Logo YouVersion
Îcone de recherche

Marko 15

15
Eyaro Yesu Ihosyere Pilato
Mt 27:1-2, 11-14; Lk 23:1-5; Yn 18:28-38
1Ninya afaŋ amotye iwwahai ehumak eleittaha iko amarwak bwo egyorok iko lewwahak daŋ, ette isi iyaru Yesu al ifita ette isyo inyi jyo hobu Pilato. 2Ifiyo Pilato inyi ojo, ?Ira iye Hobu olo Yudea? Itarraŋ Yesu ojo, Ihwa ijo iye. 3Ati ehumak eleittaha arrasatai inyi erre arryai. 4Ette Pilato ifiyo inyi, ?Ibeŋ iye itarraŋ hunia? Imijye, olwaji errositi arryai hun arrasani iye. 5Ati obeŋ bu inyi itarraŋ nobo eram, tania ette Pilato illilliha.
Aŋotonia Ye jyo Yesu
Mt 27:15-26; Lk 23:13-25; Yn 18:39—19:16
6Aŋasi daŋ to neyom eneittok ohou mandir obo el efita, ihwa awahi laati. 7Owon nya obo atulo al ifitani ibabus al anya’to Baraba. Owon nya inyi iko omuk laati hul iŋereji’to okuma bwo ottohye aati. 8Tania ofwonni eluluŋ wati jyo Pilato ifiyere inyi ihaniere ihwa toloŋi. 9Itarraŋ Pilato jihosi ojo, ?Iwahata tai ani ahohi Hobu olo Yudea? 10Nyo omijak fe Pilato iyaŋunie dwo isi Yesu ta nahaini. 11Isusuye ehumak eleittaha aati daŋ jo oŋida Pilato ohou Baraba. 12Itarraŋ Pilato jihosi ojo, ?Ehan ’tadi ni aŋai jyo Yesu al iloŋoi Hobu olo Yudea? 13Ati isi iwuwoŋitai ojori, Ijara isihoni inyi. 14Itarraŋ Pilato ojo, ?Anyo ariŋ on orroho’to an ihanio inyi? Ati isi iwuwoŋitai an agalik ojori, Isihonia inyi. 15Tania awak Pilato itilihyo eluluŋ wati ette houna Baraba jihosi ette isyo Yesu al abahi isihoniere.
Asuhotyere Oseŋer Yesu
Mt 27:27-31; Yn 19:2-3
16Attati oseŋer iyaru inyi iŋati haji ono mandir an ifurani Pratoryo, bwo fe ottubanie eluluŋ oseŋer jihonyi daŋ. 17Bwo fe ette itiyyafana inyi aboŋo en emoli bwo fe oyyiri isi egorya hikwa ette isihonia lihou honyi. 18Tania ette isi itteryo ifonyo inyi ojori, Moŋ, Hobu olo Yudea. 19Abahye isi ahou honyi ta nelluhi bwo fe omitai jihonyi ette rigoŋi jihonyi. 20Latuhi isi asuhotyere inyi, bwo isi ette houna nodwo boŋo ette itiyyafana aboŋojin honyi ette iyaru inyi isihoniere ikruce.
Esihonia Yesu
Mt 27:32-44; Lk 23:26-43; Yn 19:17-27
21Ninya ajiŋari isi orwaŋanie isi iko obo Acirenetanani al anya’to Simone ol ottu’to to mana. Inyi monye Alisandro iko Rufino. Orrosoni isi inyi hotolororo akruce an ofwoi isi isihoniere Yesu. 22Iyarai isi inyi imaji an ifurani Golgota on ojo amaji hou. 23Ette isi itamatana inyi aari ajalaŋi hun iharrwahini iko ayyani an ifurani mura, ati iha inyi amata. 24Tania isihoni isi inyi bwo fe awahi isi horyo aboŋojin honyi ette isi baha ogumar ojo ŋai adi al iyaro’to isi. 25Isihoni isi inyi saa hottoŋwan otto motye. 26Igyoroni ihide honyi nekyana ono nerrositi honyi ojo, Hobu olo Yudea. 27Isihoni bu ikonyi ahahalak arrihai, abotye etteŋet bwo fe abotye ettehorroŋ honyi. 28Tania itasiruni egyerita hun ojori, “Ihyanani inyi arabotye iko leyyak.” 29Omorye fe adahak Yesu ette huco inyi ta afyala ojori, Iye al ijo’to etattur ni aji imojit eneittok bwo fe inyyak duhonia to noŋitek hunihoi, 30itahoru bu nahwan hoi. Isuru ihwania to kruce. 31Ihwania bu ehumak eleittaha iko legyorok osuhotye inyi ta ahwattek hosi ojori, Italahu nya inyi lomuk, ittallik ati inyi italahuna nahwan honyi. 32Ihwania iye Kristo, Hobu olo Israele isuru to kruce, oŋida hohoi emijo iye bwo fe eruk. Hul isihoni ikrucehyen ikonyi imimorye inyi.
Naye ono Yesu
Mt 27:45-56; Lk 23:44-49; Yn 19:28-30
33To saa ’tomon harrihai many saa hunihoi iryok afau daŋ edumele ’tir ’tir. 34Ninya ta asaa hunihoi ette Yesu itakwat nekyana honyi bebe ojo, “Eloi, Eloi, ?lama sabacani?” on ojo, “Hollum hoŋ, Hollum hoŋ, ?nyo ibusak iye nani?” 35Itayiruni aati hul owotyai’to dia nekyana honyi ette jaran, Itaniŋyete, iloŋo inyi Elija. 36Oŋer bwo fe lobo olosi ette lutonia aboŋo litwa hari hun irwatiŋoi ette ihanana ihide osiholoti itamataniere inyi ette jaran, Idehi so, hamijyete, kuyya ottu adi Elija itahoruniere inyi. 37Inyyak fe Yesu iloŋo on okwat bebe ette ye. 38Teyya teyya ette aboŋo ono aji imojit eneittok gwasa hama aŋaco arrihai tohide many ifau. 39Eleittok oseŋer ol owotya dia irrirryari, igonyu inyi Yesu laye ette jaran, Ahode atulo olo, inyi Lonyi Hollum.
40Owoni fe dia aŋorwo hun irrirryai alamarai. Ihiji hosi owoni Maria Madalena iko Salome bwo Maria honye Yakobo ol odiha’to iko Yose. 41Ijifatye aŋorwo huna Yesu to Galilea ilwahyere inyi. Ofwonni aŋorwo omuk arryai to Yerusalem bwo fe.
Anuhana Yesu
Mt 27:57-61; Lk 23:50-56; Yn 19:38-42
42Ara akikai ono oloŋ an ihuhumyerek isi aŋiyo ono sabato. 43Ette Yosefo ’tuna to miji Arimatea. Ara inyi eleittok olo lewwahak hirre bwo fe itila inyi olobye Hollum. Ette inyi jiŋana jyo Pilato ifiyere ahwan Yesu iyari. 44Ati illilliha Pilato ta ataji honyi ojo, ?Aye Yesu ahode? Ette inyi iloŋo eleittok oseŋer ifiyere inyi kuyya aye dwo Yesu. 45Al itaniŋu inyi naye ono Yesu jyo eleittok oseŋer, aŋatak inyi Yosefo iyaro ahwan honyi. 46Tania iyauno Yosefo aboŋo on obwor ette dutuna ahwan Yesu to kruce ifau ette bubunana ta aboŋo, ette itaferehina inyi ilume an ikyafani ibak. Bwo fe ittaborok inyi namorwo on obolo ihutuk ilume. 47Bwo Maria Madalena iko Maria honye Yose omijye amaji an itaferehinierek inyi.

Sélection en cours:

Marko 15: LOT1969

Surbrillance

Partager

Copier

None

Tu souhaites voir tes moments forts enregistrés sur tous tes appareils? Inscris-toi ou connecte-toi