創世記 11
11
巴別塔
1彼時，天下的腔口及語言攏仝款。 2𪜶向東旁遷徙的時，佇示拿地發見一片平原，就佇遐徛起。 3𪜶互相參詳講：「來！咱著來做磚仔，燒互透。」𪜶就用磚仔代替石頭，用打馬膠代替灰土。 4𪜶閣講：「來！咱著來起城造塔，塔頂迵天，互咱出名，才免咱四散佇全地。」
5上主落來，欲看世間人起造的城及塔。 6上主講：「看咧，𪜶是仝一個民族，講像一個語言。今，𪜶已經開始做此個事，以後𪜶欲做的，攏𣍐當給𪜶阻擋。 7來！咱落來去，拍亂𪜶的語言，互𪜶的話𣍐相通。」 8上主就互𪜶對遐分散佇全地；𪜶就停工，無起彼座城。 9所以彼個城叫做巴別#11.9 「巴別」嘛通譯做「巴比倫」，意思是「拍亂」。，因為上主佇遐拍亂天下的語言，閣對遐互人分散佇全地。
閃的後代
(代上 1.24-27)
10下面是閃的後代：
大水以後兩年，閃一百歲生亞法撒。 11閃生亞法撒了後，猶活五百年，閣有生後生查某子。
12 亞法撒三十五歲生沙拉。 13亞法撒生沙拉了後，猶活四百空三年，閣有生後生查某子。
14 沙拉三十歲生希伯。 15沙拉生希伯了後，猶活四百空三年，閣有生後生查某子。
16 希伯三十四歲生法勒。 17希伯生法勒了後，猶活四百三十年，閣有生後生查某子。
18 法勒三十歲生拉吳。 19法勒生拉吳了後，猶活兩百空九年，閣有生後生查某子。
20 拉吳三十二歲生西鹿。 21拉吳生西鹿了後，猶活兩百空七年，閣有生後生查某子。
22 西鹿三十歲生拿鶴。 23西鹿生拿鶴了後，猶活兩百年，閣有生後生查某子。
24 拿鶴二十九歲生他拉。 25拿鶴生他拉了後，猶活一百十九年，閣有生後生查某子。
26 他拉七十歲生亞伯蘭、拿鶴、哈蘭。
他拉的後代
27下面是他拉的後代：
他拉生亞伯蘭、拿鶴、哈蘭；哈蘭生羅得。 28哈蘭佇伊的老父他拉猶活啲的時，死佇故鄉巴比倫的吾珥城。 29亞伯蘭及拿鶴攏有娶某。亞伯蘭的某叫做莎萊；拿鶴的某叫做蜜迦，是哈蘭的查某子；哈蘭是蜜迦的老父，嘛是亦迦的老父。 30莎萊𣍐生育，無生子。
31 他拉導伊的子亞伯蘭及孫羅得，就是哈蘭的子，以及伊的新婦莎萊，就是亞伯蘭的某，做夥離開巴比倫的吾珥城，欲去迦南地；𪜶到哈蘭就住佇遐。 32他拉活兩百空五歲，死佇哈蘭。
Sélection en cours:
創世記 11: TTVH
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
The Bible Society in Taiwan, 2021
