मत्ती 11

यीशु एने बाप्तिस्मा आपणार यूहन्ना

(लूका 7:18-35)

1जेवी यीशु आपणां बारा चेलाह आज्ञा आप दिनू, तो तारीन निकलीन हेयराम जाइन पोरचार आपणे गीयो. 2बोन्दिखाणामाय यूहन्ना यीशुन कामाविषयी होमलल्यो तेवी आपणो चेलाह तान आहने फुसणेन केरता मोकलील, 3“जो आवणार हि तो तूच हि, काय उजू दिहीरान वाट जुवणे” 4यीशु ताह उत्तर आपील, “जो काय तुमु होमेलतेह एने देखतेह तो आखो यूहन्नाहा जाइन किवू, 5कि आंधलाह देखणु, लेंगडा चालणु, कुष्ठरोगी शुद्ध ऐतेह, बैरा होमेलनू, मुरील जीवता ऐतेह एने गेरीबाह सुवार्ता जुडीह. 6जो मारबाराम ठोकर नाहं, खाते ता धन्य” 7यूहन्नानान जात रेणा यीशु माणहाह यूहन्नान बारामाय केणे लाग्यो का, “तुमु जेंगलामाय काय देखणेन जायील एता? वाराम आलताला जेड्या काय” 8ओवतो तुमु काय देखणेन जायील एता? कोमल फाडका पिरील माणहाह? देखू, कोमल फाडका पेरणाराह राजभवनेमाय रेतेह. 9ओवतो तुमु काहा जाईल एता? काय भविष्यवक्ताह देखणेन? होव, मी तुमूह किथु भविष्यवक्ताह रीन भी मोठा माणहाह. 10ज्यू तोच हि ज्यांनबारामाय लिखील हि, “मी आपणा दूताह तार ओगांण मोकलील हि ज्यो तार ओगांण तारी वाट बोणावी” 11“मी तुमूह खेरीज किथु का, बायकून पेटारीन जेल्मो लेईल मायरीन यूहन्ना बाप्तिस्मा आपणार रीन मोठू कुनुस नाहं एनो, तेभी पुण स्वर्गान राज्याम जो आत्या से आत्या हि तो ताहरीन मोठो हि. 12यूहन्ना बाप्तिस्मा आपणेन दिहीरीन आजवोर स्वर्गान राज्यात शक्ती से प्रवेश एतालो, ताकवर सांडाळ लेतेह. 13कारण आखा भविष्यवक्ता एने व्यवस्था भविष्यवाणी यूहन्ना आवी ताहवोर केरताला. 14एने तुमु मान लिवू का जोस ती एलिया हि जो आवण्यो एतो” 15जान कान हेते ता होमली लेवो. 16“मी ओवतो पिडीन माणहान मेल कुणीहेरी केरूह? ता ते ता सोरान होस हि, जा बाजारामा बोहीन एक दिहरा आयेडीन केणु, 17आमु तुमरीकेरता पावाली वाजाडील, तेभी तुममु नाचना नाहं, आमु तुमरीकेरता दुखान गीत गायील तेभी तुमूह दुख केऱ्या नाहं. 18काहाकाय यूहन्ना नाह खाति एने नाह पिति आयील हि, तीभी ता ताह केणु कि ताह दुष्ट आत्मा लागिल” 19माणहान सोरो खाति एने पिति आयील हि, एने ता केणु, “देखू, एड्ख्यो एने पिनार, चुंगीलेणारा एने पापीन हेरी” पुण ज्ञान आपणो कामानहोस खेरलो ठेराईल हि.

अविश्वास पोर हाय

(लूका 10:13-15)

20ओवतो तो नगराह दोष आपणे लाग्यो, कारण ता नगराम तो जुलुम चमत्कार केरील एतो, पुण ता मोन फिराव्या नाह. 21हाय खुराजीन “हाय, बेथसदा! जा चमत्कार तुमारेमाय इयील एता ता सोर एने सिदोन एणेजुवताल, ताकुल बुखेन मोन फिराव लेता, तारी कोलिक दुर्दशा एय.” 22पुण मी तुमूह किथु का, न्यायान दिह तुमरी सोर दशा सिदोन एने गमोरान दशा जादा सहने योग्य रेंय. 23एने “हे कफर्णहुमा, काय तू स्वर्गामाय वोर उचो केरनेमाय आवही? पुण तू ते अधोलोक वोर नीचे जाही, काहाकाय जां सामर्थ्यान काम तारमाय एना, जर सदोमामाय केराय जाता, ते तो आजवोर टिकीन रेतो.” 24पुण मी तुमूह किथु का, “न्यायान दिह तारी दशा से सदोम नगरान दशा जादा सहने योग्य रेंय.”

वोजासे दाबायील माणहाह आराम

25ताच टैमापोर यीशु केयो, “हे आबाक, स्वर्ग एने पृथ्वीन प्रभु, मी तारी स्तुती केरथू का, तू ज्यू वातू ज्ञानवान एने बुद्धिमान माणहान रीन लीडीन मेललील एतो, एने सोरान ओगाण मेलील हि.” 26“होव, हे आबाक, काहाकाय तुवाह ज्योच हाजो.” 27मार पिता माहु आखो होप दियील हि, एने काललाह आबाक ओलखतेहे ता सोराह नाह, एने काललाह सोराह ओलखतेहे ता आबाक नाह, एने ताह जापोर सोरू प्रकट केरेणेन होदी. 28“हे सोब मेहनत केणेवाला एने वोजासे दाबायील माणहा मार फाय आवो, मी तुमूह आराम आपुह. 29मारा जुतो उपेर विसीन लावो, एने माफायरीन हिकू, काहाकाय मी नम्र एने दिन मोनामय हि, एने तुमु आपणा मोनामय आराम पावहु. 30काहाकाय मारा जुतो हल्को एने मारो वोज हल्को एय जाय.”

Sélection en cours:

मत्ती 11: NLXNT

Surbrillance

Copier