मात्ति 2
2
येसु तुप्से जोतिसिचि न्दायाहा
1येसुगा वाम याहुदिया लिङ्खामगा बेथ्लेहेम बाङ्ना तेनबे लेक्सामासा॥ ङ्खिङ्बेला हेरोद याहुदिया लिङ्खामगा हाङ् साया॥ येसुगा वाम लेक्साहोङ् नाम्लोनभाङ् जोतिसिचि यारुसालेमबे न्दाया॥ 2न्हाङ् ङ्खाचिङा याॽमिचि न्छिम्दुचि, “याहुदि जातिचिगा हाङ् लेक्साहोङ् वाम लेक्साना हेॽने वान्नेॽना? इजाङ्बाङ्निङ् कानिङ् उका वाम लेक्साना चेॽयागा चिङ्गो पिखुबा चोक्चोकि नाम्लोन पोटि निसुम्ङा, न्हाङ् कानिङ् उङ् सेमेसे ताइमिङ्हा॥”
3खा चेॽया खेप्सुहोङ् हाङ् हेरोद किसिता, न्हाङ् यारुसालेमबेॽहा घाक याॽमिचि चा ङ्गिसिता॥ 4न्हाङा हेरोदङा घाक खाङ्खाङ् हाङ्खुबाचि नुङ् धार्मासाप्ला चिन्खुबाचि छुप्सुचि॥ न्हाङ् उङा ङ्खाचि छिम्दुचि, “खिरिस्टका वाम हेॽने लेङ्मेॽना लोप्पि?”
5ङ्खाचिङा पोलोवा म्बि, “याहुदियागा बेथ्लेहेम तेनबे, इजाङ्बाङ्निङ् निङ्वाफुमाभाङ् चेक्खुबाङा खा चेॽयागा उतुम्बे धार्मासाप्लाबे खाॽला छेप्तुक्सु–
6‘ओ याहुदिया लिङ्खामगा बेथ्लेहेम तेनबेॽहा याॽमिचि,
न्निङ्दाभाङ् एको माडा तायेन्राङ्बा लोम्मे,
ङ्खोङ्माङ् न्निङ्दा याहुदिया लिङ्खामगा साहारचिबेॽहा याॽमिचि हाक्निङ् इहाचा चेॽयाबे मिहा म्मेतिसिगान्हा॥
उङामाङ् आका याॽमि इजिरेलिचि गोठालाङा लोॽवा उचुन स्वाचिहा॥’”#मिका ५:२
7खा चेॽया खेप्सुहोङ् हेरोदङा ङ्खा जोतिसिचि स्वाक काहेतुचिहोङ् न्ना चोक्चोकि इखिङ्बेला ओताना भोङ् छिम्दुचि॥ न्हाङ् उङा न्ना चोक्चोकिगा उतुम्बे ङ्खाचिभाङ् था तोक्तु॥ 8न्हाङा उङा ङ्खाचि खाॽला लुचिहोङ् बेथ्लेहेमबे पाक्सुचि, “खेइघोङ् न्ना पिछा उचुन योगानुम॥ न्निङ्दा उङ् तुप्सुम्गाना सोलोक का चा लुया, न्हाङ् खेमेङ्होङ् का चा सेमेत्वाङ्ना॥”
9हाङ् हेरोदका चेॽया ङ्खेप्सुहोङ् ङ्खा जोतिसिचि बेथ्लेहेम पोटि ङ्ख्या॥ ङ्खाचि ङ्ख्यानिङ् नाम्लोन पोटि न्निसुना चोक्चोकि फेरि ङ्खाचिगा ओन्दाङ्-ओन्दाङ् लाचोगा, न्हाङ् पिछा वायाना ठोङ्गा तो सिधा तासुहोङ् येबा॥ 10न्ना चोक्चोकि न्निसुहोङ् ङ्खाचि इब्बे-इब्बे न्जोन्दास्या॥
11न्ना पाङ्बे न्दासुहोङ् पाहोङ्बे ङ्ङुया॥ ङ्खाचिङा न्नाबे पिछा उमा मारियामनुङ् वायाना न्निसु॥ न्हाङा फोप म्फोप्ताहोङ् पिछा न्सेमेतु, न्हाङ् उङ्चि खेसुपचि ङ्होसुचिहोङ् साम्मेङ्, खुम्दु नाम्खुबा धुप नुङ् मुर्रागा भेटि न्दिसु॥
12न्हाङा ङ्खा जोतिसिचिङा सेम्माङ्बे निङ्वाफुमाभाङ् “न्निङ्दा हाङ् हेरोदकाबे न्लासाख्यानिन” भोङ् चेतावानि न्दोक्तुहोङ् हेकोना लाम्बु उङ्चि खाम्युकपे न्लासा॥
योसेफ उका पाङ्बेॽहाचिनुङ् मिस्राबे खुसाख्याना
13ङ्खा जोतिसिचि ङ्खेब्याहोङ् योसेफङा सेम्माङ्बे हाङ्बा निङ्वाफुमागा एको वालोक्दुत निसु, न्ना वालोक्दुतङा उङ् लु, “पोगा, पिछा नुङ् उमा खेतुचिघोङ् हानि मिस्रा खाम्युकपे खुसाखेब्या, न्हाङ् का लासाआबा मेन्लुॽले सोम्मा न्नाबेॽमाङ् वाया, इजाङ्बाङ्निङ् हेरोदङा पिछा सिमागा चोक्मासिमेॽना॥”
14योसेफङा खाॽलाहा सेम्माङ् माक्तुहोङ् पोगा, न्हाङ् सेॽनिमाङ् पिछा नुङ् पिछागा उमा खेतुचिहोङ् मिस्रा खाम्युकपे खेब्या॥ 15न्हाङा हाङ् हेरोद मेन्सिले सोम्मा उङ्चि न्नाबेॽमाङ् ङ्वाया॥ खाॽला निङ्वाफुमाभाङ् चेक्खुबागा उयाभाङ् हाङ्बा निङ्वाफुमाङा चेक्तुहा चेॽया पुरा लेक्साहा– “का मिस्रा खाम्युकपाहाङ् आच्या काङ्ना॥”#होसे ११:१
हेरोदङा पिछाचि सिमेतुचिहा
16जोतिसिचिङा न्लेमुचोना चेॽया हेरोदङा था तोक्तुहोङ् उङ् ओलोक खोॽमाङा मि लेक्सा॥ उङा चोक्चोकि इखिङ्बेला ओताना बाङ्ना चेॽया जोतिसिचिभाङ् था तोक्तुक्सा॥ न्हाङा उङा बेथ्लेहेम तेन नुङ् न्नागा ओरिपोरिहा ठोङ्बेॽहा हिच फिम्बिलिङ् ताखुबा न्हाङ् हिच फिम्बिलिङ् मोहा घाक बाबुचि सिमेतुचि॥ 17ङ्खिङ्बेला निङ्वाफुमाभाङ् चेक्खुबा यार्मियाङा प्याक ओन्दाङ् चेक्तुक्साहा खा चेॽया पुरा लेक्सा–
18“रामा साहारबे माडा सेम्लाङा तुक्नुङ् ङ्हाबाहा नुङ् बिलाप न्जोगाहा खेम्मा सिम्मेङ्,
राहेल उका उच्याचिगा लागि हाप्मासिमे॥ उङ् इसाङा चा स्वाक वामेॽमा ङ्यासुनिन,
इजाङ्बाङ्निङ् उका घाक उच्याचि न्स्यामा॥”#यार्मिया ३१:१५
19हेरोद सेब्याहोङ्, मिस्रा खाम्युकपे योसेफकाबे हाङ्बा निङ्वाफुमागा एको वालोक्दुत सेम्माङ्बे ओताहोङ् खाॽला लु, 20“पोगा, हाकु पिछा सिमा योक्खुबा याॽमिचि न्स्याब्यामाहा, ङ्खोङ्माङ् पिछा नुङ् पिछागा उमा खेतुचिघोङ् इजिरेल खाम्युकपे लासाख्या॥” 21न्हाङा योसेफ पोगा न्हाङ् पिछा नुङ् पिछागा उमा खेतुचिहोङ् इजिरेल खाम्युकपे लासा॥
22ङ्खाॽनिङ्गो हेरोद स्याहोङ् उका उच्या आर्खिलाउस याहुदिया लिङ्खामगा हाङ् लेक्सामाना बाङ्ना चेॽया योसेफङा खेप्सुहोङ् उङ् न्नाबे खेॽमा किसिता॥ न्हाङा फेरि सेम्माङ्बे निङ्वाफुमाङा खेॽमामाङ् उचुन लेङ्मेहा लुनाङा गालिल पोटि ख्या॥ 23ख्याहोङ् उङ्चि नासारात बाङ्ना साहारबे वामा न्दारोक्तु॥ खाॽला निङ्वाफुमाभाङ् चेक्खुबाङा “उङ् नासारि लुमेॽना” भोङ् चेक्तुक्साहा चेॽया पुरा लेक्सा॥#मार्कुस १:२४; लुका २:३९; युहान्ना १:४५
Sélection en cours:
मात्ति 2: YAKH
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2023, Wycliffe Bible Translators, Inc. and Nepal Bible Society
