Marko 4
4
Narryamara ono Layani Hinyomo
Mt 13:1-9; Lk 8:4-8
1Inyyak fe Yesu itteryo ittiyenio ilotifor hari. Attubanie aati daŋ arryai hul ikoloni inyi ihiji, tania ette inyi jiŋana itwa togol, ette itoŋo dia ilyaha ilotifor bwo fe laati daŋ ilyeri ilotifor hari. 2Itteryo inyi ittiyenio isi ta narryamarita arryai. Te ettiyenio honyi ikyana inyi ihwania ojo, 3Itaniŋyete, olo obo atulo yehina enyomo honyi. 4Ninya layehi inyi ette omuk enyomo fodoŋoro ikoi bwo aheny ette fwanna ikubuna isi. 5Bwo fe omuk ette fodoŋoro ihiji morwoi. Obeŋi isi onyurani aboro hun olwaji, ette isi isuruna kokwak nyo obeŋ amaji hosi ojon. 6Al onok noloŋ ette itayoho afarawa hosi daŋ nyo obeŋi nadde hosi isuri ifau. 7Ofodoŋonie omuk bwo fe ihiji hikwa ette nekwa hwa isuruna arabotye ikosi ette itabunara isi. Obeŋi isi oŋerihini. 8Okwahinie omuk jyo aboro hun oyiji’to ette isuruna, bwo fe ette buturi ette obo ŋerihina ema atomwana hunihoi bwo fe obo atomwana ille bwo obo esiha abotye. 9Ojo Yesu, Lya ol owon iko ayyaha ijara inyi hetaniŋu.
Awoyo Hiram ono Arryamarita
Mt 13:10-17; Lk 8:9-10
10Al owon Yesu hama, ofwonni laati iko leyiyanak ’tomon harrihai ifiyere inyi ta narryamara ana. 11Ojo inyi jihosi, Italeyehi Hollum jihatai nelahode ninya idimani ono olobye honyi. Ati jyo lomuk iramani jihosi nerre hwa ta narryamara. 12Tania omijye isi mijo ati obeŋi igonyuni, bwo fe itayirye isi itayiryo ati obeŋi itaniŋuni ŋadi isi iloiti atajya hosi ette eyyata hosi hohino.
Etaleyehina Yesu Narryamara ono Layani Hinyomo
Mt 13:18-23; Lk 8:11-15
13Bwo fe ifiyo inyi isi ojo, ?Ibyaŋata tai itaniŋuna narryamara ana? ?Aŋai ’tadi itaniŋuna tai omuk narryamarita hoŋ? 14Oyehi layani hinyomo nekyana Hollum. 15Nenyomo hutte koi isi laati hul itayiruni’to ette Sitan ’tuna kwak ihwania ihwania ette kwararu nekyana to tajya hosi addi. 16Nenyomo hun ofodoŋonie hutto morwoi isi laati hul itayiruni’to nekyana bwo fe iruhi ihwania ta amuno. 17Ati obeŋi nadde jihosi. Iruhi do ati al ofwonni ettigemita kuyya netahawayo ta neram Hollum ette isi ipal addi. 18Nenyomo hun ofodoŋonie ihiji hikwa isi laati hul itayiruni 19ati ihawwai isi te nerre hutto haŋitek, kuyya ottohoroi isi egigilo te ebariti hosi, kuyya adayai isi ta nerre ette nekyana Hollum bunaro jihosi. Obeŋi ati oŋiji. 20Hun okwahinie liboro hun oyiji isi laati hul itayiruni’to nekyana bwo fe omojuni isi itajya hosi ette ŋerihina aŋer hosi, atomwana hunihoi, bwo obo atomwana ille bwo obo esiha abotye.
Narryamara ono Allomo
Lk 8:16-18
21Ette inyi ifiyo isi ojo, ?Iyaŋuno atulo allomo itwa haji ette ifihana iwoyo jotit kuyya bu iwoyo gufa? ?Obeŋ adi inyi oyihak allomo? 22Onuhani laati omuk erre jo oŋida ihalu inyyahi bwahuna. Imuhoni laati erre jo oŋida ihalu inyyahi isi duhuna. 23Lya ol owon iko ayyaha ijara inyi itaniŋu. 24Bwo inyi ojo jihosi, Ihumata igigilo erre hun itaniŋuna tai. Te efahita hun iŋot iye obo atulo oŋot adi Hollum bwo fe iye agalik. 25Lya ol owon iko omuk erre ofonik adi Hollum omuk jihonyi. Lya ol obeŋ iko omuk erre iyari adi jihonyi addi dwadi hun omutari hun owoni’to jihonyi.
Narryamara ono Erre hun Obobolororoi’to
26Bwo fe Yesu ette jaran, Orrijo olobye Hollum ihwa atulo ol oyehi’to enyomo honyi ifau. 27Bwo fe ojotoro inyi ta arwe bwo omijo to noloŋ. Ette nenyomo isuruna ette bolori ati obeŋ inyi omijak aŋai isuruni isi. 28Isuruni nema to fau, ahosyere abahala, ihalu nosi, bwo ihalu ema hun aŋidari’to. 29Al odori ema iduhu inyi ademi ette dyoŋori ema.
Narryamara ono Aŋeryo Bule
Mt 13:31-32; Lk 13:18-19
30Inyyak Yesu ikyana jihosi, ?Etarrijohi adi hohoi olobye Hollum iko anyo? ?Anani narryamara an etarrijohi hohoi iko olobye Hollum? 31Orrijori inyi iko aŋeryo bule an oyehini. Omuta inyi agalik daŋ. 32Ati al oyehini ifau obolo agalik ayyanio daŋ, bwo owoni iko atanata arryai hun oremehini aheny duhori asik hosi.
Ettiyenio Yesu ta Arryamarita
Mt 13:34-35
33Ta narryamarita ihwa hunia hun olwaji iramata Yesu nettiyenita honyi jyo laati ihwa oremehini isi itaniŋuna. 34Obeŋ inyi iramak isi omuk erre arari ta arryamara hama, ati al owon inyi iko leyiyanak honyi hama itahutak inyi isi awoi hirre daŋ.
Etadwayo Yesu Asiŋit
Mt 8:23-27; Lk 8:22-25
35Oloŋ ania to otoryai, ette inyi jaran jyo leyiyanak honyi ojo, Efwo aŋati hari tole. 36Tania ette isi busaro eluluŋ wati ette iyaro atogol an itoŋori Yesu. Owoni dia atogoli bwo fe. 37Ette asiŋit on obolo bebe dyoto. Attati aari ifolyahita itwa togol ette atogol ilyaha nefut. 38Ette inyi joto al iluro itwa togol. Ette isi itahenyuna inyi ette jaran jihonyi, Hettiyanani, ?ibeŋ iye igigilo ta aye hohoi? 39Attati inyi dyoto ette ifahina oyyami hotodwahi ette jaran jyo aari, Odwai. Ette asiŋit dwa ette aari ŋettyo dee. 40Ette inyi ifiyo isi, ?Anyo ibaŋata tai? ?Hobeŋ neruk jihatai? 41Ati abaŋi isi bebe bwo fe ikikyanai ta ahwattek hosi hama ojori, ?Anyo tulo olo ol oniŋye oyyami iko aari inyi?
Sélection en cours:
Marko 4: LOT1969
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
This text was originally published by the British and Foreign Bible Society in 1969.
