualoko oia, kemonoui la ukili kemakani maili, kena napeau la uꞌae aꞌe iluna kemonoui la, ia Jesus emoe oia. 25Ia kena nakama kaukali la uo nohano aꞌe Jesus, kena ime aꞌe, “Kealiꞌi, lolosi, kakou memalemo.”
26Kena iko Jesus ime aꞌe “Aiea okou emakaꞌu naea? Okou sehakina?” Kena Jesus umasiꞌe iluna nohai aꞌe kemakani ma napeau la. Kena kemoana la umalino.
27Nakama la umasalo haeꞌo, kena ikakala solakou, “Kenei hekama pehe? Kemakani ia ma napeau la ehalono i aia.”
Jesus ehakui nakipua ikaha
(Mrk 5.1-20; Luk 8.26-39)
28Keualoko Jesus ekae keꞌina nakama Gadara i kelaa vahi kemoana la, kela sakama eisi nakipua saꞌino uo mai ikaha ma keꞌava haku la nokili Jesus. Koꞌolua la hamakaꞌu haeꞌo, ia kena sehikama elavaa kehaele keala keꞌava haku la. 29Koꞌolua la eme aꞌe Jesus, “Kama Keakua. Hea i lakonu kakou? Aꞌoe uhamai nomea maua ihalono lihu imua keualoko Keakua meihakonukonu maua?”
30Keualoko la, komaꞌi na{piki} esusuei nolave naꞌai i keꞌina emao ikaha ma nakama la. 31Kena nakipua la eainoa aꞌe Jesus, “Poi aꞌoe ehakui makou io ikaha ma koꞌolua nei, kaualeꞌa, haunalia makou ikau iloko na{piki} la.”
32Jesus eme aꞌe, “O ikaha.” Kena nakipua la uo nokau iloko na{piki} la. Kena iko na{piki} la hakoa ihulo ilalo keunuku mokuhua la nomaoha i kemoana nomalemo nomake.
33Kena nakama lolosi na{piki} la uhulo nopaa kelono koꞌolua la i nakama kemakaꞌina la. 34Kena nakama la hakoa ukaꞌa nokili Jesus. Ia keualoko keonohenua la niꞌike Jesus, nakama la hakoa eainoa aꞌe kama la ihaele ikaha ma namakaꞌina lakou la.
Sélection en cours:
Matthew 8: ojv
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 1999, Wycliffe Bible Translators, Inc. All rights reserved.
