यूहन्ना 2
2
काना गाँव ने बिहा
1फेर तीसर दिने गलील नंगर चो काना गाँव ने काचीई बिआ रये, आउर ईशु चो आया बले हुता रली। 2ईशु आउर हुनचो चेलामन बले हुन बिआ ने नीवतलोर रवत। 3जिदलदाय अंगुर रस कम होली, तेबे ईशु चो आया हुनचो ले बल्ली, “हुनमन चो लगे अंगुर रस नी रली।” 4ईशु हुनचो ले बल्लो “हे आया, मोके तुचो ले काय काम? ऐबे मोचो बेरा नी ईली से।” 5ईशु चो आया सेवकमन ले बल्ली, “जोन काई हुन तुमचो ले बले दे, हुनी करा।” 6हुता यहूदीमन चो शुद्ध करतो बिती रीति चो अनुसार पकना चो छय हांडी धरू रवत, जोन थाने दुय-दुय, तीन-तीन मन धरते रये। 7ईशु हुनमन ले बल्लो, “हांडीमन ने पानी भरून दिआ।” हुनमन हुता मुंह कट मुंह कट भरून दिला। 8तेबे हुन हुनमन ले बल्लो, “अदायं निकराऊन भाती भोज चो परधान चो लगे धरून जाआ।” आउर हुनमन नीला। 9जिदलदाय भोज चो परधान हुन पानी के चाकलो, जोन दाखरस बनुन जाऊ रये आउर नी जानते रये कि हुन काहां ले ईली से (मान्तर जोन सेवकमन पानी निकराऊ रवत हुनीमन जानते रवत), तेबे भोज चो परधान दुला के हाग देऊन भाती हुनचो ले बल्लो, 10“सपाय माने पयले नगत दाखरस देऊ आत, आउर जिदलदाय लोग पीऊन भाती मातुन जाऊ आत, तेबे मंजीमन्या देऊ आय; मान्तर तुय नगत दाखरस ऐबे तक संगाली सीस।” 11ईशु गलील चो काना गाँव ने आपलो ऐ पयला चिना दकाऊन भाती आपलो महिमा उजागर करलो आउर हुनचो चेलामन हुनचो उपरे बिश्वास करला। 12ऐचो पाचे हुन आउर हुनचो आया आउर हुनचो भाई आउर हुनचो चेलामन कफरनहूम ने गेला आउर हुता खिन्डिक दिन रला।
मंदिर ले बेबारीमन के निकरातोर
13यहूदीमन चो फसह चो तिआर लगे रये, आउर ईशु यरूशलेम ने गेलो। 14हुन मंदिर ने बयला, मेंडा आउर परेयां चो बिकतो बितामन आउर पयसा पलटाऊ बितामन के बसलोर भेटलो। 15तेबे हुन डोरीमन चो कोड़ा बनाऊन भाती, सपाय मेंडामन आउर बयलामन के मंदिर ले निकराऊन दिलो, आउर कन्तर ने देतो बितामन चो पयसा के बिकरून दिलो आउर माचीमन के उलटाऊन दिलो, 16आउर परेयां बिकतो बितामन ले बल्लो, “ऐ मन के ऐथा ले निआ। मोचो बुआ चो घर के बेबार चो घर नी बनाआ।” 17तेबे हुनचो चेलामन के सुरता ईली कि लिकलोर आसे, “तुचो घर चो धुन मोके खाऊन जाय दे।” 18ऐ थाने यहूदीमन हुनचो ले बल्ला, “तुय जोन ऐ कर सीस तो आमके कोन चिना दकाय सीस?” 19ईशु हुनमन के जबाप दिलो, “ऐ मंदिर के घसराऊन दिआस, आउर मय ऐके तीन दिन ने उबा करून देयें दें।” 20यहूदीमन बल्ला, “ऐ मंदिर के बनातो ने छिंयालिस बरक लागली से, आउर काय तुय हुनके तीन दिन ने उबा करून दे से?” 21मान्तर हुन आपलो देंह चो मंदिर चो बारे ने बोलुन रये। 22आउर जिदलदाय हुन मरलो बितामन थानले जीव उठलो तेबे हुनचो चेलामन के सुरता ईली कि हुन ऐ बोलुन रलो; आउर हुनमन पवितर शास्त्र आउर हुन बचन के जोन ईशु बोलुन रये, बिश्वास करला।
ईशु माने चो मन के जाने
23जिदलदाय हुन यरूशलेम ने फसह चो समया तिआर ने रलो, तेबे खुबे लोगमन हुन चिनामन के जोन हुन दकाते रये दकुन भाती हुनचो नाव ने बिश्वास करला। 24मान्तर ईशु आपन खुद के हुनमन चो भरसा ने नी छांडलो कसनबल्लोने हुन सपाय के जानते रये; 25आउर हुनके जरूरी नी रली कि माने चो बारे ने कोनी गोहई दे ओत, कसनबल्लोने हुन खुदे ची जानते रये कि माने चो मन ने काय आसे?
Sélection en cours:
यूहन्ना 2: HLBNT
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Halbi Bible by The Love Fellowship is licensed under Creative Commons Attribution-ShareAlike 4.0 License.
